12:30:26
24 Oct 2014
Friday
Facebook
Google Plus
Twitter
Rssfeed

കര്‍ണാടകയില്‍ അനധികൃത ഖനനക്കേസുകള്‍ സി.ബി.ഐ അന്വേഷിച്ചേക്കും

ബംഗളൂരു: കര്‍ണാടകയിലെ അനധികൃത ഖനനക്കേസുകള്‍ സി.ബി.ഐ അന്വേഷിച്ചേക്കും. അനധികൃത ഖനനവുമായി ബന്ധപ്പെട്ട് നടപടിയെടുക്കുന്നതിന് ഉന്നത ഉദ്യോഗസ്ഥരുടെ യോഗം ഉടന്‍ വിളിക്കുമെന്ന് കര്‍ണാടക മുഖ്യമന്ത്രി സിദ്ധരാമയ്യ പറഞ്ഞു. ഖനനക്കേസുകളില്‍ സി.ബി.ഐ അന്വേഷണം നടത്തണമെന്ന കാര്യത്തിലും വിചാരണക്ക് പ്രത്യേക കോടതികള്‍ സ്ഥാപിക്കുന്നതും സംബന്ധിച്ച് യോഗത്തില്‍ തീരുമാനമെടുക്കുമെന്നും അദ്ദേഹം വ്യക്തമാക്കി. അനധികൃത ഖനനത്തിലൂടെ സര്‍ക്കാറിന് 22,000 കോടിയുടെ നഷ്ടമാണുണ്ടായത്. ഈ നഷ്ടം തിരിച്ചുപിടിക്കാനുള്ള നടപടി സ്വീകരിക്കും. അനധികൃത ഖനനം സംബന്ധിച്ച് ലോകായുക്ത നല്‍കിയ റിപ്പോര്‍ട്ടില്‍ പരാമര്‍ശിക്കപ്പെട്ടവര്‍ക്കെതിരെ സര്‍ക്കാര്‍ ഇതിനകം നടപടി തുടങ്ങിക്കഴിഞ്ഞെന്നും അദ്ദേഹം അറിയിച്ചു. അനധികൃത ഖനനക്കേസില്‍ ആരോപിതരായ മുന്‍ മുഖ്യമന്ത്രിമാരായ ബി.എസ്. യെദിയൂരപ്പ, എച്ച്.ഡി. കുമാരസ്വാമി, ബെല്ലാരിയിലെ റെഡ്ഢി സഹോദരന്മാര്‍, നിരവധി കോണ്‍ഗ്രസ് നേതാക്കള്‍, നൂറിലധികം ഖനന കമ്പനികള്‍, 785 സര്‍ക്കാര്‍ ഉദ്യോഗസ്ഥര്‍ എന്നിവര്‍ക്കെതിരെ സി.ബി.ഐ അന്വേഷണം നടത്തണമെന്ന് മുതിര്‍ന്ന കോണ്‍ഗ്രസ് നേതാക്കളായ വി.എസ്. ഉഗ്രപ്പ, കെ.സി. കൊണ്ഡയ്യ തുടങ്ങിയവര്‍ മുഖ്യമന്ത്രിയോട് ആവശ്യപ്പെട്ടിരുന്നു. അതേസമയം, ബംഗളൂരു റൂറല്‍, മാണ്ഡ്യ ലോക്സഭാ മണ്ഡലങ്ങളില്‍ ഉപതെരഞ്ഞെടുപ്പ് നടക്കാനിരിക്കെ മുഖ്യമന്ത്രി നടത്തിയ പരാമര്‍ശം രാഷ്ട്രീയ നീക്കമാണെന്നും റിപ്പോര്‍ട്ടുണ്ട്. ഇരു മണ്ഡലത്തിലും ജനതാദള്‍ സെക്കുലര്‍-ബി.ജെ.പി-കെ.ജെ.പി കൂട്ടുകെട്ടാണ് കോണ്‍ഗ്രസിനെതിരെ മത്സരിക്കുന്നത്.


നിങ്ങളുടെ അഭിപ്രായങ്ങള്‍

ഇവിടെ കൊടുക്കുന്ന അഭിപ്രായങ്ങള്‍ മാധ്യമത്തിന്റെ അഭിപ്രായമാവണമെന്നില്ല.
Please Note:
അഭിപ്രായങ്ങള്‍ മലയാളത്തിലോ ഇംഗ്ലീഷിലോ എഴുതുക. മംഗ്ലീഷില്‍ എഴുതുന്ന അഭിപ്രായങ്ങള്‍ പോസ്റ്റ് ചെയ്യുന്നതല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.
comments powered by Disqus