മഞ്ഞുമ്മൽ പീഡനം: മൂന്നു പ്രതികളെ തേടി പൊലീസ്​ യു.പിക്ക്​ പോകും

കളമശ്ശേരി: ഏലൂർ മഞ്ഞുമ്മലിൽ പതിനാലു ​വയസ്സുകാരിയെ കൂട്ട ബലാത്സംഗം ചെയ്​ത കേസിൽ പിടികൂടാനുള്ള മൂന്ന്​ യു.പി സ്വദേശികളെ പൊലീസ്​ തിരിച്ചറിഞ്ഞു. എറണാകുളത്ത്​ ജോലി ചെയ്​തിരുന്ന ഇവർ നാട്ടിലേക്ക്​ കടന്നു. ഇവരെ പിടികൂടാൻ കൊച്ചിയിൽനിന്ന്​ പൊലീസ്​ സംഘം ഉടൻ പോകുമെന്ന്​ അസി. കമീഷണർ കെ. ലാൽജി അറിയിച്ചു. സംഭവത്തിൽ ആറ് പേർക്കെതിരെയാണ്​ കേസ്​. ഉത്തർപ്രദേശ്​ രാംപൂർ അസീംനഗറിൽ ഷാഹിദ്​ (24), രാംപൂർ സിറ്റി സ്വദേശി ഫർഹദ്​ ഖാൻ (29), രാംപൂർ സ്വദേശി ഹനീഫ്​ (28) എന്നിവരാണ്​ അറസ്​റ്റിലായത്​. അയൽപക്ക സൗഹൃദം ചൂഷണംചെയ്​താണ്​ വിദ്യാർഥിനിയെ അന്തർ സംസ്ഥാന തൊഴിലാളികൾ കൂട്ട പീഡനത്തിന് ഇരയാക്കിയതെന്ന്​ അറിയുന്നു. മാതാവ്​ മരിച്ചതോടെ മുത്തശ്ശ​ൻെറയും മുത്തശ്ശിയുടെയും സംരക്ഷണയിലാണ്​ പെൺകുട്ടി കഴിഞ്ഞിരുന്നത്​. അടുത്തിടെ കുട്ടിയുടെ പെരുമാറ്റത്തിൽ അസ്വാഭാവികത ശ്രദ്ധയിൽപ്പെട്ട മുത്തശ്ശി, മുത്തശ്ശനോട് വിവരം ധരിപ്പിച്ചു. തുടർന്ന്​ പ്രദേശത്തെ സ്വകാര്യ ആശുപത്രിയിൽ ഡോക്ടറെ കാണിച്ച് കൗൺസലിങ്​ നടത്തി. ഇതോടെയാണ് നിരന്തരം പീഡനത്തിനിരയായതായി അറിയുന്നത്. കൗൺസലിങ് നടത്തിയ ഡോക്ടർ ഏലൂർ പൊലീസിൽ അറിയിച്ചു. അവർ നടത്തിയ അന്വേഷണത്തിലാണ് പീഡനം പുറത്തറിയുന്നത്. രണ്ട്​ പ്രതികളെ വിവരമറിഞ്ഞ 20നും മൂന്നാമനെ പിറ്റേന്നും അറസ്​റ്റ്​ ചെയ്തു. ലോക് ഡൗൺ കാലത്ത്​ ഏലൂരിൽനിന്ന്​ മറ്റു സംസ്ഥാനങ്ങളിലേക്ക് പോയ അന്തർ സംസ്ഥാനക്കാർക്കൊപ്പം മറ്റ്​ മൂന്നു പ്രതികൾ കടന്നതായാണ് സംശയിക്കുന്നതെന്ന് പൊലീസ് പറഞ്ഞു.