ഷാർജ ഭരണാധികാരി ഞായറാഴ്​ച എത്തും

തി​രു​വ​ന​ന്ത​പു​രം: യു.എ.ഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ​േഡാ. ഷെയ്​ഖ്​​ സുൽത്താൻ ബിൻ മുഹമ്മദ്​ അൽ ഖാസിമി നാലു ദിവസത്തെ സന്ദർശനത്തിനായി ഞായറാഴ്​ച സംസ്​ഥാനത്തെത്തും. മുഖ്യമന്ത്രി പിണറായി വിജയ​​െൻറ ക്ഷണപ്രകാരമാണ്​ അ​േദ്ദഹം സംസ്​ഥാനത്തെത്തുന്നത്​. ഏഴംഗ സംഘവും അ​േദ്ദഹത്തെ അനുഗമിക്കും. 

24ന്​ രാവിലെ 10ന്​ ഷാർജയിൽനിന്ന്​ പുറപ്പെടുന്ന അദ്ദേഹം വൈകു​േ​ന്നരം മൂന്നിന്​ തിരുവനന്തപുരം വിമാനത്താവളത്തിൽ എത്തും. 25ന്​ രാവിലെ സംസ്​ഥാന മന്ത്രിസഭാംഗങ്ങളുമായി അദ്ദേഹം സെക്ര​േട്ടറിയറ്റിൽ കൂടിക്കാഴ്​ച നടത്തും. തുടർന്ന്​ രാജ്​ഭവനിൽ ഗവർണർ ജ. പി. സദാശിവവുമായും അദ്ദേഹം ചർച്ച നടത്തും. ഷാർജ ഭരണാധികാരിയുടെ ബഹുമാനാർഥം രാജ്​ഭവനിൽ ഉച്ചവിരുന്നും നൽകും. 26ന്​ രാവിലെ 10ന്​ മുഖ്യമന്ത്രി പിണറായി വിജയനുമായി അദ്ദേഹം ക്ലിഫ്​ ഹൗസിൽ കൂടിക്കാഴ്​ച നടത്തും. തുടർന്ന്​  കാലിക്കറ്റ്​​ സർവകലാശാലയുടെ ഒാണററി ഡി. ലിറ്റ്​​ സ്വീകരിക്കും. രാജ്​ഭവനിലാണ്​ ചടങ്ങ്​. മുഖ്യമന്ത്രി പിണറായി വിജയനും ഇതിൽ സംബന്ധിക്കും. 27ന്​ ലുലുഗ്രൂപ്​​ ചെയർമാൻ എം.എ. യൂസുഫലിയുടെ ക്ഷണം സ്വീകരിച്ച്​ കൊച്ചിയിൽ സ്വകാര്യ സന്ദർശനം നടത്തും. അന്ന്​ വൈകീട്ടാണ്​ മടക്കം. ഷാർജ ഭരണാധികാരിയെ അനുഗമിക്കാനുള്ള സംസ്​ഥാനസർക്കാരി​​െൻറ ഒൗദ്യോഗിക പ്രതിനിധിയായി മന്ത്രി ഡോ. കെ.ടി ജലീലിനെ നിയോഗിച്ചു.

ഷാർജ ഭരണാധികാരിയുടെ ഒൗദ്യോഗിക സംഘത്തിൽ ഷാർജ മീഡിയ ​േകാർപറേഷൻ ചെയർമാൻ ഷെയ്​ഖ്​ സുൽത്താൻ ബിൻ അഹമ്മദ്​, ഷാർജ റൂളേഴ്​സ്​ ഒാഫിസ്​ തലവൻ ഷെയ്​ഖ് സാലിം ബിൻ അബ്​ദുറഹ്​മാൻ, ഷാർജ പെട്രോളിയം കൗൺസിൽ ​ൈവസ്​ ചെയർമാൻ ഷെയ്​ഖ്​ ​ ഫാഹിം അൽ ഖാസിമി, ഷാർജ കൾചറൽ അതോറിറ്റി ചെയർമാൻ അബ്​ദുല്ല അൽ ഉവൈസ്​, ലുലു ഗ്രൂപ്​​ ചെയർമാൻ എം.എ. യൂസുഫലി, ഷാർജ ഭരണാധികാരിയുടെ സാമ്പത്തിക ഉപദേഷ്​ടാവ്​ ഉമർ സൈദ്​ മുഹമ്മദ്​, ഷാർജ ഇന്ത്യൻ അസോസിയേഷൻ പ്രസിഡൻറ്​ അഡ്വ. വൈ.എ. റഹീം എന്നിവർ ഉൾപ്പെടുന്നുണ്ട്​.