​കൈക്കൂലി വാങ്ങുന്നതിനിടെ വില്ലേജ് ഓഫിസർ വിജിലൻസ് പിടിയിൽ

കോട്ടയം: കൈക്കൂലി വാങ്ങുന്നതിനിടെ കടുത്തുരുത്തി ഞീഴൂർ വില്ലേജ് ഓഫിസർ വിജിലൻസ്​ പിടിയിൽ. കടുത്തുരുത്തി അറുന്നൂറ്റിമംഗലം മങ്ങാട്​ കമ്പനിപ്പടി കുറുമുള്ളീൽ ജോർജ്​ ജോണിനെയാണ്​ (52) വിജിലൻസ്​ കോട്ടയം ഡിവൈ.എസ്​.പി രവികുമാറും സംഘവും അറസ്​റ്റ്​ ചെയ്തത്​. വ്യാഴാഴ്ച ഉച്ചക്ക്​ ഒന്നിന്​ കുറവിലങ്ങാട് സ്വദേശിയായ യുവാവിൽനിന്ന്​​ 1300 രൂപ കൈപ്പറ്റുന്നതിനിടെ വിജിലൻസ് കസ്റ്റഡിയിലെടുക്കുകയായിരുന്നു.

യുവാവ്​ കാനഡയിൽ പോകുന്നതിന്‍റെ ഭാഗമായി പഞ്ചായത്തിൽ ജനനം രജിസ്റ്റർ ചെയ്യുന്നതിന്​ പാലാ ആർ.ഡി.ഒ ഓഫിസിൽ അപേക്ഷ നൽകിയിരുന്നു. ഇത്​ പരിശോധിച്ച്​ റിപ്പോർട്ട്​ നൽകാൻ ആർ.ഡി.ഒ ഓഫിസിൽ നിന്ന്​ ഞീഴൂർ വില്ലേജ് ഓഫിസർ ​ജോർജ്​ ജോണിന്​ കൈമാറി. ഇതിൽ അന്വേഷണം നടത്തി റിപ്പോർട്ട്​ സമർപ്പിക്കുന്നതിന്​​ ഇയാൾ കൈക്കൂലി ആവശ്യപ്പെടുകയായിരുന്നു​.

വില്ലേജ് ഓഫിസിലെ വൈദ്യുതി ചാർജ്​ അടക്കാനെന്ന പേരിലാണ് പരാതിക്കാരനോട് 1300 രൂപ ആവശ്യപ്പെട്ടത്. പണം നൽകിയാലേ റിപ്പോർട്ട് ആർ.ഡി.ഒ ഓഫിസിലേക്ക്​ അയക്കൂ എന്നും വില്ലേജ് ഓഫിസർ പറഞ്ഞു. ഇതോടെ യുവാവ്​ കോട്ടയം വിജിലൻസ് ഓഫിസിലെത്തി പരാതി നൽകുകയായിരുന്നു.

വ്യാഴാഴ്ച വിജിലൻസ്​ ഏൽപിച്ച തുക യുവാവ്​ വില്ലേജ് ഓഫിസർക്ക്​ കൈമാറുന്ന സമയത്തുതന്നെ അവിടെയുണ്ടായിരുന്ന വിജിലൻസ്​ സംഘം ജോർജ്​ ജോണിനെ പിടികൂടുകയായിരുന്നു. വിജിലൻസ് ഇൻസ്​പെക്ടർ എസ്​. പ്രദീപ്​, എസ്​.​ഐമാരായ സ്റ്റാൻലി തോമസ്, വി.എം. ജയ്മോൻ, പ്രദീപ്കുമാർ, കെ.സി. പ്രസാദ് എന്നിവരും സംഘത്തിലുണ്ടായിരുന്നു.