ഒടുവിൽ ആ സെഞ്ച്വറി പിറന്നു; 1020 ദിവസങ്ങൾക്കുശേഷം...

ന്യൂഡൽഹി: വിമർശനങ്ങളും കുത്തുവാക്കുകളും നിറഞ്ഞ ആയിരത്തിലേറെ ദിനങ്ങൾക്കൊടുവിൽ ആ ബാറ്റിൽനിന്ന് സെഞ്ച്വറിത്തിളക്കത്തിലേക്ക് റണ്ണുകൾ ഒഴുകിപ്പരന്നു. ഫോമിലേക്ക് തിരിച്ചുവരുന്നുവെന്ന് സൂചനകൾ നൽകിയ ഏഷ്യാകപ്പ് ക്രിക്കറ്റ് ടൂർണമെന്റി​ലെ ഇന്ത്യയുടെ അവസാന മത്സരത്തിൽ വിരാട് കോഹ്‍ലി വിശ്വരൂപം പുറത്തെടുത്തു. അഫ്ഗാനിസ്ഥാനെതിരെ സൂപ്പർ ഫോറിലെ അവസാന മത്സരത്തിൽ പുറത്താകാതെ 122 റൺസെടുത്ത് ദുബൈ ക്രിക്കറ്റ് സ്റ്റേഡിയത്തിന്റെ നടുത്തളത്തിൽ വിരാട് കത്തിക്കയറിയപ്പോൾ ആരാധകർക്ക് ആ​ഹ്ലാദിക്കാനും ആഘോഷിക്കാനും അതേറെ വക നൽകി.

സമീപകാലത്ത് ഇന്ത്യൻ ക്രിക്കറ്റ് കണ്ട ഏറ്റവും പ്രതിഭാധനനായ ബാറ്റ്സ്മാനാണ് കോഹ്‍ലി. സെഞ്ച്വറികളും അർധ സെഞ്ച്വറികളും അടിച്ചുകൂട്ടുന്നത് പതിവായി മാറിയ ആ കരിയറിൽ പക്ഷേ, മൂന്നു വർഷമായി കഷ്ടകാലമായിരുന്നു. ശതകങ്ങളിലേക്ക് അനായാസം കത്തിക്കയറിയ ഡൽഹിക്കാരന്റെ കുതിപ്പുകൾ സ്വിച്ചിട്ടെന്നപോലെ നിന്നു.

2019 നവംബർ 23ന് ബംഗ്ലാദേശിനെതിരെ കൊൽക്കത്തയിൽനടന്ന ഡേ-നൈറ്റ് ടെസ്റ്റിൽ സെഞ്ച്വറി നേടിയതിനുശേഷം രാജ്യാന്തര ക്രിക്കറ്റിൽ മൂന്നക്കം കടക്കാൻ കോഹ്‍ലിക്ക് സാധിച്ചിരുന്നില്ല. 70 അന്താരാഷ്ട്ര സെഞ്ച്വറി​കൾ നേടിയ താരമാണ് അടുത്തതിലേക്ക് കാലങ്ങളായി കാത്തിരുന്നത്. ഒടുവിൽ 1020 ദിവസങ്ങളുടെ കാത്തിരിപ്പിന് ഒടുവിൽ വീണ്ടും വിരാട് വീരോചിതമായിത്തന്നെ നൂറു തികച്ചു, ഇന്ത്യ ഫൈനൽ കാണാതെ പുറത്തായ ശേഷമാണെങ്കിൽപോലും.

അഫ്ഗാനെതിരെ 53 പന്തിൽ നൂറുകടന്ന ​കോഹ്‍ലി 50ൽനിന്ന് 100ലെത്താൻ നേരിട്ടത് 21 പന്തു മാത്രം. തകർപ്പൻ ഫോമിൽ നിറഞ്ഞാടുന്ന ​പഴയ മികവോടെ തന്നെ ആ 34കാരൻ ഉജ്ജ്വലമായി മൈതാനം നിറഞ്ഞു. സ്ട്രോക്കുകളുടെ വൈവിധ്യങ്ങളാൽ ആ ഇന്നിങ്സ് പൂത്തുതളിർത്തു. ഒരു ബൗളറോടും ദയാദാക്ഷിണ്യം കാട്ടിയില്ല. മൈതാനത്തിന്റെ മുഴുവൻ ഭാഗങ്ങളിലൂടെയും ബാറ്റിന്റെ പ്രഹരശേഷിയറിഞ്ഞ പന്ത് അതിർവര തേടിപ്പറന്നു. നാളുകൾക്ക് ശേഷം പഴയ കോഹ്‍ലി അത്യുജ്വലമായി പുനഃരവതരിക്കുകയായിരുന്നു.