ദുരൂഹമായി തിരോധാനം; ചൈനീസ്​ മുൻ ഉപപ്രധാനമന്ത്രിക്കെതിരെ പീഡന ആരോപണം ഉന്നയിച്ച ടെന്നിസ്​ താരം എവിടെ?

ബെയ്​ജിങ്​: മൂന്ന്​ മാസത്തിനുള്ളിൽ ശീതകാല ഒളിമ്പിക്​സിന്​ ആതിഥേയത്വം വഹിക്കാനിരിക്കേ ചൈനക്ക്​ തലവേദനയായിരിക്കുകയാണ്​ ടെന്നിസ്​ താരം പെങ്​ ഷുവായിയുടെ തിരോധാനം. ചൈനയുടെ മുൻ ഉപപ്രധാനമന്ത്രി സാങ് ഗാവൊലിക്കെതിരെ ലൈംഗിക പീഡന ആരോപണം ഉന്നയിച്ചതിനു പിന്നാലെയാണ്​ വനിത വിഭാഗം ഡബ്​ൾസിലെ മുൻ ലോക ഒന്നാം നമ്പർ താരമായ പെങ്ങിനെ കാണാതായത്​.

ഇതിന്​ പിന്നാലെ പെങ്​ എവിടെയെന്ന ചോദ്യവുമായി 'വേർ ഈസ്​ പെങ്​ ഷുവായി' എന്ന ഹാഷ്​ടാഗ്​ സാമൂഹിക മാധ്യമങ്ങളിൽ ട്രെൻഡിങ്ങായി. പിന്നാലെ താരത്തെ കുറിച്ചുള്ള വിവരങ്ങൾ ആവശ്യപ്പെട്ട്​ യു.എസും ഐക്യരാഷ്​ട്ര സഭയും രംഗത്തെത്തി. ​കമ്യൂണിസ്​ പാർട്ടി നേതാവായ ഗാവെലിക്കെതിരായ ആരോപണങ്ങളിൽ സുതാര്യമായ അനേഷണം വേണമെന്നും യു.എൻ ആവശ്യപ്പെട്ടു.

ടെന്നിസ് താരങ്ങളായ നൊവാക് ദ്യോകോവിച്ച്, ആൻഡി മറെ, സെറീന വില്യംസ്, നവോമി ഒസാക, കിം ക്ലൈസ്റ്റേഴ്സ്, കോകോ ഗഫ്, സിമോണ ഹാലപ്പ്​, പെട്ര ക്വിറ്റോവ എന്നിവർ ക്യാമ്പയിനിൽ അണിചേർന്നു. പെങ്ങിന്‍റെ തിരോധാനത്തെ കുറിച്ച്​ അന്വേഷണം നടത്തിയില്ലെങ്കിൽ ചൈനയിൽ ടൂർണമെന്‍റുകൾ നടത്തില്ലെന്ന്​ വനിത ടെന്നിസ്​ ഫെഡറേഷൻ മുന്നറിയിപ്പ്​ നൽകി.

അതേസമയം, പെങ് ഷുവായിയുമായി ബന്ധപ്പെട്ട വിവാദങ്ങളെക്കുറിച്ച് അറിയില്ലെന്നാണ്​ ചൈനയുടെ പ്രതികരണം. അത്​ നയതന്ത്രപരമായ വിഷയമല്ലെന്നും സാഹചര്യത്തെക്കുറിച്ച് അറിയില്ലെന്നും സർക്കാർ വക്താവ് ഷാവോ ലിജിയാൻ മാധ്യമപ്രവർത്തകരോട് പറഞ്ഞു.

നവംബര്‍ രണ്ടിന്​​ ചൈനീസ് സാമൂഹ്യമാധ്യമായ വെയ്ബോ വഴിയാണ്​ പെങ്​ സാങ് ഗാവൊലിക്കെതിരെ പീഡന ആരോപണം ഉന്നയിച്ചത്. പോസ്റ്റ് ഉടന്‍ വെയ്‌ബോയില്‍ നിന്ന് ഡിലീറ്റ് ചെയ്യപ്പെട്ടു. വിവാദം വലിയ ചര്‍ച്ചയാവാതിരിക്കാന്‍ ഇന്‍റര്‍നെറ്റില്‍ കനത്ത സെന്‍സറിങ്​ നടത്തിയതായാണ്​ ആരോപണം.

അതേസമയം പെങ്​ സുരക്ഷിതയായിരിക്കുന്നുവെന്നും അടുത്ത്​ തന്നെ പെതുജന മധ്യത്തിൽ പ്രത്യക്ഷപ്പെടുമെന്നും സർക്കാർ അനുകൂല മാധ്യമപ്രവർത്തകൻ ഹു ഷിൻജിൻ അവകാശപ്പെട്ടു. ചൈനീസ്​ കമ്യൂണിസ്റ്റ്​ പാർട്ടിയുടെ ഔദ്യോഗിക പത്രമായ പീപ്പിൾസ്​ ഡെയ്​ലി പ്രസിദ്ധീകരിക്കുന്ന 'ദ ​ഗ്ലോബൽ ​ൈടംസ്'​ എഡിറ്റർ ഇൻ ചീഫാണ്​ ഷിൻജിൻ.

35കാരിയായ പെങ്​ വനിതകളുടെ ഡബിൾസിലെ മുൻ ലോക ഒന്നാം നമ്പറുകാരിയാണ്​. 2013ൽ വിംബിൾഡണും 2014ൽ ഫ്രഞ്ച്​ ഓപണും സ്വന്തമാക്കിയിട്ടുണ്ട്​. കരിയറിലാകെ രണ്ട് സിംഗിള്‍സ്​, 22 ഡബിള്‍സ് കിരീടങ്ങളുമുയര്‍ത്തിയ താരം 2018ൽ വിരമിക്കൽ പ്രഖ്യാപിച്ചു. മൂന്ന്​ ഒളിമ്പുക്​സുകളിൽ റാക്കറ്റേന്തിയ താരം 2010ലെ ഏഷ്യന്‍ ഗെയിംസില്‍ സ്വര്‍ണം നേടി.

അതേസമയം 'ഹാപ്പി വീക്കെൻഡ്​' ആശംസിച്ച്​ പെങ്​ വി ചാറ്റ്​ ആപ്പിൽ പങ്കു​െവച്ചെന്ന്​ അവകാശപ്പെടുന്ന ചിത്രങ്ങൾ ചൈനീസ്​ മാധ്യമപ്രവർത്തകനായ ഷെൻ ഷിവൈ ട്വിറ്ററിൽ പോസ്റ്റ്​ ചെയ്​തു. പൂച്ചകളെ പിടിച്ച്​ ചിരിച്ച്​ നിൽക്കുന്ന ചിത്രങ്ങളാണ്​ അതിൽ ചിലത്​. ചൈനീസ്​ പതാക, ട്രോഫികൾ, ​സർട്ടിഫിക്കറ്റുകൾ എന്നിവ പശ്ചാത്തലത്തിൽ​ കാണാം.