ഇ.പി. ജയരാജൻ ചർച്ച നടത്തിയത്​ പിണറായിയുടെ അറിവോടെ -എൻ.കെ. പ്രേമചന്ദ്രൻ

കൊല്ലം: ഇ.പി. ജയരാജൻ ബി.ജെ.പി നേതാക്കളുമായി ചർച്ച നടത്തിയത്​ പിണറായി വിജയന്‍റെ അറിവോടെയാണെന്ന്​ ആർ.എസ്.പി നേതാവ്​ എൻ.കെ. പ്രേമചന്ദ്രൻ. കേരളത്തിൽ കോൺഗ്രസി​നെ ദുർബലപ്പെടുത്തി പ്രധാന പ്രതിപക്ഷമായി ബി.ജെ.പിയെ പ്രതിഷ്​ഠിച്ച്​ ദീർഘകാലം ഭരിക്കാനാണ്​ സി.പി.എം ലക്ഷ്യമിടുന്നത്​. ന്യൂനപക്ഷ വോട്ടും സി.പി.എം വോട്ടും സമാഹരിച്ചാൽ ഇനിയും തുടർഭരണം ലഭിക്കാമെന്നാണ്​ അവരുടെ കണക്കുകൂട്ടൽ.

സി.പി.എം-ബി.ജെ.പി ധാരണ ദൃഢീകരിക്കുന്ന കാര്യങ്ങളാണ്​ ഇപ്പോൾ കാണുന്നത്​. തിരുവനന്തപുരം, തൃശൂർ ഫലം വരുമ്പോൾ കാര്യങ്ങൾ കൂടുതൽ വ്യക്ത​മാകും. ഇ.പി. ജയരാജൻ പ്രകാശ്​ ജാവദേക്കറിനെ കണ്ടതിനെ ന്യായീകരിക്കുകയാണ്​ പിണറായി വിജയൻ, താനും പലപ്രാവശ്യം കണ്ടിട്ടുണ്ടെന്ന്​ ന്യായീകരിക്കുകയാണ്​ അദ്ദേഹം.

താൻ പ്രധാനമന്ത്രിക്കൊപ്പം ഭക്ഷണം കഴിച്ചതിനെതിരെ മൂന്നു മാസക്കാലം ആക്ഷേപിച്ച്​ ബി.ജെ.പിക്കൊപ്പം പോകുന്നെന്ന്​​ പ്രചരിപ്പിച്ചവരാണ്​ ഇത്​ ചെയ്തതെന്ന്​ ഓർക്കണമെന്നും പ്രേമചന്ദ്രൻ വാർത്തസമ്മേളനത്തിൽ പറഞ്ഞു.