കുടിവെള്ള സ്രോതസ്സിലേക്ക് മലിനജലം ഒഴുക്കുന്നതായി പരാതി

നെടുങ്കണ്ടം: മഞ്ഞപ്പാറയില്‍ കുടിവെള്ള സ്രോതസ്സിലേക്ക് സ്വകാര്യ വ്യക്തി മലിനജലം ഒഴുക്കുന്നതായി പരാതി. മഞ്ഞപ്പാറ സ്വദേശി ചള്ളിലപൊയ്കയില്‍ വര്‍ഗീസാണ് പരാതി നൽകിയത്​. എട്ടുവര്‍ഷമായി അധികൃതര്‍ക്ക് നിരവധിതവണ പരാതി നല്‍കിയിട്ടും കുടിവെള്ളം മലിനമാക്കുന്നത്​ തുടരുകയാണ്. വര്‍ഗീസ് കുടിവെള്ളം ശേഖരിക്കുന്ന കിണറിന്​ സമീപത്താണ് അയല്‍വാസി പശുത്തൊഴുത്ത് സ്ഥാപിച്ചിരിക്കുന്നത്. തൊഴുത്തില്‍നിന്ന്​ ചാണകവും മലിനജലവും കുടിവെള്ളത്തില്‍ കലരുന്നതായാണ് പരാതി. പഞ്ചായത്ത്​ അധികൃതര്‍ നിര്‍ദേശം നല്‍കിയിട്ടും കുടിവെള്ളം മലിനമാക്കുന്നത്​ അയൽവാസി തുടരുകയാണെന്ന്​ വർഗീസ്​ പറയുന്നു.