കോൺഗ്രസിന്‍റെ വിവേകം

അയോധ്യയിൽ ബാബരി മസ്​ജിദ്​ തകർത്ത സ്ഥലത്ത്​ നിർമിക്കുന്ന രാമക്ഷേത്രത്തിന്‍റെ ഉദ്​ഘാടനച്ചടങ്ങിനുള്ള ക്ഷണം ഇന്ത്യൻ നാഷനൽ കോൺഗ്രസ്​ നിരസിച്ചിരിക്കുന്നു. ജനുവരി 22ന്​ നടക്കുന്ന വിഗ്രഹപ്രതിഷ്ഠ ചടങ്ങിൽ പ​ങ്കെടുക്കാൻ രാജ്യസഭയിലെ പ്രതിപക്ഷനേതാവുകൂടിയായ കോൺഗ്രസ്​ പ്രസിഡന്‍റ്​ മല്ലികാർജുൻ ഖാർഗെ, പാർലമെന്‍ററി പാർട്ടി അധ്യക്ഷ സോണിയ ഗാന്ധി, ലോക്സഭയിലെ കോൺഗ്രസ്​ കക്ഷിനേതാവ്​ അധീർ രഞ്​ജൻ ചൗധരി എന്നിവർക്ക്​ ക്ഷണം ലഭിച്ചെന്നും വിശ്വാസത്തെ രാഷ്ട്രീയതാൽപര്യങ്ങൾക്കു ചൂഷണംചെയ്യാനുള്ള ആർ.എസ്​.എസ്​/ബി.ജെ.പി പരിപാടിയായതിനാൽ ക്ഷണം ബഹുമാനപുരസ്സരം നിരസിക്കുകയാണെന്നും കോൺഗ്രസ്​ ജനറൽ സെക്രട്ടറി ജയ്​റാം രമേശ്​ ബുധനാഴ്ച വാർത്തക്കുറിപ്പിൽ വ്യക്തമാക്കി. ‘‘മതവിശ്വാസം വ്യക്തിഗതമായ കാര്യമാണ്​. എന്നാൽ, കാ​ലമേറെയായി അയോധ്യയിൽ ക്ഷേത്രമെന്ന രാഷ്ട്രീയ പരിപാടിയുമായി നടക്കുകയാണ്​ ആർ.എസ്​.എസും ബി.ജെ.പിയും. പണിതീരാത്ത ക്ഷേത്രം ബി.ജെ.പി-ആർ.​എസ്​.എസ്​ നേതാക്കൾ ഉദ്​ഘാടനം​ചെയ്യുന്നത്​ രാഷ്ട്രീയ നേട്ടത്തിനുവേണ്ടിയാണ്​ എന്നു വ്യക്തമാണ്​.

2019ലെ സുപ്രീംകോടതി വിധിയെ മാനിച്ചും ശ്രീരാമനെ ആദരിക്കുന്ന ദശലക്ഷങ്ങളുടെ വികാരം ഗൗനിച്ചും’’ ചടങ്ങിനുള്ള ക്ഷണം നിരസിക്കുകയാണെന്ന്​ കോൺഗ്രസ്​ ​വി​ശദീകരിച്ചു. ഇതോടെ സംഘ്​പരിവാറിന്‍റെ അജണ്ടക്ക്​ വഴങ്ങേണ്ടതില്ലെന്ന ഉറച്ച തീരുമാനം അസന്ദിഗ്​ധമായി പ്രഖ്യാപിച്ചിരിക്കുകയാണ്​ പാർട്ടി. തികച്ചും മതാനുഷ്ഠാനമായി നട​ക്കേണ്ട പരിപാടിയെ രാഷ്ട്രീയവത്​കരിച്ച് ​ലോക്സഭ തെരഞ്ഞെടുപ്പിലേക്കു മുതൽക്കൂട്ടാനാണ്​ സംഘ്​പരിവാർ ശ്രമിക്കുന്നത്​. ക്ഷേത്ര നിർമാണസമിതിയുടെ ക്ഷണക്കത്ത്​ നാടൊട്ടുക്ക്​ വിതരണംചെയ്യുന്നത്​ ആർ.എസ്​.എസ്​/ബി.ജെ.പി നേതൃത്വം ചടങ്ങിൽ പങ്കുകൊള്ളുന്നതും മാറിനിൽക്കുന്നതും മതനിന്ദ വിട്ട്​ രാഷ്ട്രനിന്ദ വരെയായി ചിത്രീകരിക്കാനുള്ള ശ്രമങ്ങളും തുടങ്ങിയിട്ടുണ്ട്​. ഹിന്ദുമതാനുയായികളുടെ വിശ്വാസപരമായ കാര്യമായി രാമക്ഷേത്രത്തെ എടുത്തുകാട്ടുന്നവർതന്നെ ഇതര മതവിഭാഗങ്ങളുടെ ആരാധനാലയങ്ങളിലും ജയ്​ വിളികൾ അടിച്ചേൽപിക്കുന്നിടത്തോളമെത്തിയിട്ടുണ്ട്​ ഉദ്​ഘാടനത്തിന്‍റെ പേരിലുള്ള ഉന്മാദം. ഇത്തരം ചതുരുപായങ്ങൾ ചില്ലറ ആശയക്കുഴപ്പങ്ങളും സൃഷ്ടിച്ചിട്ടുണ്ട്​. കോൺഗ്രസിൽനിന്നുതന്നെ ചില നേതാക്കൾ ക്ഷണം സ്വീകരിക്കാനുള്ള സന്നദ്ധത പ്രകടിപ്പിച്ചിരുന്നു. ഈ സാഹചര്യത്തിൽ സംഘ്​പരിവാറിന്‍റെ ഗൂഢതാൽപര്യങ്ങളെ തുറന്നെതിർക്കാനുള്ള കോൺഗ്രസിന്‍റെ തീരുമാനം സ്വാഗതാർഹമാണ്​.

