വെടിമരുന്ന് ഷെഡിന് തീപിടിച്ച് അഞ്ചുപേർക്ക് പരിക്ക്​

പൂച്ചാക്കൽ: പാണാവള്ളി നാൽപത്തെണ്ണീശ്വരം ക്ഷേത്രത്തിൽ വെടിമരുന്ന് സൂക്ഷിച്ച ഷെഡിന് തീപിടിച്ച് അഞ്ചുപേർക്ക് പരിക്കേറ്റു. ഗുരുതരമായി പരിക്കേറ്റ പാണാവള്ളി പഞ്ചായത്ത് ഏഴാം വാർഡ് മറ്റത്തിൽ തിലകൻ (55), 17ാം വാർഡ് വാലുമ്മേൽ രാജേഷ് (45 ) എന്നിവരെ കളമശ്ശേരി മെഡിക്കൽ കോളജിലേക്ക് മാറ്റി. തിങ്കളാഴ്ച വൈകീട്ട് നാലോടെയായിരുന്നു സംഭവം. ക്ഷേത്രത്തിൽ സപ്താഹം നടക്കുന്നതിന് മുന്നോടിയായി അറ്റകുറ്റപ്പണിയിൽ ഏർപ്പെട്ടിരുന്നവർക്കാണ് അപകടം സംഭവിച്ചത്. പെയിന്റിങ്​, വെൽഡിങ് ജോലികളാണ് ക്ഷേത്രത്തിൽ നടന്നിരുന്നത്. വെൽഡിങ്ങിൽനിന്നുള്ള തീ തെറിച്ചതാണ് അപകടത്തിന് കാരണമെന്ന് പറയപ്പെടുന്നു. കരിമരുന്ന് നിറച്ചുവെച്ച കതിനകളിലേക്ക് തീപടർന്നതാണ് അപകടത്തിന്റെ രൂക്ഷത വർധിപ്പിച്ചത്. മേൽക്കൂരകൾ തകരുകയും ഭിത്തികൾ പൊളിഞ്ഞുവീഴുകയും ചെയ്തിട്ടുണ്ട്. അരൂരിൽനിന്നുള്ള അഗ്​നിരക്ഷാസേനയും പൊലീസും ബ്ലോക്ക് ദുരന്ത കർമസേനയും നാട്ടുകാരും രക്ഷാപ്രവർത്തനം നടത്തി. പരിക്കേറ്റ 17 ാംവാർഡ് വാലുമ്മേൽ വിഷ്ണു (28), വന്ദനം തറമേൽ ധനപാലൻ (55), മറ്റത്തിൽ അനിൽ കുമാർ എന്നിവർ നെട്ടൂരിലെ സ്വകാര്യ ആശുപത്രിയിൽ ചികിത്സയിലാണ്. ചിത്രം : വെടിമരുന്ന് സൂക്ഷിച്ചിരുന്ന ഷെഡ് തകർന്ന നിലയിൽ