സഹോദരനൊപ്പം ചേർന്ന് പീഡിപ്പിച്ചെന്ന പെൺകുട്ടിയുടെ മൊഴി വിശ്വസനീയമല്ലെന്ന്​ കോടതി; പ്രതിയെ വെറുതെ വിട്ടു

കോട്ടയം: സഹോദരനൊപ്പംചേർന്ന് പ്രായപൂർത്തിയാകാത്ത പെൺകുട്ടിയെ പീഡിപ്പി​െച്ചന്ന ​കേസിൽ പ്രതിയെ കോടതി വെറുതെ വിട്ടു. പെൺകുട്ടിയുടെ മൊഴി വിശ്വസനീയമല്ലെന്ന നിരീക്ഷണത്തോടെയാണ്​ കോടതിയുടെ നടപടി. എരുമേലി പുഞ്ചവയൽ മറ്റത്തിൽ രാജൻകുട്ടിയേയാണ്​ (46) കോട്ടയം അഡീഷനൽ ജില്ല കോടതി ജഡ്ജി ജി.ഗോപകുമാർ വെറുതെവിട്ടത്​.

പ്രതിയും മറ്റു രണ്ടു കൂട്ടുകാരും പെൺകുട്ടിയുടെ സഹോദരനും ചേർന്ന് 2007 നവംബർ മുതൽ 2014 ഏപ്രിൽ വരെ കാലയളവിൽ ലൈംഗികമായി പീഡിപ്പി​െച്ചന്നായിരുന്നു പ്രോസിക്യൂഷൻ കേസ്. എരുമേലി പൊലീസാണ്​ കേസ്​ രജിസ്​റ്റർ ചെയ്​തത്​.

ആദ്യം നാലുപ്രതികളെയും ഉൾപ്പെടുത്തി പൊലീസ്​ ഒരു കുറ്റപത്രമായിരുന്നു​ സമർപ്പിച്ചിരുന്നത്​. എന്നാൽ, കേസി​െൻറ വിചാരണ ഘട്ടത്തിൽ കോടതി നിർദേശ പ്രകാരം പുനരന്വേഷണം നടത്തി ഒാരോ പ്രതികൾക്കുമെതിരെ പ്രത്യേകം കുറ്റപത്രം സമർപ്പിക്കുകയായിരുന്നു. ഇതിൽ ഒന്നാമത്തെ കേസിലാണ് പ്രതി കുറ്റക്കാരനല്ലെന്ന് കണ്ടെത്തിയത്​.

പെൺകുട്ടിയുടെ മൊഴി വിശ്വസനീയമല്ലെന്ന്​ കോടതി നിരീക്ഷിച്ചു. 10 മീറ്റർ ചുറ്റളവിൽ ചുറ്റുപാടും വീടുകളുള്ള സ്ഥലത്തുള്ള ഷെഡിൽ പകൽ ഇങ്ങനൊരു കൃത്യം സംഭവിക്കില്ലെന്ന്​ കോടതി വിലയിരുത്തി. വ്യക്തമായ സമയമോ ദിവസമോ ചൂണ്ടിക്കാണിക്കാൻ പ്രോസിക്യൂഷന് സാധിക്കാത്തതും വീഴ്ചയായി.

പെൺകുട്ടിക്ക് മറ്റൊരു ചെറുപ്പക്കാരനുമായി ഉണ്ടായിരുന്ന സ്നേഹബന്ധം വെളിപ്പെടുത്തുന്ന കത്ത് പ്രതിഭാഗം ഹാജരാക്കുകയും വിസ്താരത്തിൽ അത് പെൺകുട്ടി അംഗീകരിക്കുകയും ചെയ്തു. ആ ബന്ധത്തെ എതിർത്ത സഹോദരനും കൂട്ടുകാർക്കും എതിരെ കളവായി ആരോപണം ഉന്നയിക്കുകയായിരുന്നു എന്ന പ്രതിഭാഗം വാദം കോടതി ശരിവെച്ചു.

പ്രതികളോട് മുൻവൈരാഗ്യമുള്ള സ്ഥലവാസിയായ പൊലീസ്​ ഉദ്യോഗസ്​ഥൻ കേസിൽ ഇടപെട്ടതായും പ്രതിഭാഗം വാദിച്ചു. പെൺകുട്ടിയെ വൈദ്യ പരിശോധനക്കായി 50 കി.മീ അകലെയുള്ള ഹോസ്പിറ്റലിൽ ഹാജരാക്കിയതിലും വ്യക്തമായ വിശദീകരണം നൽകാൻ പ്രോസിക്യൂഷന് സാധിച്ചില്ല. വീട്ടിൽ അറിയാതെ പെൺക​ുട്ടി രഹസ്യമായി നിരന്തരം ഉപയോഗിച്ചിരുന്ന മൊബൈൽ ഫോൺ സഹോദരൻ നശിപ്പിച്ചത്​ വിരോധകാരണമായി എന്ന വാദവും കോടതി അംഗീകരിച്ചു.

പെൺകുട്ടി അടക്കം 12 സാക്ഷികളെ വിസ്തരിക്കുകയും 20 ലേറെ പ്രമാണങ്ങളും തൊണ്ടി മുതലുകളും കോടതിയിൽ പ്രൊസിക്യൂഷൻ ഹാജരാക്കുകയും ചെയ്‌തിരുന്നു. മറ്റ് പ്രതികൾക്കെതിരെയുള്ള വിചാരണ പിന്നീട് നടക്കും.