അയോധ്യയിലെ ബാബരി മസ്​ജിദിൽ പാതിരാവിൽ രാമവിഗ്രഹം പ്രതിഷ്ഠിച്ച്​ ആരംഭിച്ച ഒരു വിവാദം 1992 ഡിസംബർ ആറിന്​ ഹിന്ദുത്വ കർസേവകർ മസ്​ജിദ്​ തകർത്ത സംഭവത്തോടെ ഇന്ത്യ എന്ന രാഷ്ട്രത്തെതന്നെ സാമുദായികമായി നെടുകെ പിളർത്തിയ ദുരന്തമായി കലാശിച്ചു. മസ്​ജിദ്​ ​പൊളിക്കില്ല എന്നും അത് കൈവിട്ടുപോയപ്പോൾ പള്ളി പൊളിച്ചിടത്തു പുനർനിർമിക്കുമെന്നും ആണയിട്ടിരുന്നതാണ് അന്നത്തെ കോ​ൺഗ്രസ്​ നേതൃത്വത്തിലുള്ള കേന്ദ്ര സർക്കാർ. പള്ളിപൊളിച്ച അതിക്രമികൾക്കെതിരെ അറസ്റ്റും അന്വേഷണവും കുറ്റപത്രവും വിചാരണയു​മൊക്കെ മുറക്കു നടന്നു. ഒടുവിൽ ആരും ശിക്ഷിക്കപ്പെടാതെ കേസ്​ നിർവീര്യമായി അന്തരീക്ഷത്തിൽ ലയിച്ചു. ​മസ്​ജിദ്​-മന്ദിർ വിവാദം ഒരു ഭൂവുടമ തർക്കമായി കോടതിയി​ലെത്തി.

കക്ഷികൾക്കിടയിൽ ഭൂമി വിഭജിക്കാമെന്നായി ആദ്യ കോടതിനിർദേശം. ഒടുവിൽ രാജ്യത്തെ പരമോന്നത നീതിപീഠം തർക്കത്തിൽ വിധി പറഞ്ഞു. ബാബരി മസ്​ജിദിന്‍റെ നിലനിൽപ്​ അംഗീകരിച്ച സുപ്രീംകോടതി അത്​ തകർത്തതിലെ അന്യായം ചൂണ്ടിക്കാട്ടി. ഒടുവിൽ ചീഫ്​ ജസ്റ്റിസ്​ ഡി.വൈ. ചന്ദ്രചൂഡ്​ പിന്നീട് വെളിപ്പെടുത്തിയതുപോലെ ‘സംഘർഷങ്ങളുടെ നീണ്ട ചരിത്രം ഓർമിച്ചു’ കോടതി 2.77 ഏക്കർ തർക്കഭൂമി അനുബന്ധ ഭൂഭാഗങ്ങൾ സഹിതം രാമവിഗ്രഹത്തിന്‍റെ ഉടമസ്ഥതയിലേക്കു തീറെഴുതി തീർപ്പാക്കി. അവിടെയാണ്​ പുതിയ രാമക്ഷേത്രമുയരുന്നത്​. ബാബരി മസ്​ജിദ്​-രാമജന്മഭൂമി തർക്കത്തിലുടനീളം മഠാധിപതികളെയും സന്യാസി സംഘടനകളെയും പുരോഹിതവേദിക​ളെയും മുന്നിൽ നിർത്തി രാഷ്ട്രീയനേട്ടം കൊയ്യാനുള്ള ശ്രമമായിരുന്നു​ സംഘ്​പരിവാറിന്‍റേത്​.

