പോപുലർ ഫിനാൻസ്​ തട്ടിപ്പ്​: സി.ബി.ഐക്കെതിരായ കോടതിയലക്ഷ്യ ഹരജി തള്ളി

കൊച്ചി: പത്തനംതിട്ട പോപുലർ ഫിനാൻസ് നിക്ഷേപത്തട്ടിപ്പ്​ കേസിൽ ഹൈകോടതി നിർദേശിച്ചിട്ടും അന്വേഷണം ഏറ്റെടുത്തില്ലെന്നാരോപിച്ച് സി.ബി.ഐക്കെതിരെ നിക്ഷേപകർ നൽകിയ കോടതിയലക്ഷ്യ ഹരജി ഹൈകോടതി തള്ളി. പ്രത്യേക സംഘത്തെ നിയോഗിച്ച്​ അന്വേഷണം തുടങ്ങിയെന്ന്​ സി.ബി.ഐ അഭിഭാഷകൻ അറിയിച്ചതിനെ തുടർന്നാണ്​ ജസ്​റ്റിസ്​ പി. സോമരാജൻ ഹരജി തള്ളിയത്​. സി.ബി.ഐ അന്വേഷിക്കണമെന്ന് ഉത്തരവുണ്ടായിട്ടും കേസ് ഏറ്റെടുക്ക​ാനോ എഫ്.ഐ.ആർ രജിസ്​റ്റർ ചെയ്യാനോ സി.ബി.ഐ തയാറായില്ലെന്നായിരുന്നു ഹരജിയിലെ ആരോപണം. കോടതിയലക്ഷ്യ നടപടി ഡിവിഷൻ ബെഞ്ച് നേരത്തേ താൽക്കാലികമായി സ്​റ്റേ ചെയ്തിരുന്നു. തുടർന്ന്​ ഹരജി വീണ്ടും സിംഗിൾ ബെഞ്ച്​ മുമ്പാകെ എത്തുകയായിരുന്നു. തട്ടിപ്പുമായി ബന്ധപ്പെട്ട പരാതികൾ പല കേസുകളായാണ് രജിസ്​റ്റർ ചെയ്തതെന്നും ഇവ ഒറ്റക്കേസായി പരിഗണിക്കാൻ അനുവദിക്കണമെന്നുമാവശ്യപ്പെട്ട് സി.ബി.ഐ നൽകിയ ഹരജി​ കോടതിയുടെ പരിഗണനയിലുള്ളത്​ കൂടി പരിഗണിച്ചാണ്​ കോടതിയലക്ഷ്യ ഹരജി തള്ളിയത്​. അതേസമയം, വിവിധ സ്​റ്റേഷനുകളിലായി കേസ്​ രജിസ്​റ്റർ ചെയ്യാനും ഇവയിൽ റിമാൻഡ്​ റിപ്പോർട്ട്​ ഫയൽ ചെയ്യാനും നിർദേശമുണ്ടെങ്കിലും ചില മജിസ്​​േ​ട്രറ്റുമാർ റിമാൻഡ്​ അപേക്ഷ തള്ളുകയും ചിലർ അനുവദിക്കുന്നതും ചെയ്യുന്നതായി ചൂണ്ടിക്കാട്ടി പ്രതികൾ നൽകിയ ഹരജി ജസ്​റ്റിസ്​ വി.ജി. അരുൺ പരിഗണിച്ചു. 2020 നവംബർ 23ന്​ ശേഷം ഹരജിക്കാരായ പ്രതികൾക്കെതിരെ ബഡ്​സ്​ ആക്​ട്​ പ്രകാരം കേസ്​ രജിസ്​റ്റർ ചെയ്​തിട്ടുണ്ടോ, റിമാൻഡ്​ അപേക്ഷ ഏതെങ്കിലും മജിസ്​​േ​ട്രറ്റ്​ കോടതിയിൽ സമർപ്പിച്ചിട്ട​ുണ്ടോ എന്നീ കാര്യങ്ങളിൽ പൊലീസ്​ ഏകീകൃത വിശദീകരണ പത്രിക നൽകണമെന്ന്​ കോടതി നിർദേശിച്ചു. ഹരജി വീണ്ടും ഫെബ്രുവരി എട്ടിന്​ പരിഗണിക്കും. സ്ഥാപന ഉടമകളായ റോയ് തോമസ് ഡാനിയൽ, ഭാര്യ പ്രഭ തോമസ്, മക്കളായ റീബ മേരി, റിയ ആൻ തോമസ്, ഡോ. റിനു മറിയം തോമസ് എന്നവരാണ്​ ഹരജി നൽകിയിട്ടുള്ളത്​.