കുടുംബകലഹത്തിൽ’ കലങ്ങിമറിഞ്ഞ്​...

കോട്ടയം: സാമുദായിക, സ്ത്രീവോട്ടുകൾ നിർണായകമായ കോട്ടയം പാർലമെന്‍റ്​ മണ്ഡലത്തിലെ ചിത്രം അവസാനലാപ്പിലും അവ്യക്തം. മറുകണ്ടം ചാടലും വ്യക്തി അധിക്ഷേപങ്ങളും തുടർക്കഥയായിരുന്നെങ്കിലും മണ്ഡലത്തിന്‍റെ പൊതുനില യു.ഡി.എഫിന്​ അനുകൂലമാണ്​.

സിറ്റിങ്​ എം.പി കേരള കോൺഗ്രസ്​-എമ്മിന്‍റെ തോമസ്​ ചാഴികാടനിലൂടെ മണ്ഡലം നിലനിർത്താനാകുമെന്ന്​ എൽ.ഡി.എഫ്​ പ്രതീക്ഷിക്കുമ്പോൾ എം.പിയെന്ന നിലയിൽ മുൻകാല പരിചയമുള്ള ​കേരള കോൺഗ്രസ്​ ജോസഫ്​ വിഭാഗത്തിന്‍റെ ഫ്രാൻസിസ്​ ജോർജിലൂടെ മണ്ഡലം തിരിച്ചുപിടിക്കാനാകുമെന്ന ഉറച്ച പ്രതീക്ഷയിലാണ്​ യു.ഡി.എഫ്​. ഈഴവ വോട്ടുകൾ സ്വാധീനം ചെലുത്തുന്ന മണ്ഡലത്തിൽ ബി.ഡി.ജെ.എസ്​ അധ്യക്ഷൻ തുഷാർ വെള്ളാപ്പള്ളി എൻ.ഡി.എക്കും പ്രതീക്ഷ നൽകുന്നു.

44 വർഷങ്ങൾക്കുശേഷം കേരള കോൺഗ്രസ്​ പാർട്ടികൾ തമ്മിലെ നേർക്കുനേർ പോരാട്ടമാണ്​ കോട്ടയത്ത്​ ഇത്തവണ. പ്രചാരണം അവസാന ഘട്ടത്തിലേക്ക്​ കടക്കുമ്പോൾ യു.ഡി.എഫ്​ ജില്ല ചെയർമാൻ രാജിവെച്ചത്​ ജോസഫ്​ വിഭാഗത്തിന്​ തിരിച്ചടിയായി. എന്നാൽ, മുതിർന്ന മാണി വിഭാഗം നേതാവായ മുൻ എം.എൽ.എ പി.എം. മാത്യു യു.ഡി.എഫ്​ സ്ഥാനാർഥിയുടെ പ്രചാരണത്തിനിറങ്ങിയത്​ കേരള കോൺഗ്രസ്​-എമ്മിനും പ്രഹരമായി.

14 സ്ഥാനാർഥികളാണ്​ മണ്ഡലത്തിൽ മാറ്റുരക്കുന്നത്​. 2019ലെ തെരഞ്ഞെടുപ്പിൽ യു.ഡി.എഫ്​ സ്ഥാനാർഥിയായി മത്സരിച്ചാണ്​ തോമസ്​ ചാഴികാടൻ ലക്ഷത്തിലേറെ വോട്ടിന്‍റെ ഭൂരിപക്ഷത്തിൽ വിജയിച്ചത്​. ഇപ്പോൾ മന്ത്രിയായ സി.പി.എമ്മിന്‍റെ വി.എൻ. വാസവനായിരുന്നു പ്രധാന എതിരാളി.

എന്നാൽ, ഇക്കുറി വാസവനാണ്​ ചാഴികാടന്‍റെ തെരഞ്ഞെടുപ്പിന്​ ചുക്കാൻപിടിക്കുന്നത്​. എന്നാൽ, ഫ്രാൻസിസ്​ ജോർജിൽ യു.ഡി.എഫിന്​ ഒരു സംശയവുമില്ല. അതേസമയം, ‘അവസരവാദ രാഷ്ടീയ’ത്തിന്‍റെ പ്രതീകമായി യു.ഡി.എഫ്​ സ്ഥാനാർഥിയെ ചിത്രീകരിക്കുന്ന പ്രചാരണം മറുവശത്ത്​ സജീവമാണ്​​.

