ഐ.എസ് വിരുദ്ധ ലഘുലേഖ വിതരണം; 40 മുജാഹിദ് പ്രവര്ത്തകർ അറസ്റ്റിൽ
text_fieldsപറവൂർ: ഗൃഹസന്ദർശന പരിപാടിയുടെ ഭാഗമായി ലഘുലേഖ വിതരണം ചെയ്ത 40 പേരെ മതവിദ്വേഷം പ്രചരിപ്പിച്ചെന്ന് ആരോപിച്ച് പൊലീസ് അറസ്റ്റ് ചെയ്തു. ലഘുലേഖ വിതരണം ചെയ്തവരെ ഇസ്ലാമിക തീവ്രവാദികളായി ചിത്രീകരിച്ച് ആർ.എസ്.എസ് പ്രവർത്തകർ ക്രൂരമായി മർദിച്ചു.
വിസ്ഡം ഗ്ലോബൽ ഇസ്ലാമിക് മിഷൻ എന്ന സംഘടനയുടെ പ്രവർത്തകരാണ് അറസ്റ്റിലായത്. ഞായറാഴ്ച രാവിലെ ഒമ്പതോടെയാണ് പറവൂരിെല വിവിധ ഭാഗങ്ങളിൽ ഗൃഹസന്ദർശനവും ലഘുലേഖ വിതരണവും ആരംഭിച്ചത്.
വടക്കേക്കര പഞ്ചായത്തിലെ മൂത്തകുന്നം, പുതിയകാവ് , കട്ടത്തുരുത്ത്, കൊട്ടുവള്ളിക്കാട് എന്നിവിടങ്ങളിലെ വീടുകൾ കേന്ദ്രീകരിച്ചായിരുന്നു ലഘുലേഖ വിതരണം. ഇതിനിടെ, സ്ഥലത്തെത്തിയ ആർ.എസ്.എസ്. പ്രവർത്തകർ തടഞ്ഞുനിർത്തി ചോദ്യം ചെയ്യുകയും ലഘുലേഖകൾ കൈക്കലാക്കി പരിശോധിച്ചശേഷം തീവ്രവാദ പ്രവർത്തനം നടത്തുന്നവരാെണന്ന് ആരോപിച്ച് മർദിക്കുകയുമായിരുന്നെന്ന് വിസ്ഡം ഗ്ലോബൽ പ്രവർത്തകർ പറഞ്ഞു. ചിലരെ പൊതിരെ തല്ലിയശേഷം വടക്കേക്കര പൊലീസിൽ ഏൽപിച്ചു. ബാക്കിയുള്ളവരെ വിവിധ സ്ഥലങ്ങളിൽനിന്ന് വാഹനങ്ങളിൽ വടക്കേക്കര സ്റ്റേഷനിലെത്തിച്ചു.
തീവ്രവാദ പ്രവർത്തനത്തിന് എത്തിയവരെ പിടികൂടിയെന്ന് സാമൂഹിക മാധ്യമങ്ങൾ വഴി പ്രചരിപ്പിച്ചതോടെ സ്റ്റേഷൻ പരിസരത്ത് ജനം കൂടി. കസ്റ്റഡിയിലായവർക്ക് പൊലീസ് സ്റ്റേഷന് മുന്നിലും മർദനമേറ്റു.ആലുവ റൂറൽ എസ്.പി എ.വി. ജോർജ്, ഡിവൈഎസ്.പി പ്രഫുല്ലചന്ദ്രൻ, സി.ഐ എം.കെ. മുരളി എന്നിവർ വടക്കേക്കര സ്റ്റേഷനിലെത്തി ചോദ്യം ചെയ്ത ശേഷമാണ് അറസ്റ്റ് രേഖപ്പെടുത്തിയത്.
മന്നം സ്വദേശി നിയാസ്(24), മാഞ്ഞാലി തെക്കേത്താഴം സ്വദേശി അബ്ദുല്ല, അടുവാശേരി സ്വദേശി നജീബ്(33),പള്ളിക്കര സ്വദേശി കെ.പി. അൻവർ(24), ഇടപ്പള്ളി വട്ടേക്കുന്നം സ്വദേശി പി.പി. ഇസ്മായിൽ, നീറിക്കോട് സ്വദേശി അൻസാർ കരിം(37), ഷിഹാബ് അബ്ദു (33), അബ്ദുൽ ഹമീദ്, വടക്കേക്കര പട്ടണം സ്വദേശി അബ്ദുൽ കരീം(55), ഏലൂർ കുറ്റിക്കാട്ടുകര സ്വദേശി യാസീൻ എന്നിവരുൾപ്പടെ 40 പേരാണ് അറസ്റ്റിലായത്.
സംഘം മതവിദ്വേഷം പ്രചരിപ്പിക്കുന്ന പ്രവർത്തനം നടത്തിയെന്ന് കാണിച്ച് മൂന്ന് പരാതികൾ ലഭിച്ചതായി ആലുവ റൂറൽ എസ്.പി എ.വി. ജോർജ് പറഞ്ഞു. ലഘുലേഖകൾ വിതരണം ചെയ്തവരെ കൈയേറ്റം ചെയ്തവർക്കെതിരെയും കേസെടുക്കുമെന്ന് എസ്.പി അറിയിച്ചു.
ഒരു ലഘുലേഖയിലെ പരാമർശം മതസ്പർധ വളർത്തുന്നതാണെന്നും പൊലീസ് പറയുന്നു. ഇന്ത്യൻ ശിക്ഷാ നിയമം 153എ പ്രകാരമാണ് കേസെടുത്തിട്ടുള്ളത്. സംഭവത്തിൽ പ്രതിഷേധിച്ച് മുസ്ലിം ഏകോപന സമിതിയുടെ നേതൃത്വത്തിൽ മുനമ്പം കവലയിൽ പ്രകടനം നടത്തി.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.