ഒടുവിൽ ക്ഷേത്രനിർമാണവും ഹൈന്ദവസന്യാസികളടങ്ങുന്ന സമിതി കൈയാളുമ്പോഴും കാര്യങ്ങൾ നിയന്ത്രിക്കുന്നത്​ അവർതന്നെയാണ്​. അതുകൊണ്ടാണ്​ ക്ഷേ​​ത്രത്തിന്‍റെ ശിലാസ്ഥാപനത്തിന് മുതൽ പ്രതിഷ്ഠ ചടങ്ങിന്​ വരെ പ്രധാനമന്ത്രി ഉദ്​ഘാടകനാവുന്നത്. പണിതീരാത്ത ക്ഷേ​ത്രത്തിലെ രാമവിഗ്രഹത്തിന്‍റെ പ്രാണപ്രതിഷ്ഠ ആചാരലംഘനമാണെന്നും മതപുരോഹിതന്മാരാണ്​, രാഷ്ട്രീയക്കാരല്ല ക്ഷേത്രചടങ്ങുകൾ നടത്തേണ്ടതെന്നും പറഞ്ഞ് നാലു ശങ്കരാചാര്യന്മാർ പരിപാടിക്കെത്തില്ല എന്നറിയിച്ചത്​ ക്ഷേത്രോദ്​ഘാടനം മതപരമായ വിശുദ്ധകർമമായല്ല, രാഷ്ട്രീയ പരിപാടിയായാണ്​ കലാശിക്കുകയെന്ന്​ ഹിന്ദുസമൂഹവും അവരുടെ നേതൃത്വവും തിരിച്ചറിഞ്ഞ് തിരസ്കരിക്കുന്നു എന്നതിന്‍റെ തെളിവാണ്​.

വിഷയത്തിലെ മതവും രാഷ്ട്രീയവും തിരിച്ചറിയാതെയോ, അതു കൂട്ടിക്കലർത്തി രാഷ്ട്രീയനേട്ടം കൊയ്യാനുള്ള മോഹം കൊണ്ടോ കോൺഗ്രസിൽ ഒരു വിഭാഗവും ഈ വിവാദത്തിൽ പലപ്പോഴും വലതുവലയിൽ വീണിട്ടുണ്ട്​. അത്തരക്കാരെ ഒതുക്കിനിർത്താനായ കാലത്ത് മസ്​ജിദ്​-മന്ദിർ തർക്കം മൂർച്ഛിക്കാതെ നോക്കാൻ കോൺഗ്രസിനും അവർ നയിച്ച ഭരണകൂടത്തിനും കഴിഞ്ഞിട്ടുണ്ട്​. മതാവേശംപൂണ്ട വലതുവാദികൾ പിടിമുറുക്കിയപ്പോഴോ, കാര്യങ്ങൾ കൈവിട്ടുപോയിട്ടുമുണ്ട്​.

രാജ്യഭരണം കോൺഗ്രസിന്‍റെ കൈയെത്താദൂരത്തേക്ക്​ പിടിവിട്ടുപോയതിൽ അയോധ്യയിലെ വീഴ്​ചക്കുള്ള പങ്ക്​ പാർട്ടിചരിത്രത്തിന്‍റെതന്നെ ഭാഗമാണ്​. ഇപ്പോൾ കോടതി അനുമതി വാങ്ങി പണിയുന്ന ക്ഷേത്രത്തിന്‍റെ ഉദ്​ഘാടനത്തെയും മതാത്മക ദേശീയതയുടെ ആഘോഷമാക്കി മാറ്റാനുള്ള ഹിന്ദുത്വ അജണ്ട കോൺഗ്രസ്​ അടക്കമുള്ള രാഷ്ട്രീയ കക്ഷികളിൽ ആശയക്കുഴപ്പം സൃഷ്ടിക്കുമ്പോൾ അതവസാനിപ്പിച്ചുകൊണ്ടുള്ള കോൺഗ്രസിന്‍റെ തീരുമാനം രാജ്യത്തെ മതനിരപേക്ഷ സംസ്കാരത്തിന്​ കൂടുതൽ മിഴിവ് പകരുമെന്ന കാര്യത്തിൽ സംശയമില്ല.