ക്രിസ്ത്യൻ, നായർ വോട്ടുകളും മണ്ഡലത്തിൽ നിർണായകമാണ്. 12,54,823 വോട്ടർമാരാണ്​ മണ്ഡലത്തിലുള്ളത്​. ഇതിൽ 6,47,306 പേർ സ്ത്രീകളാണ്​. 6,07,502 പുരുഷന്മാരും 15 ട്രാൻസ്ജെൻഡർ വോട്ടർമാരുമുണ്ട്​. പുരുഷന്മാരേക്കാൾ 40,000ത്തോളം സ്​ത്രീവോട്ടർമാരാണ്​ കൂടുതൽ​.

കോട്ടയം ജില്ലയിലെ പുതുപ്പള്ളി, കോട്ടയം, ഏറ്റുമാനൂർ, വൈക്കം, കടുത്തുരുത്തി, പാലാ, എറണാകുളം ജില്ലയിലെ പിറവം നിയമസഭ മണ്ഡലങ്ങൾ ഉൾപ്പെടുന്നതാണ് മണ്ഡലം. ഈ മണ്ഡലങ്ങളുടെ പൊതുസ്വഭാവവും യു.ഡി.എഫിന്​ അനുകൂലമാണ്​. ഏഴ്​ മണ്ഡലങ്ങളിൽ അഞ്ചിലും യു.ഡി.എഫ്​ എം.എൽ.എമാരാണ്​. വൈക്കം, ഏറ്റുമാനൂർ മണ്ഡലങ്ങൾ മാത്രമാണ്​ എൽ.ഡി.എഫിനെ പിന്തുണക്കുന്നത്​.

പിറവം, പുതുപ്പള്ളി മണ്ഡലങ്ങളിലാണ്​ ഏറ്റവും കൂടുതൽ വോട്ടർമാരുള്ളത്​ എന്നതും യു.ഡി.എഫ്​ ക്യാമ്പിന്​ പ്രതീക്ഷ നൽകുന്നു. എന്നാൽ, രണ്ടില ചിഹ്നത്തിലാണ്​ എൽ.ഡി.എഫിന്​ ഏറെ പ്രതീക്ഷ. കോട്ടയത്തുകാർക്ക്​ ഏറെ പരിചിതമായ ചിഹ്നം ഗുണം ചെയ്യുമെന്ന്​ അവർ കണക്ക്​ കൂട്ടുന്നു.

സാധാരണക്കാരുടെ പ്രതീകമായ ഓട്ടോറിക്ഷ ലഭിച്ചത്​ യു.ഡി.എഫിന്‍റെ ആത്മവിശ്വാസം വർധിപ്പിക്കുന്നു. അതിനുപുറമെ ക്രിസ്ത്യൻ സഭകളുമായി സ്ഥാനാർഥിക്കുള്ള അടുത്ത ബന്ധവും ഗുണകരമാകുമെന്ന്​ യു.ഡി.എഫ്​ പ്രതീക്ഷിക്കുന്നു.

കേരള കോൺഗ്രസ്​-എമ്മിന്​ ചെയർമാൻ ജോസ്​ കെ. മാണിയുടെ രാജ്യസഭാംഗത്വം തുടരുന്നത്​ ഉൾപ്പെടെ കാര്യങ്ങൾ ഈ തെരഞ്ഞെടുപ്പ്​ ഫലത്തെ ആശ്രയിച്ചിരിക്കും. എൻ.ഡി.എയും വളരെ ഗൗരവത്തോടെയാണ്​ തെരഞ്ഞെടുപ്പിനെ കാണുന്നത്​. നായർ, ഈഴവ വോട്ടുകളുള്ള മണ്ഡലത്തിൽ ബി.ഡി.ജെ.എസ്​ അധ്യക്ഷൻ തുഷാർ വെള്ളാപ്പള്ളിയിലൂടെ മികച്ച മുന്നേറ്റം നടത്താനാകുമെന്ന പ്രതീക്ഷയിലാണവർ.

കഴിഞ്ഞ തവണ വാസവന്​ ലഭിച്ച ഈഴവ വോട്ടുകളിൽ നല്ലൊരുഭാഗം തുഷാറിന്​ ലഭിച്ചാൽ അത്​ തങ്ങൾക്ക്​ ഗുണകരമാകുമെന്ന്​ യു.ഡി.എഫും കണക്കുകൂട്ടുന്നു. രാഹുൽ ഗാന്ധിയുടെ സന്ദർശനവും പ്രതീക്ഷ വർധിപ്പിക്കുന്നു. വരുംദിവസങ്ങളിൽ മണ്ഡലത്തിലുണ്ടായേക്കാവുന്ന അടിയൊഴുക്കുകളാകും ഫലം നിർണയിക്കുക.