'ഷഹീനും ഞങ്ങളും വ്യത്യസ്​ത ഗോത്രങ്ങളിൽ പെടുന്നവർ​'; മകളുടെ വിവാഹക്കാര്യത്തിൽ മനസ്​ തുറന്ന്​ ഷാഹിദ്​ അഫ്രീദി

ഇസ്​ലാമാബാദ്​: പാകിസ്​താൻ ക്രിക്കറ്റിലെ പുതിയ പേസ്​ സെൻസേഷൻ ഷഹീൻ അഫ്രീദി ത​െൻറ മൂത്ത മകൾ അഖ്​സയെ വിവാഹം ചെയ്യുന്ന വിവരം മുൻ ഓൾറൗണ്ടർ ഷാഹിദ്​ അഫ്രീദി സ്​ഥിരീകരിച്ചു. ശനിയാഴാഴ്​ച ഒരു ടി.വി ചാനലിന്​ നൽകിയ അഭിമുഖത്തിലാണ്​ ഷഹീൻ ത​െൻറ മരുമകനാകാൻ പോകുന്ന വിവരം ഷാഹിദ് അഫ്രീദി ആദ്യമായി ​പൊതുവേദിയിൽ തുറന്നുപറഞ്ഞത്​.

അഖ്​സയും ഷഹീനും തമ്മിൽ മുൻപരിചയം ഒന്നും തന്നെയില്ലെന്നും പേസറുടെ കുടുംബം വിവാഹാലോചനയുമായി മുന്നോട്ടു വരികയായിരുന്നു​െവന്നും അഫ്രീദി പറഞ്ഞു. 'ഞങ്ങൾക്ക് അഫ്രീദികൾക്ക് എട്ട് ഗോത്രങ്ങളുണ്ട്. ഷഹീനും ഞങ്ങളും വ്യത്യസ്​ത ഗോത്രങ്ങളിൽ പെടുന്നവരാണ്​'- ഷാഹിദ്​ ജിയോ ടി.വിയോട്​ പറഞ്ഞു.

നേരത്തെ ഷഹീനി​െൻറ കുടുംബത്തി​െൻറ വിവാഹാലോചന വന്ന കാര്യം ഷാഹിദ്​ ട്വിറ്ററിലൂടെ സ്​ഥിരീകരിച്ചിരുന്നു. ഡോക്​ടറാകാൻ ഒരുങ്ങുന്ന അഖ്​സയുടെ പഠന കാര്യങ്ങൾ കൂടി പരിഗണിച്ചാകും വിവാഹം.

അഖ്​സ, അൻഷ, അജ്​വ, അസ്​മര, അർവ എന്ന്​ പേരായ അഞ്ച്​ പെൺമക്കളാണ്​ ഷാഹിദിനുള്ളത്​.

അന്താരാഷ്​ട്ര ​ക്രിക്കറ്റിൽ നിന്ന്​ വിരമിച്ചുവെങ്കിലും പാകിസ്താൻ സൂപ്പർ ലീഗിൽ സജീവമാണ്​ താരം. പി.എസ്​.എല്ലിൽ മുൾത്താൻ സുൽത്താൻസി​െൻറ താരമായ ഷാഹിദും ഭാവി മരുമകൻ ഷഹീ​െൻറ ലാഹോർ ഖലന്ദേഴ്​സും മുഖാമുഖം വരാറുണ്ട്​.