സിനിമ പരാജയപ്പെടുന്ന പോലെ ജയസൂര്യയുടെ തിരക്കഥയും പടവും പൊട്ടിപ്പോയി -പി. പ്രസാദ്​

തിരുവനന്തപുരം: സംഭരിച്ച നെല്ലിന്​ പണം നൽകിയില്ലെന്ന ആരോപണത്തിൽ ഒന്നാം ദിവസം തന്നെ സിനിമ പരാജയപ്പെടും​പോലെ നടൻ ജയസൂര്യയുടെ തിരക്കഥയും പടവും പൊട്ടിപോയെന്ന്​ കൃഷി മന്ത്രി പി. പ്രസാദ്​. നിയമസഭയിൽ കാർഷിക പ്രതിസന്ധി സംബന്ധിച്ച്​ പ്രതിപക്ഷം അടിയന്തര പ്രമേയ അവതരണത്തിന്​ നൽകിയ നോട്ടീസിന്​ മറുപടി പറയുമ്പോഴായിരുന്നു മന്ത്രിയുടെ വിമർശനം.

നെല്ല്​ സംഭരണവുമായി ബന്ധപ്പെട്ട്​ പ്രചരിച്ച കഥകളിലൊന്നാണ്​ നടനുമായി ബന്ധപ്പെട്ടുണ്ടായത്​. ജയസൂര്യക്ക്​ അതേ വേദിയിൽ മന്ത്രി പി. രാജീവ്​ കൃത്യമായി മറുപടി പറഞ്ഞിട്ടുണ്ട്​. അതവിടംകൊണ്ട്​ അവസാനിപ്പിച്ചതാണ്​. ഓണമുണ്ണാൻ പണം ലഭിക്കാതെ ഇരിക്കുന്നെന്ന്​ നടൻ ചൂണ്ടിക്കാട്ടിയ കർഷകൻ ഒരു രാഷ്ട്രീയ പാർട്ടിയുമായി അടുത്ത ബന്ധമുള്ളയാളാണ്​. മാസങ്ങൾക്കു​ മുമ്പ്​ മുഴുവൻ പൈസയും വാങ്ങിയ ഒരാളുടെ പേരു പറഞ്ഞാണ്​ സിനിമാതാരം പുതിയ തിരക്കഥയുമായി വരുന്നത്​. കൃഷ്ണപ്രസാദിന്‍റെ മുഴുവൻ പൈസയും നൽകിയതാണെന്ന്​ മന്ത്രി പറഞ്ഞു.

കാർഷിക പ്രതിസന്ധി നടൻ ജയസൂര്യ രണ്ടു​ മന്ത്രിമാരുടെ മുഖത്ത്​ നോക്കി അറിയാതെ പറഞ്ഞുപോയെന്നും അതിനു​ പരിഹാരമുണ്ടാക്കാതെ അദ്ദേഹത്തിനു​ മേൽ കുതിര കയറാൻ ​സൈബർ സഖാക്കളെ വിടുന്നതാണ്​ കാണുന്നതെന്നും പ്രമേയത്തിന്​ അവതരണാനുമതി തേടിയ കോൺഗ്രസിലെ സണ്ണി ജോസഫ്​ പറഞ്ഞു.

നെൽകർഷകരുടെ ദുരിതമാണ്​ ജയസൂര്യ പറഞ്ഞത്​. കർഷകരായ മാതാപിതാക്കൾ തിരുവോണ ദിനത്തിൽ പട്ടിണിസമരം ഇരിക്കുമ്പോൾ യുവാക്കൾ എങ്ങനെ കൃഷിയിലേക്ക്​ വരുമെന്നാണ്​ ജയസൂര്യ ചോദിച്ചത്​. കർഷകരുടെ കണ്ണീര്​ കാണാൻ ജയസൂര്യക്ക്​ കഴിഞ്ഞെങ്കിൽ ഭരിക്കുന്ന സർക്കാറിന്​ കഴിയേണ്ട​തല്ലേയെന്നും സണ്ണി ജോസഫ്​ ചോദിച്ചു.