12:30:26
01 Aug 2014
Friday
Facebook
Google Plus
Twitter
Rssfeed

ലക്സ്ജെന്‍ എന്നാല്‍

ലക്സ്ജെന്‍ എന്നാല്‍

പണ്ടൊക്കെ സ്പോര്‍ട്സ് യൂട്ടിലിറ്റിയെന്നാല്‍ ഭയങ്കര സംഭവമായിരുന്നു. അപ്പര്‍മിഡില്‍ക്ളാസ് പോലും വിശേഷദിവസങ്ങളില്‍ മാത്രം കണ്ടിരുന്ന വിശിഷ്ട സ്വപ്നം. പത്തുപതിനഞ്ച് വര്‍ഷം മുമ്പ് ടൊയോട്ട ആര്‍.എ.വി നാലും ഹോണ്ട സി.ആര്‍.വിയുമൊക്കെ വന്നപ്പോഴാണ് കാശുള്ളവന് എല്ലാ ദിവസവും കാണാവുന്ന സ്വപ്നമായി എസ്.യു.വികള്‍ മാറിയത്. അറബിനാട്ടിലെ മണല്‍കൂനകളില്‍ തലകുത്തി മറിഞ്ഞ് പേരെടുത്ത ഈ വിദ്വാന്‍മാര്‍ ഇപ്പോള്‍ നമുക്ക് ഷാര്‍ജാ ഷേക്കിനെക്കാള്‍ പരിചിതരാണ്. ലാഭപ്രിയരായ ചില നിര്‍മാതാക്കള്‍ കോംപാക്ട് എസ്.യു.വികള്‍ എന്ന വയറ്റിപ്പിഴപ്പ് കച്ചവടത്തിനിറങ്ങിയപ്പോഴാണ് ഇത് സംബന്ധിച്ച പൊതുവിജ്ഞാനം നമുക്ക് കിട്ടിത്തുടങ്ങിയത്്.

ബെന്‍സ് എം ക്ളാസ് മുതല്‍ ലാന്‍റ്ക്രൂയിസറും പജേറോയും റേഞ്ച് റോവറും തുടങ്ങി ഡസ്റ്ററും ഇക്കോസ്പോര്‍ട്ടും വരെകണ്ട് ഞെട്ടി നില്‍ക്കുമ്പോള്‍ ഒരു കാര്യം മറക്കരുത്. ഇതിനൊപ്പം നില്‍ക്കുന്ന കിടിലന്‍ പീസുകള്‍ ഇറക്കുന്ന കമ്പനികള്‍ ലോകത്ത് വേറെയുമുണ്ട്. വാഹനലോകത്ത് അധികമാരും അറിയാത്ത അധകൃതര്‍. പാവപ്പെട്ട രാജ്യങ്ങളില്‍ പിറന്നതുകൊണ്ട് ലോകവിപണിയില്‍ തട്ടുപൊളിപ്പന്‍ പരസ്യം കൊടുക്കാനൊന്നും ഗതിയില്ലാത്തവര്‍. തായ്വാനിലെ ലക്സ്ജെന്‍ ഇക്കൂട്ടത്തില്‍പ്പെട്ടതാണ്്. ലക്ഷ്വറി, ജീനിയസ് എന്നിവയില്‍ നിന്ന് പിറന്ന പേരാണ് ലക്സ്ജെന്‍. വോള്‍വോയുടെ ഗാംഭീര്യം. ബെന്‍സ് എംക്ളാസിന്‍െറ വലിപ്പം. യൂറോപ്പിലെയും ജപ്പാനിലെയും വാഹനങ്ങള്‍ക്കുള്ള ഗുണങ്ങളില്‍ മിക്കതും ഇതിലുമുണ്ട്. തറവാടിത്തവും പാരമ്പര്യവും അല്‍പം കുറയുമെന്ന് മാത്രം.

ലോകംമുഴുവന്‍ എസ്.യു.വി തരംഗം അടിക്കാന്‍ തുടങ്ങിയപ്പോഴാണ് ലക്സ്ജനെക്കുറിച്ച് ജനം അറിഞ്ഞുതുടങ്ങിയത്. ലോകം മുഴൂവന്‍ മാന്ദ്യം വരുന്നുവെന്നകേട്ടുതുടങ്ങിയപ്പോള്‍ മുതല്‍ വിലകുറഞ്ഞ എസ്.യു.വികളെ ആളുകള്‍ പ്രണയിച്ചുതുടങ്ങി. പണിപോയാല്‍ ടാക്സിയോടിച്ച് ജീവിക്കാമെന്ന സി.ഇ.ഒ മാരുടെ വിശ്വാസമായിരിക്കാം ഇതിന് പിന്നില്‍. ഗള്‍ഫ് നാടുകളിലും റഷ്യയിലുമാണ് ലക്സ്ജെന് കുടുതല്‍ ആരാധകര്‍ ഉള്ളത്. മലയാളി ഇവനെ ഏറ്റവും കൂടുതല്‍ കാണുന്നത് ഒമാനിലാണ്. 12750 ഒമാനി റിയാല്‍ അതായത് ഏകദേശം 18 ലക്ഷം രൂപ കൊടുത്താല്‍ ഈ ഹല്‍വക്കഷ്ണം കിട്ടും. ഇതിനൊപ്പം സൗകര്യങ്ങളുള്ള ഏത് എസ്.യു.വികള്‍ക്കും ഇതില്‍ കൂടുതല്‍ വില നല്‍കേണ്ടി വരും.

