കൂനംപള്ളയിൽ പുലിയെ കണ്ടതായി നാട്ടുകാരൻ

കേളകം: വെള്ളൂന്നി കൂനംപള്ള കോളനിയിലേക്കുള്ള വഴിയിൽ പുലിയെ കണ്ടതായി നാട്ടുകാരൻ. കൂനംപള്ള നിവാസിയായ ഇ.കെ. ജയേഷാണ് പുലിയെ കണ്ടത്. ചൊവ്വാഴ്ച രാത്രി എട്ടരയോടെയാണ് സംഭവം. വെള്ളൂന്നിയിൽ നിന്ന്​ കൂനംപള്ളക്ക്​ പോകുംവഴി ഇടക്കുള്ള വനഭാഗത്ത്​ പുലി റോഡിലേക്ക് ചാടുകയായിരുന്നു. ആക്രമണത്തിൽ നിന്ന്​ തലനാരിഴക്കാണ് ഇയാൾ രക്ഷപ്പെട്ടത്. രണ്ടുമാസം മുമ്പും പ്രദേശത്ത് പുലിയെ കണ്ടിരുന്നു. കൂനംപള്ളയിലെ വ്യൂ പോയൻറിനു സമീപമാണ് രണ്ടു തവണയും പുലിയെ കണ്ടത്. നിരവധി ആളുകൾ എത്തുന്ന പ്രദേശത്ത് പുലിയുടെ സാന്നിധ്യം ആശങ്കയുണ്ടാക്കുന്നതായി നാട്ടുകാർ പറയുന്നു.