ഓലായിക്കരയിൽ ബോംബുകൾ കണ്ടെത്തി

കൂത്തുപറമ്പ്: ഓലായിക്കരയിൽ പൊലീസ് നടത്തിയ റെയ്​ഡിൽ രണ്ട് നാടൻ ബോംബുകൾ കണ്ടെത്തി. ഓലായിക്കര റോഡരികിലെ പറമ്പിൽ പ്ലാസ്​റ്റിക് ബക്കറ്റിൽ സൂക്ഷിച്ച നിലയിലായിരുന്നു ബോംബ് കണ്ടെത്തിയത്. രഹസ്യവിവരത്തെ തുടർന്ന് കതിരൂർ പൊലീസും ബോംബ് സ്ക്വാഡും സംയുക്​തമായി നടത്തിയ റെയ്ഡിലാണ് ബോംബുകൾ പിടിച്ചെടുത്തത്. ഉഗ്രശേഷിയുള്ളതെന്ന് കരുതുന്ന ബോംബുകൾ പിന്നീട് പൊലീസ്​ നിർവീര്യമാക്കി. തെരഞ്ഞെടുപ്പ് അടുത്ത സാഹചര്യത്തിൽ ബോംബുകൾ കണ്ടെത്തിയത് പ്രദേശത്ത് ആശങ്ക സൃഷ്​ടിച്ചിരിക്കുകയാണ്. ബോംബ് സ്ക്വാഡ് എസ്.ഐ ശശി, ദിലീപ് പാറക്കണ്ടി, മഹേഷ് തുടങ്ങിയവരുടെ നേതൃത്വത്തിലാണ് പരിശോധന നടന്നത്.