തൊഴിലാളി സംഘട്ടനം: ഐ.ഒ.സി പ്ലാൻറ്​​ പ്രവർത്തനം മുടങ്ങി

തേഞ്ഞിപ്പലം: ചേളാരി ഇന്ത്യൻ ഓയൽ കോർപറേഷൻ പാചക വാതക ഫില്ലിങ് പ്ലാൻറിൽ ഇരുവിഭാഗം തൊഴിലാളികൾ തമ്മിലുണ്ടായ സംഘട്ടനത്തെ തുടർന്ന് വ്യാഴാഴ്ച പ്ലാൻറ് നാല് മണിക്കൂറോളം പ്രവർത്തനം മുടങ്ങി. കഴിഞ്ഞ ദിവസമാണ് തൊഴിലാളികൾ ഏറ്റുമുട്ടിയത്. തൊഴിലാളികളെ മർദിച്ചവർക്കെതിരെ ഐ.എൻ.ടി.യു.സി പ്രവർത്തകർ നൽകിയ പരാതിയിൽ നടപടിയെടുക്കാത്തതിനെ തുടർന്ന് വ്യാഴാഴ്ച ജോലി ബഹിഷ്കരിക്കുകയായിരുന്നു. 24 മണിക്കൂറിനുള്ളിൽ നടപടിയെടുക്കുമെന്ന് തേഞ്ഞിപ്പലം പൊലീസ് നൽകിയ ഉറപ്പിനെ തുടർന്ന് ബഹിഷ്കരണം അവസാനിപ്പിക്കുകയായിരുന്നു. ആറ് മണിക്ക് ആരംഭിക്കേണ്ട ആദ്യ ഷിഫ്റ്റ് 10 മണിക്ക് ശേഷമാണ് തുടങ്ങിയത്. പൊലീസ് വാക്ക് പാലിച്ചില്ലെങ്കിൽ സമരം ശക്തിപ്പെടുത്തുമെന്ന് ഐ.എൻ.ടി.യു.സി നേതാക്കൾ പറഞ്ഞു.