മാലിന്യശേഖരണ വാഹനങ്ങൾ നിരീക്ഷിക്കാൻ സംവിധാനം
text_fieldsഅബൂദബി: ഇലക്ട്രോണിക് ട്രാക്കിങ് സംവിധാനത്തിലൂടെ അബൂദബി മാലിന്യ നിർമാർജന കമ്പനി (തദ്വീർ) 4,358 മാലിന്യശേഖരണ വാഹനങ്ങളുടെ സഞ്ചാരം നിരീക്ഷിക്കുന്നു. മാലിന്യ ശേഖരണ സ്ഥലം മുതൽ സംസ്കരണ സ്ഥലത്ത് എത്തുന്നതുവരെയാണ് നിരീക്ഷിക്കുക. അബൂദബി എമിറേറ്റിൽ മാലിന്യം ശേഖരിക്കുന്ന എല്ലാ സ്ഥാപനങ്ങളുടെയും വാഹനങ്ങൾ തദ്വീർ കേന്ദ്രത്തിൽ രജിസ്റ്റർ ചെയ്യണം. ഇലക്ട്രോണിക് ട്രാക്കിങ് സംവിധാനത്തിനുള്ള ഉപകരണങ്ങൾ വാഹനത്തിൽ സ്ഥാപിക്കണമെന്നും അറിയിച്ചിട്ടുണ്ട്.
പുനരുപയോഗ ആവശ്യകതകൾ പാലിക്കാതെ ഏതെങ്കിലും വാഹനം പ്രവർത്തിച്ചാൽ തദ്വീർ നിർദേശിക്കുന്ന വ്യവസ്ഥകൾ ശരിയാക്കുന്നതുവരെ വാഹന ലൈസൻസ് താൽക്കാലം റദ്ദാക്കും. ഇലക്ട്രോണിക് ട്രാക്കിങ് സംവിധാനത്തിലൂടെ മാലിന്യങ്ങൾ വലിച്ചെറിയുന്ന രീതി ഗണ്യമായി കുറക്കാൻ സഹായിച്ചതായും തദ്വീർ അറിയിച്ചു. മാലിന്യ വാഹനങ്ങളുടെ ഡ്രൈവർമാരിൽ അച്ചടക്കം വർധിപ്പിക്കുന്നതിനും ഈ സംവിധാനം കാരണമായിട്ടുണ്ട്.
അബൂദബി എമിറേറ്റിൽ മാലിന്യ സംസ്കരണത്തിൽ ഏർപ്പെടാൻ അബൂദബി സെൻറർ ഫോർ വേസ്റ്റ് മാനേജ്മെൻറാണ് ലൈസൻസുകൾ നൽകുന്നത്. ലാൻഡ് ഫില്ലിങ് ജോലികൾ തദ്വീർ കൈകാര്യം ചെയ്യുകയും മാലിന്യങ്ങൾ സംസ്കരിക്കുന്നതിനോ പുനരുപയോഗം ചെയ്യുന്നതിനോ ലഭിക്കുന്ന പുതിയ സൗകര്യങ്ങൾക്ക് ലൈസൻസ് നൽകുകയും ചെയ്യും. മെഡിക്കൽ, കെമിക്കൽ, ഇലക്ട്രോണിക് മാലിന്യ സംസ്കരണം, പുനരുപയോഗം, ഉപയോഗിച്ച എണ്ണകൾ, ടയറുകൾ, പേപ്പർ, പ്ലാസ്റ്റിക്, ഹരിത മാലിന്യങ്ങൾ എന്നിവയുടെ സംസ്കരണത്തിനുള്ള ലൈസൻസും അനുവദിക്കും.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.