പ്രതിരോധ കോട്ടയൊരുക്കി സ്വീഡൻ; സമനിലപ്പൂട്ടിൽ കുരുങ്ങി സ്​പെയിൻ

സെവിയ്യ: യൂറോ കപ്പ്​ ഗ്രൂപ്​ ഇയിലെ ഉഗ്ര പോരാട്ടത്തിൽ കരുത്തരായ സ്​പെയ്​നിനെ ഗോൾ രഹിത സമനിലയിൽ തളച്ച്​ സ്വീഡൻ. പന്തടക്കത്തിലും പാസിലും മുന്നിട്ടുനിൽക്കുകയൂം പലവട്ടം ഗോളിനരികെ എത്തുകയും ചെയ്​തിട്ടും സ്വീഡിഷ്​ പ്രതിരോധ കോട്ടപൊളിച്ച്​ വലകുലുക്കാൻ സ്​പെയ്നിനായില്ല. നിരവധി ഷോട്ടുകൾ സേവ്​ ചെയ്​ത സ്വീഡൻ ഗോളി റോബിൻ ഒൽസനാണ്​ മത്സരത്തിലെ ഹീറോ.

മൊറാറ്റയെ ഏക സ്​ട്രൈക്കറാക്കിയാണ്​ സ്​പാനിഷ്​ കോച്​ ലൂയിസ്​ എൻറിക്വെ സ്വീഡനെതിരെ ടീമിനെ ഒരുക്കിയത്​. കുറുകിയ പാസുമായി തനതു ശൈലിയിൽ കളി നിയന്ത്രണം ഏറ്റെടുത്ത്​ മുന്നേറിയെങ്കിലും സ്​പാനിഷ്​ പടയോട്ടങ്ങൾ ഗോൾവരക്കിപ്പുറത്ത്​ അവസാനിച്ചു. ഇരുപകുതിയിലും നിരവധി അവസരങ്ങളാണ്​ സ്​പെയ്​നിന്​ ലഭിച്ചത്​. ഒന്നിനു പിറകെ ഒന്നായി അവസരങ്ങൾ മുന്നേറ്റനിര നശിപ്പിച്ചു. അൽവാരോ മൊറാറ്റയാണ്​ അവസരം തുലക്കുന്നതിൽ മുന്നിട്ടുനിന്നത്​. മറുവശത്ത്​ സ്വീഡൻ കൗണ്ടർ അറ്റാക്കിലാണ്​ ശ്രദ്ധയൂന്നിയത്​. ഇരുപകുതിയും ഗോളുറപ്പിച്ച ഒന്നുരണ്ടു അവസരം നിർഭാഗ്യം കൂട്ടുകൂടിയപ്പോൾ ലക്ഷ്യത്തിലെത്തിയതുമില്ല. ആദ്യ പകുതി അലക്​സാണ്ടർ ഇസാക്കി​ന്‍റെ ഷോട്ട്​ പോസ്​റ്റിൽ തട്ടിമടങ്ങിയത്​ സ്വീഡ​ന്‍റെ നിർഭാഗ്യത്തി​ന്‍റെ അടയാളമായി. രണ്ടാം പകുതി പാബ്ലോ സറാബിയ, തിയാഗോ അൽകൻറാര, ജെറാഡ്​ മൊറീന്യോ എന്നിവരെയെല്ലാം കോച്ച്​ എൻറിക്വെ ഇറക്കിനോക്കിയെങ്കിലും ഫലം കണ്ടില്ല.

കോവിഡിനു പിറകെ ടീമിലും പ്രശ്​നങ്ങൾ നിലനിൽക്കുന്ന സ്​പാനിഷ്​ ടീമിന്​ യൂറോ ഫലം നാട്ടിലും പ്രശ്​നങ്ങൾ സൃഷ്​ടിക്കും. ടീം തെരഞ്ഞെടുപ്പുമായി ബന്ധപ്പെട്ട്​ അസ്വാരസ്യങ്ങൾ അവസാനിക്കാതെയായിരുന്നു സ്​പാനിഷ്​ അർമഡ ബൂട്ടുകെട്ടിയത്​. കോവിഡ്​ ബാധിതരായി സെർജിയോ ബുസ്​കെറ്റ്​സും ഡീഗോ ലോറെന്‍റെയും പുറത്തിരിക്കുകയും റയൽ നിരയിലെ സെർജിയോ റാമോസ്​ ഉൾ​െപടെ പ്രമുഖരെ വിളിക്കാതിരിക്കുകയും ചെയ്​താണ്​ ഇത്തവണ സ്​പെയിൻ യൂറോ ചാമ്പ്യൻഷിപ്പ്​ കളിക്കാൻ വിമാനം കയറിയത്​. ഇതോടെ ടീമിനെതിരെ രാജ്യവ്യാപകമായി പ്രതിഷേധം ശക്​തമായിരുന്നു​. ബാഴ്​സ കൗമാര താരം പെഡ്രി നയിച്ച ആക്രമണങ്ങൾ പ്രതീക്ഷ നൽകിയ കളിയിൽ പക്ഷേ, ലക്ഷ്യം കാണുന്നതിൽ ടീം പരാജയമാകുകയും ചെയ്​തു.

സമനിലയോടെ ​െസ്ലാവാക്യക്ക്​ ഗ്രൂപ്​ ഇയിൽ ആദ്യ നേട്ടമാകും. പോളണ്ടിനെതിരെ ടീം 2-1ന്​ ജയം നേടിയിരുന്നു.

സ്​പെയിനിന്​ ലെവൻഡോവ്​സ്​കിയുടെ പോളണ്ടാണ്​ അടുത്ത എതിരാളി. സ്വീഡന്​ ​െസ്ലാവാക്യയും. കളി വെള്ളിയാഴ്ച.