സമൂഹ മാധ്യമങ്ങൾക്ക് സിനിമയുടെ ത്രില്ല് കളയാനാവില്ല -മമ്മൂട്ടി

ദുബൈ: കുറ്റാന്വേഷണ സിനിമകളുടെ സസ്പെൻസ് സോഷ്യൽ മീഡിയ തകർക്കുമോ എന്ന ആശങ്കകൾക്ക് അടിസ്ഥാനമില്ലെന്ന് നടൻ മമ്മൂട്ടി. ദുബൈയിൽ തന്റെ പുതിയ ചിത്രമായ 'സി.ബി.ഐ 5- ദി ബ്രെയിൻ' റിലീസിന് മുന്നോടിയായി മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. പണ്ടുകാലത്ത് നോട്ടീസിൽ കഥാസാരം വായിച്ച് തിയറ്ററിൽ പോയി സിനിമ കണ്ടിരുന്നവരാണ് നമ്മൾ. സിനിമ കഥ കേൾക്കാനുള്ളതല്ല, കാണാനുള്ളതാണ്. കഥകൾ പ്രചരിച്ചാലും സിനിമ കണ്ട് ആസ്വാദിക്കേണ്ടവർ തിയറ്ററിൽ എത്തും -മമ്മൂട്ടി പറഞ്ഞു.

മലയാളത്തിലെ ഏറ്റവും ബുദ്ധിമാനായ തിരക്കഥാകൃത്താണ് എസ്.എൻ. സ്വാമിയെന്ന് നടനും തിരക്കഥാകൃത്തുമായ രഞ്ജി പണിക്കർ പറഞ്ഞു. സി.ബി.ഐ സിനിമയുടെ ഭാഗമാകുന്നത് സ്വപ്നത്തിൽപോലും കരുതിയിരുന്നില്ലെന്ന് നടൻ രമേഷ് പിഷാരടി പറഞ്ഞു. സി.ബി.ഐ -5ന്‍റെ ഗൾഫിലെ വിതരണം ഏറ്റെടുത്ത ട്രൂത്ത് ഗ്ലോബൽ ഫിലിംസ് മേധാവി അബ്ദുസമദും വാർത്തസമ്മേളനത്തിൽ പങ്കെടുത്തു. തുടർന്ന് ബുർജ് ഖലീഫയിൽ സിനിമയുടെ ട്രെയിലർ പ്രദർശനവും നടന്നു.