മാവേലിക്കര: യു.ഡി.എഫ് ‘കര’കടക്കും

സംവരണമണ്ഡലമായ മാവേലിക്കരയിൽ അവസാനവട്ടത്തിൽ യു.ഡി.എഫ്​ സ്ഥാനാർഥി കൊടിക്കുന്നിൽ സുരേഷിനാണ്​ നേരിയ മുൻതൂക്കം​. എതിരാളികളുടെ തന്ത്രങ്ങളെ അനുഭവപരിചയത്തിലൂടെ മറികടക്കുന്നതും എൻ.എസ്​.എസ്, കെ.പി.എം.എസ്​​ അടക്കം സമുദായ വോട്ടുകളുടെ പിൻബലം ഉറപ്പിക്കാനായതുമാണ്​ നാലാംതവണയും വിജയക്കൊടി പാറിക്കാമെന്ന നിലയിൽ​ യു.ഡി.എഫിനെ എത്തിക്കുന്നത്​.

യുവത്വമെന്ന പുതുമുഖ പരീക്ഷണത്തിലൂടെ ഒരുവിഭാഗം വോട്ടർമാരെ സ്വാധീനിക്കാൻ കഴിഞ്ഞതും ഏഴ്​ നിയമസഭ മണ്ഡങ്ങളിലെ ഇടതു ജനപ്രതിനിധികളുടെയും ഘടക കക്ഷികളുടെയും പിൻബലവും അട്ടിമറിവിജയം നേടിക്കൊടുക്കുമെന്നാണ്​​എൽ.ഡി.എഫ്​ പ്രതീക്ഷിച്ചത്​. നാടിളക്കിയുള്ള പ്രചാരണത്തിലൂടെ എല്ലാവരിലേക്കും കടന്നുചെല്ലാൻ എൽ.ഡി.എഫ്​ സ്ഥാനാർഥി സി.എ. അരുൺകുമാറിന്​​ കഴിഞ്ഞിരുന്നു. എൻ.ഡി.എ സ്ഥാനാർഥി ബൈജു കലാശാല വോട്ടുവിഹിതത്തിൽ വർധനയുണ്ടാക്കും.

ഹിന്ദു സമുദായ സംഘടനകള്‍ക്ക് നിര്‍ണായക സ്വാധീനമുണ്ടിവിടെ. കേ​ന്ദ്രസർക്കാർ മാറണമെന്ന ചിന്തയും സംസ്ഥാന സർക്കാറിന്‍റെ ഭരണവിരുദ്ധതയും മണ്ഡലത്തിൽ പ്രകടം​. കുട്ടനാട്ടിലെ നെൽകർഷകരുടെ പ്രശ്നം അതിൽ പ്രധാനമാ

ണ്​. സംഭരണത്തിലെ പാളിച്ച മുതൽ നെല്ലുവില യഥാസമയം കിട്ടാത്തതിൽ അടക്കമുള്ള വിഷയങ്ങളിൽ കർഷകർ കടുത്ത അസംതൃപ്​തിയിലാണ്​. വന്യമൃഗശല്യം മുതൽ റബറിന്‍റെയും തേങ്ങയുടെയും വിലയിടിവും കൊല്ലം ജില്ലയിൽ കശുവണ്ടി​ത്തൊഴിലാളികളുടെ പ്രശ്നങ്ങൾവരെ വോട്ടർമാരെ സ്വാധീനിക്കുന്ന ഘടകങ്ങളായി​.

കേരള കോൺ​ഗ്രസ്​ ഇടതുമുന്നണിയിലേക്ക്​ ചേക്കേറിയ ശേഷമുള്ള ആദ്യ ​തെരഞ്ഞെടുപ്പാണിത്​​. അവർക്ക്​ സ്വാധീനമുള്ള ചങ്ങനാശ്ശേരി അടക്കമുള്ള ചില മണ്ഡലങ്ങളിൽ അതിന്‍റെ പ്രതിഫലനമുണ്ടാകും. കെ.ബി. ഗണേഷ്​കുമാറിന്‍റെ മ​ന്ത്രിസ്ഥാനത്തിലൂടെ പത്തനാപുരം അടക്കമുള്ള ചിലയിടങ്ങളിൽ എൻ.എസ്​.എസ്​ വോട്ടുകളും എൽ.ഡി.എഫ്​ പ്രതീക്ഷിക്കുന്നു. 2019ൽ ആളിക്കത്തിയ ശബരിമല വിഷയം ഇന്ന്​ ചിത്രത്തിലില്ല. അതിനാൽ ഹിന്ദുസമുദായ സമവാക്യത്തിൽ മാറ്റമുണ്ടാകും. ചില മേഖകളിൽ നായർ-കൈസ്ത്രവ-ദലിത്​ വോട്ടുകളുടെ ഏകീകരണവും മുസ്​ലിം വോട്ടുകളും ചേർന്നാണ്​ യു.ഡി.എഫിന്​ മേൽക്കൈ നൽകുന്നത്​.