‘പ്രിയ സഖാവെ ലാൽസലാം, രാജേട്ടാ ലാൽസലാം’ ചിതക്കരികിൽ മുദ്രാവാക്യം മുഴക്കി പൊട്ടിക്കരഞ്ഞ്​ മന്ത്രി പ്രസാദ്​

കോട്ടയം: സി.പി.ഐ സംസ്ഥാന സെ​ക്രട്ടറി കാനം രാജേന്ദ്രന്‍റെ സംസ്​കാരച്ചടങ്ങിനിടെ പൊട്ടിക്കരഞ്ഞ്​ മന്ത്രി പി. പ്രസാദ്​. ചിതക്ക്​ തീകൊളുത്തുന്നതിന്​​ മുമ്പായി ‘പ്രിയ സഖാവെ ലാൽസലാം, രാജേട്ടാ ലാൽസലാം’ മുദ്രാവാക്യങ്ങൾ മന്ത്രി പി. പ്രസാദ് മുഴക്കി.

ഇത്​ പ്രവർത്തകർ ഏറ്റുവിളിച്ചു. ഏറെനേരം മുദ്രാവാക്യം മുഴക്കിയതിനൊടുവിൽ മന്ത്രി ​കണ്ണീർ വാർത്തു. ചിതക്ക്​ തീകൊടുക്കാൻ തുടങ്ങിയതോടെ പൊട്ടിക്കരച്ചിലായി. ഒപ്പമുണ്ടായിരുന്ന മന്ത്രി കെ. രാജൻ ചേർത്തുനിർത്തി ആശ്വസിപ്പിച്ചു. ഇതിനിടെ രാജന്‍റെ കണ്ണുകളും നിറഞ്ഞു.

മൃതദേഹം വീട്ടിലെത്തിച്ചതുമുതൽ പ്രിയ നേതാവിന്​ അരികിൽതന്നെയായിരുന്നു ഇരുവരും. മുഴുവൻ സമയം ഒപ്പംനിന്ന ഇവർ ചിത കത്തിച്ചതിനുശേഷവും ഏറെനേരം സംസ്കാരച്ചടങ്ങ്​ നടന്ന സ്ഥലത്തുതന്നെ തുടർന്നു.

പൂർണ ഔദ്യോഗിക ബഹുമതികളോടെയായിരുന്നു സംസ്കാരം. കാനം രാജേന്ദ്രന്‍റെ ചിതക്ക്​ മകന്‍ സന്ദീപ് ചിതക്ക് തീകൊളുത്തി. സി.പി.ഐ ദേശീയ സെക്രട്ടറി ഡി. രാജ, മുഖ്യമന്ത്രി പിണറായി വിജയൻ, മുതിർന്ന സി.പി.​ഐ നേതാവ്​ കെ.ഇ. ഇസ്മാഈൽ എന്നിവർ ചിതക്കരികിലെത്തിയും അന്തിമാഭിവാദ്യം അർപ്പിച്ചു.

വെള്ളിയാഴ്ച അന്തരിച്ച കാനം രാജേന്ദ്രന്‍റെ ഭൗതികശരീരം 12 മണിക്കൂറി​​ലേറെ നീണ്ട വിലാപയാത്രക്കൊടുവിൽ ഞായറാഴ്ച പുലർച്ച 2.45നാണ്​ വാഴൂർ കാനത്തെ വീട്ടിലെത്തിച്ചത്​. നൂറുകണക്കിനു പ്രവർത്തകരായിരുന്നു പ്രിയനേതാവിനെ അവസാനമായി കാണാൻ ഉറങ്ങാതെ വീട്ടിൽ കാത്തിരുന്നത്​. വിലാപയാ​ത്ര കടന്നുവന്ന വഴികളിലും വൻ ജനാവലി പ്രിയ നേതാവിനായി കാത്തുനിന്നിരുന്നു. വീട്ടുമുറ്റത്ത്​​ ഭൗതികശരീരം പൊതുദർശനത്തിന്​ വെച്ചപ്പോഴും സംസ്ഥാനത്തിന്‍റെ വിവിധ ഭാഗങ്ങളിൽനിന്നായി നിരവധിപേരെത്തി കണ്ണീരഭിവാദ്യം അർപ്പിച്ചു. രാവിലെ 8.30ഓടെ വീട്ടകവും മുറ്റവും പാതയോരവും പ്രവർത്തകരാലും നേതാക്കളാലും നിറഞ്ഞു. പ്രിയനേതാവിനെ അവസാനമായി കാണാനെത്തിയവരുടെ നീണ്ട നിരയും ​ വീടിന്​ മുന്നിൽ പ്രത്യക്ഷപ്പെട്ടു.

ഒമ്പതോടെ സി.​പി.​ഐ ദേ​ശീ​യ സെക്രട്ടറി ഡി. രാജ വീട്ടിലെത്തി. 10.15ന് മന്ത്രിമാരായ വി.എൻ. വാസവനും കെ. രാധാകൃഷ്ണനുമൊപ്പം മുഖ്യമന്ത്രി പിണറായി വിജയനുമെത്തി. 10.45ന്​ മൃതദേഹം പന്തലിൽനിന്ന്​ ചിതയിലേക്കെടുത്തു.

ഡി. രാജ, പിണറായി വിജയൻ, സി.പി.എം സംസ്ഥാന സെക്രട്ടറി എം.വി. ഗോവിന്ദൻ എന്നിവരും സി.പി.ഐ നേതാക്കളും അനുഗമിച്ചു. വീടിന്‍റെ തെക്കുവശത്തെ പുളിമരച്ചുവട്ടില്‍ അച്ഛന്‍ വി.കെ. പരമേശ്വരന്‍ നായര്‍, അമ്മ വി.കെ. ചെല്ലമ്മ എന്നിവരെ സംസ്‌കരിച്ച സ്ഥലത്തോട് ചേര്‍ന്നായിരുന്നു ചിതയൊരുക്കിയത്​. കർമങ്ങൾ ഒഴിവാക്കിയ സംസ്​കാരച്ചടങ്ങ്​ 11.15ഓടെ പൂർത്തിയായി. തുടർന്ന്​ വീട്ടുമുറ്റത്തെ പന്തലിൽ അനുശോചനയോഗവും ചേർന്നു.