ഓൺലൈൻ നിരൂപകർ വാടകഗുണ്ടക​ളെ പോലെ പെരുമാറുന്നു -ലാൽ ജോസ്​

ദുബൈ: ഓൺലൈൻ രംഗത്ത്​ പ്രവർത്തിക്കുന്ന ചില നിരൂപകർ വാടകക്കൊലയാളികളെയും ഗുണ്ടകളെയും പോലെയാണ്​ പ്രവർത്തിക്കുന്നതെന്ന്​ സംവിധായകൻ ലാൽ ജോസ്​. 'സോളമന്‍റെ തേനീച്ചകൾ' എന്ന പുതിയ ചിത്രത്തിന്‍റെ ഗൾഫ് റിലീസിന് മുന്നോടിയായി ദുബൈയിൽ മാധ്യമങ്ങളോട്​ സംസാരിക്കുകയായിരുന്നു അദ്ദേഹം. പണം നലകുന്നവരുടെ സിനിമയെ കുറിച്ച്​ മാത്രമാണ്​ ഇത്തരം നിരൂപകർ നല്ലത് പറയുന്നത്​. മറ്റുള്ളവരെ തകർക്കാ​ൻ എല്ലാ തരത്തിലും മോശം അഭിപ്രായം പ്രചരിപ്പിക്കുകയും ചെയ്യും. എന്നാൽ സിനിമയെ ശരിയായ രീതിയിൽ വിലയിരുത്തുന്നവരും ഏറെയു​ണ്ട്​ -അദ്ദേഹം കൂട്ടിച്ചേർത്തു.

വിമർശകരെയും നിരൂപകരെയും മുന്നിൽ കണ്ട്​ സിനിമയെടുക്കേണ്ട സാഹചര്യമാണ്​ ഇന്നുള്ളത്​. മുൻ കാലങ്ങളിൽ ഇത്തരത്തിലായിരുന്നില്ല. ഓരോ വർഷവും 200ലേറെ സിനിമകൾ മലയാളത്തിലിറങ്ങുന്ന സാഹചര്യമിന്നുണ്ട്​. പുതുകാല സിനിമാ പ്രളയത്തിൽ പിടിച്ചു നിൽക്കാനാണ്​ വർഷങ്ങളുടെ അനുഭവ സമ്പത്തുള്ള തന്നെ പോലുള്ളവർ ശ്രമിക്കുന്നത്​. 'വിക്രമാദിത്യൻ' എന്ന തന്‍റെ ഹിറ്റ് ചിത്രത്തിന് രണ്ടാംഭാഗം പുറത്തിറക്കാൻ ആലോചിക്കുന്നുണ്ട്​ -ലാൽ ജോസ് വ്യക്​തമാക്കി. സ്റ്റാർ ഹോളിഡെയ്സ് ഫിലിംസാണ് 'സോളമന്‍റെ തേനീച്ചകൾ' ജി.സി.സിയിൽ വിതരണം ചെയ്യുന്നത്. നാട്ടിൽ നല്ല പ്രേക്ഷക പ്രതികരണവും നിരൂപക ശ്രദ്ധയും നേടിയ ഫാമിലി സസ്പെൻസ് ത്രില്ലർ പ്രവാസലോകത്തും സ്വീകരിക്കപ്പെടുമെന്ന്​ പ്രതീക്ഷിക്കുന്നതായി ചിത്രത്തിൽ പ്രധാനകഥാപാത്രമായി എത്തുന്ന ദർശന, വിൻസി, ശംഭു, ആഡിസ് എന്നീ പുതുമുഖ താരങ്ങളും പ്രതീക്ഷ പ്രകടിപ്പിച്ചു.