കമ്പനി തയ്വാനാണെങ്കിലും സാങ്കേതികവിദ്യ മുഴുവന്‍ ജപ്പാനില്‍ പിറന്നതാണ്. അലുമിനിയം അലോയികൊണ്ട് പണിത 2.2 ലിറ്ററിന്‍െറ നാല് സിലിണ്ടര്‍ ടര്‍ബോചാര്‍ജ് എഞ്ചിന് ഭാരം 135 കിലോ മാത്രമാണ്. എതിരാളികളെക്കാള്‍ 13 ശതമാനം ഭാരക്കുറവ്. 2500-4000 ആര്‍പിഎമ്മില്‍ 175 ബി.എച്ച്.പി ശക്തിയും 28 കിലോ ടോര്‍ക്കും നല്‍കാന്‍ ഈ എഞ്ചിന് കഴിയും. അഞ്ച് സ്പീഡ് ഓട്ടോമാറ്റിക് ഗിയര്‍ ബോക്സും ഇതിനുണ്ട്. ഓരോ ഡ്രൈവര്‍മാരും ഓടിച്ചുതുടങ്ങുമ്പോള്‍ ഈ വണ്ടി ഡ്രൈവറുടെ സ്വഭാവം പഠിച്ചു തുടങ്ങും. ഗിയര്‍ എങ്ങനെ മാറുന്നു, ആക്സിലറേറ്റര്‍ എങ്ങനെ ഉപയോഗിക്കുന്നു, റോഡിന്‍െറ അവസ്ഥ പരിഗണിക്കുന്നുണ്ടോ എന്നിങ്ങനെയുള്ള കാര്യങ്ങള്‍ സൂക്ഷിച്ചുവക്കും. പരമാവധി ആറ് പേരുടെ വിവരം ശേഖരിക്കാനുള്ള കഴിവാണ് ഇപ്പോഴുള്ളത്. പിന്നീട് ഇവര്‍ ആരെങ്കിലും ഓടിക്കാന്‍ കയറിയാല്‍ പഠിച്ചതൊക്കെ ഓര്‍ത്തെടുക്കും. എന്നിട്ട് അതനുസരിച്ച് പെരുമാറും. അതായത് തായ്വാനാണെന്ന് കരുതി തല്ലിപ്പൊളിക്കാന്‍ ചെന്നാല്‍ നടക്കില്ലെന്ന് ചുരുക്കം. ഇങ്ങനെ സ്വയം സംരക്ഷിക്കാനുള്ള കഴിവ് നമ്മുടെ നാട്ടില്‍ മനുഷ്യര്‍ക്ക് പോലുമുണ്ടാവില്ല.

പിന്നെ വണ്ടിയില്‍ എന്തൊക്കെയുണ്ട് എന്ന് ചോദിക്കുന്നതിലും നല്ലത് എന്ത് ഇല്ല എന്ന് അന്വേഷിക്കുന്നതാവും. ചുറ്റിലുമുള്ള എയര്‍ബാഗ് മുതല്‍ ട്രാക്ഷന്‍ കണ്‍ട്രോളും ഇലക്ട്രോണിക് സ്റ്റെബിലിറ്റി കണ്‍ട്രോളുമൊക്കെ ഈ ഫോര്‍വീല്‍ ഡ്രൈവ് വണ്ടിക്കുണ്ട്. അതിവേഗ ഗതാഗതം നിലവിലുള്ള സ്ഥലങ്ങളിലാണ് ഈ ബുദ്ധിമാന്‍െറ യഥാര്‍ത്ഥ പ്രകടനം കാണ്ടേത്. എഞ്ചിനും ഗിയര്‍ബോക്സുമെല്ലാം ഒറ്റക്കെട്ടായി പ്രവര്‍ത്തിക്കുമ്പോള്‍ യാത്രക്കാര്‍ക്ക് രോമാഞ്ചം ഉണ്ടാകുമത്രേ. റോഡില്ലാത്തിടത്ത് എല്ലുകളില്‍ തണുപ്പ് കയറുകയും ചെയ്യും. പക്ഷേ പേര് സുചിപ്പിക്കുന്നതുപോലെ ആഢംബരത്തില്‍ അല്‍പം പിശുക്ക് കാണിച്ചിട്ടില്ലേയെന്ന് സംശയിക്കുന്നവരുമുണ്ട്. പകുതി ലക്ഷ്വറി മാത്രമുള്ളതിനാലാണ് ബെന്‍സും ബി.എം.ഡബ്ളിയുവുമൊക്കെ ഇവനെ പേടിക്കാത്തത്. പക്ഷേ മാന്ദ്യം വന്നാല്‍ അല്‍പം ആഢംബരം കുറച്ചാലോയെന്ന് മുതലാളിമാര്‍ തീരുമാനിക്കും. അതോടെ ഇവന്‍െറ സമയവും തെളിയും.


നിങ്ങളുടെ അഭിപ്രായങ്ങള്‍

ഇവിടെ കൊടുക്കുന്ന അഭിപ്രായങ്ങള്‍ മാധ്യമത്തിന്റെ അഭിപ്രായമാവണമെന്നില്ല.
Please Note:
അഭിപ്രായങ്ങള്‍ മലയാളത്തിലോ ഇംഗ്ലീഷിലോ എഴുതുക. മംഗ്ലീഷില്‍ എഴുതുന്ന അഭിപ്രായങ്ങള്‍ പോസ്റ്റ് ചെയ്യുന്നതല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.
comments powered by Disqus