തുടരുന്ന ദുരന്തങ്ങൾ; ലെസ്റ്ററിന്​ മുമ്പിൽ തരിപ്പണമായി​ ലിവർപൂൾ

ലണ്ടൻ: ഇംഗ്ലീഷ്​ പ്രീമിയർ ലീഗിൽ ലിവർപൂളിന്‍റെ ദുരന്തകഥ തുടരുന്നു. വിജയം മാത്രം ലക്ഷ്യമിട്ട്​ എതിരാളികളുടെ തട്ടകത്തിലിറങ്ങിയ നിലവിലെ ചാംപ്യൻമാരെ ലെസ്​റ്റർ സിറ്റി ഒന്നിനെതിരെ മൂന്നുഗോളുകൾക്കാണ്​ തരിപ്പണമാക്കിയത്​. മത്സരത്തിൽ 78 മിനുറ്റുവരെ മുന്നിട്ട ശേഷമായിരുന്നു ലിവർപൂളിന്‍റെ ദാരുണപതനം. ​െബ്രെറ്റണോട്​ ഏകപക്ഷീയമായ ഗോളിനുംആൻഫീൽഡിൽ മാഞ്ചസ്റ്റർ സിറ്റിയോട്​ 4-1നും പരാജയപ്പെട്ട ലിവർപൂളിന്‍റെ തുടർച്ചയായ മൂന്നാംതോൽവിയാണിത്​. മാഞ്ചസ്റ്റർ സിറ്റിക്കെതിരായ മത്സരത്തിൽ വമ്പൻ മണ്ടത്തരങ്ങൾ വരുത്തിയ ഗോൾകീപ്പർ അലിസൺ ബെക്കർ ഇക്കുറിയും പിഴവുകൾ വരുത്തിയത്​ ലിവർപൂളിന്​ വിനയായി.

ആക്രമിച്ചുകളിച്ച ലിവർപൂളിന്​ മുമ്പിൽ പ്രതിരോധക്കോട്ടയുണ്ടാക്കുകയും അതിവേഗം എതിർഗോൾമുഖത്തേക്ക്​ ആക്രമണം നടത്തുകയുമായിരുന്നു ലെസ്റ്ററിന്‍റെ പദ്ധതി​. പന്തടക്കത്തിലും അവസരങ്ങൾ സൃഷ്​ടിക്കുന്നതിലും മുന്നിട്ടുനിന്ന ലിവർപൂൾ 67ാം മിനുറ്റിൽ മുഹമ്മദ്​ സലാഹിലൂടെയാണ്​ മുന്നിലെത്തിയത്​. ഫിർമീന്യോ തന്ത്രപരമായി പിറകിലേക്ക്​ മറിച്ചുനൽകിയ പന്ത്​ സലാഹ്​ മനോഹരമായി വലയിലെത്തിക്കുകയായിരുന്നു.

78ാം മിനുറ്റിൽ പെനൽറ്റി ബോക്​സിനോട്​ ചേർന്ന്​ വലതുമൂലയിൽ നിന്നും ലഭിച്ച ഫ്രീകിക്ക്​ നേരിട്ട്​ വലയിലെത്തിച്ച്​ ജെയിംസ്​ മാഡിസണാണ്​ ലെസ്റ്ററിനെ മുന്നിലെത്തിച്ചത്​. ഏതാനും മിനുറ്റുകൾക്ക്​ ശേഷം ലിവർപൂളിനെ ഞെട്ടിച്ച്​ ലെസ്റ്റർ ലീഡുയർത്തി. ലിവർപൂൾ ഗോൾകീപ്പർ അലിസണും പ്രതിരോധനിര താരം ​കബാക്കും തമ്മിലുള്ള പരസ്​പര ധാരണയില്ലായ്​മയിൽ നിന്നും വീണുകിട്ടിയ പന്ത്​ ജാമി വാർഡി വലയിലെത്തിക്കുകയായിരുന്നു. 85ാം മിനുറ്റിൽ അതിവേഗ മുന്നേറ്റത്തിനൊടുവിൽ ലിവർപൂൾ പോസ്റ്റിലേക്ക്​ നിറയൊഴിച്ച്​ ഹാർവി ബേൺസ്​ ചെങ്കുപ്പായക്കാരുടെ പതനം പൂർത്തിയാക്കി.

വിജയത്തോടെ 24 ​കളികളിൽ നിന്നും 46 പോയന്‍റുമായി ലെസ്റ്റർ സിറ്റി രണ്ടാംസ്ഥാനത്തേക്ക്​ കയറി. 24 കളികളിൽ നിന്നും 40 പോയന്‍റുള്ള ലിവർപൂൾ നിലവിൽ നാലാമതാണ്​.