രൂപേഷി‍നും ഷൈനക്കുമെതിരായ യു.എ.പി.എ കോടതി റദ്ദാക്കി

തൃശൂർ: പാലക്കാട് കെ.എഫ്.സി, മക്ഡൊണാൾഡ് എന്നിവകളുടെ ശാഖകൾ ആക്രമിച്ച സംഭവത്തിൽ മാവോവാദി നേതാവ് രൂപേഷും ഭാര്യ ഷൈനയും ഉൾപ്പെടെയുള്ളവർക്കെതി​രെ ചുമത്തിയ യു.എ.പി.എ കോടതി റദ്ദാക്കി.

വിയ്യൂർ സെൻട്രൽ ജയിലിൽ കഴിയുന്ന രൂപേഷ്​, ജാമ്യത്തിലിറങ്ങിയ ഭാര്യ ഷൈന, കാസർകോട് ചെറുവത്തൂർ സ്വദേശി അരുൺ, തൃക്കരിപ്പൂർ സ്വദേശി ശ്രീകാന്ത്, കെ.വി. ജോസ്, അഷ്റഫ്, രാമൻ, അനൂപ് മാത്യു ജോർജ്, മൊയ്​തീൻ, ഇസ്​മായിൽ എന്നിവർക്കെ​​തിരെയാണ് യു.എ.പി.എ ചുമത്തിയിരുന്നത്. എല്ലാവരുടെ പേരിലും ചുമത്തിയിരുന്ന രാജ്യദ്രോഹക്കുറ്റവും പാലക്കാട് സെഷൻസ് കോടതി റദ്ദാക്കി.

2014 ഡിസംബർ 22നായിരുന്നു കേസിനാസ്​പദമായ സംഭവം. പാലക്കാട് ചന്ദ്രനഗറിലെ ബഹുരാഷ്​ട്ര ഭക്ഷ്യ ഏജൻസിയായ കെ.എഫ്.സി.യുടെയും മക്ഡൊണാൾഡി​െൻറയും ശാഖകൾ ആക്രമിക്കുകയായിരുന്നു. സാമ്രാജ്യത്വ കുത്തകകൾക്കെതിരെ മുദ്രാവാക്യം വിളിച്ചെത്തിയവരാണ് അക്രമം നടത്തിയതെന്ന വിലയിരുത്തലിൽ രൂപേഷിനെയും ഷൈനയെയുമെല്ലാം കേസിൽ പ്രതിചേർക്കുകയായിരുന്നു.

അരുൺ, ശ്രീകാന്ത് എന്നിവരെ അന്നുതന്നെ പാലക്കാട് മങ്കരയിൽനിന്ന് പൊലീസ് പിടികൂടി. പിന്നീടാണ്​ രൂപേഷിനെയടക്കം അറസ്​റ്റ്​ ചെയ്​തത്. അതേദിവസം തന്നെ വയനാട് വെള്ളമുണ്ടക്കടുത്ത്​ കുഞ്ഞോത്തെ വനം വകുപ്പ്​ ഔട്ട്പോസ്​റ്റും പാലക്കാട് സൈലൻറ്​വാലി റേഞ്ച് ഓഫിസും ആക്രമിച്ചിരുന്നു. ഇതിന് പിന്നിലും മാവോവാദികളാണെന്നായിരുന്നു പൊലീസ് റിപ്പോർട്ട്​. ഇരുപതോളം കേസുകളിലാണ് രൂപേഷിനെതിരെ യു.എ.പി.എ ചുമത്തിയിരുന്നത്. ചില കേസുകളിൽ കൂടി ഇനി യു.എ.പി.എ ഉണ്ട്​.