രവീന്ദ്രൻ ഹാജരാകാത്തതിനുകാരണം​ ആരോഗ്യ പ്രശ്​നങ്ങൾ -എ. വിജയരാഘവൻ

കണ്ണൂർ: സി.എം. രവീന്ദ്രൻ ഇ.ഡിക്ക് മുന്നിൽ ഹാജരാകാതിരിക്കുന്നത് ആരോഗ്യ പ്രശ്നങ്ങൾ കാരണമാണെന്ന് സി.പി.എം സംസ്ഥാന സെക്രട്ടറി എ. വിജയരാഘവൻ. കണ്ണൂർ പ്രസ്​ ക്ലബി​ൻെറ 'മീറ്റ്​ ദി ലീഡർ' പരിപാടിയിൽ സംസാരിക്കുകയായിരുന്നു അദ്ദേഹം. അല്ലാതെ അന്വേഷണ ഏജൻസിക്ക് മുന്നിൽ ഒളിച്ചോടേണ്ട കാര്യമൊന്നും കമ്യൂണിസ്​റ്റുകാർക്കില്ല. സ്വർണക്കള്ളക്കടത്തിലടക്കം യഥാർഥ പ്രതികളെ കണ്ടെത്തുന്നതിനുപകരം രാഷ്​ട്രീയ ലാഭത്തിനായി കേന്ദ്ര ഏജൻസികളെ ഉപയോഗപ്പെടുത്തുകയാണ്. മുഖ്യമന്ത്രി പ്രചാരണത്തിനിറങ്ങുന്നില്ലെന്നത്​ അവാസ്തവ പ്രസ്താവനയാണ്​. ​ എൽ.ഡി.എഫിനെ മുഖ്യമന്ത്രി തന്നെയാണ് നയിക്കുന്നത്. 36,000 ബൂത്തുകളിൽ വോട്ടർമാരെ അഭിമുഖീകരിച്ച് വെബിനാറിൽ മുഖ്യമന്ത്രി സംസാരിച്ചത് വലിയ വിജയമായിരുന്നു. കോവിഡ് മാനദണ്ഡങ്ങളുടെ പരിമിതിയുള്ളതിനാലാണ് അദ്ദേഹം പൊതുയോഗങ്ങളിൽ പങ്കെടുക്കാത്തത്. വ്യക്തതയുള്ള രാഷ്​ട്രീയമില്ലെന്നതാണ് യു.ഡി.എഫി​ൻെറ ദൗർബല്യം. അവസരവാദ രാഷ്​ട്രീയമാണവർക്ക്. വോട്ടുകച്ചവടവും പരസ്പരം വോട്ട് മരവിപ്പിക്കലുമാണ് തെക്കൻ ജില്ലകളിൽ ഒന്നാം ഘട്ട തെരഞ്ഞെടുപ്പിൽ കണ്ടത്. ബി.ജെ.പിയിലേക്ക് പാലംകെട്ടാൻ പല നേതാക്കളും തുടങ്ങിയിട്ടുള്ള ശ്രമങ്ങൾ കോൺഗ്രസിനെ നാശത്തിലേക്ക് നയിക്കും. ജമാഅത്തെ ഇസ്​ലാമിയുമായി യു.ഡി.എഫ് സഖ്യമുണ്ടാക്കിയത് ബി.ജെ.പിക്ക് കരുത്തുപകരുന്നതാണ്. നേരത്തെ ജമാഅത്തെ ഇസ്​ലാമിക്കെതിരെ കോൺഗ്രസും ലീഗുമെല്ലാമെടുത്തിരുന്ന നിലപാട് ഇതായിരുന്നില്ല. എന്നാൽ, ആ സംഘടനക്ക്​ ഇന്ന് എന്ത് മാറ്റമുണ്ടായെന്നുകൂടി യു.ഡി.എഫ് നേതൃത്വം പറയണം. ജമാഅത്തെ ഇസ്​ലാമിയോട് ഒരു കാലത്തും സി.പി.എമ്മിന് ആഭിമുഖ്യമുണ്ടായിട്ടില്ലെന്നും വിജയരാഘവൻ പറഞ്ഞു. സി.പി.എം ജില്ല നേതാക്കളായ എം.വി. ജയരാജൻ, കെ.പി. സഹദേവൻ എന്നിവരും സംബന്ധിച്ചു. പ്രസ്ക്ലബ് പ്രസിഡൻറ്​ എ.കെ. ഹാരിസ് അധ്യക്ഷത വഹിച്ചു. സെക്രട്ടറി പ്രശാന്ത് പുത്തലത്ത് സ്വാഗതവും സബിന പത്മൻ നന്ദിയും പറഞ്ഞു.