ആരാധക പ്രതിഷേധം കനക്കുന്നതിനിടെ രജനി സിംഗപൂരിലേക്ക്​

ചെന്നൈ: രാഷ്​ട്രീയ പാർട്ടി രുപീകരിക്കാനുള്ള തീരുമാനത്തിൽ നിന്ന്​ പിൻമാറിയതിനെ തുടർന്ന്​ ആരാധക പ്രതിഷേധം കനക്കുന്നതിനിടെ രജനികാന്ത്​ വിദേശത്തേക്ക്​ പോകുന്നു. ചികിത്സാർഥം വിദേശത്തേക്ക്​ പോകുന്നുവെന്നാണ്​ രജനിയുടെ വിശദീകരണം. ജനുവരി 14ന് രജനി സിംഗപ്പൂരിലേക്ക് തിരിക്കും. ആരാധ പ്രതിഷേധം ശക്​തമാകുന്ന സാഹചര്യത്തിലാണ്​ ചെന്നൈയിൽ നിന്ന്​ വിട്ടുനിൽക്കാനുള്ള തീരുമാനം.

ഡിസംബർ 31 ന്​ പുതിയ രാഷ്​ട്രീയ പാർട്ടി പ്രഖ്യാപിക്കുമെന്ന്​ രജനി നേരത്തെ അറിയിച്ചിരുന്നതാണ്​. രജനിയുടെ ആരാധക സംഘടനയിൽ ഇതനുസരിച്ചുള്ള മാറ്റം വരുത്തുകയും രാഷ്​ട്രീയ പ്രവർത്തന പരിചയമുള്ള രണ്ട്​ പേർക്ക്​ പുതിയ പാർട്ടിയുടെ ചുമതല നൽകുകയും ചെയ്​തു. ബി.ജെ.പി യുടെ അകമഴിഞ്ഞ സഹായം പരോക്ഷമായി ലഭിക്കുക കൂടി ചെയ്​തതോടെ പാർട്ടി പ്രഖ്യാപനം ഉണ്ടാകുമെന്നു തന്നെയായിരുന്നു രാഷ്​ട്രീയ നിരീക്ഷകരടക്കം കരുതിയിരുന്നത്​. എന്നാൽ, എല്ലാവരെയും അദ്​ഭുതപ്പെടുത്തിക്കൊണ്ട്​, തീരുമാനത്തിൽ നിന്ന്​ പിൻമാറുന്നതായി രജനി പ്രഖ്യാപിക്കുകയായിരുന്നു.

ഹൈദരാബാദിൽ സിനിമ ചിത്രീകരണത്തിനിടെ രജനിക്ക്​ രക്​തസമ്മർദത്തിൽ വ്യതിയാനമുണ്ടാകുകയും ആശുപത്രിയിൽ പ്രവേശിപ്പിക്കുകയും ചെയ്​തിരുന്നു. അതിന്​ ശേഷമാണ്​ രജനി പിൻമാറ്റം പ്രഖ്യാപിച്ചത്​. ദൈവം മുന്നറിയിപ്പ്​ നൽകിയതിനാൽ പിൻമാറുന്നുവെന്നായിരുന്നു വിശദീകരണം.

രജനികാന്ത് രാഷ്ട്രീയ പ്രവേശനത്തില്‍ നിന്ന് പിന്‍മാറിയതോടെ തമിഴ്നാട്ടില്‍ ആരാധകരുടെ വ്യാപക പ്രതിഷേധമാണ് ഉടലെടുത്തത്. വിവിധയിടങ്ങളില്‍ രജനികാന്തിന്‍റെ കോലം കത്തിച്ചു. രജനികാന്തിന്‍റെ ചെന്നൈയിലെ വീടിന്​ മുന്നിൽ ഒരു ആരാധകൻ ആത്മഹത്യക്ക് ശ്രമിക്കുകയും ചെയ്​തു. ചെന്നൈ സ്വദേശി മുരുകേശനാണ് തീകൊളുത്തി ആത്മഹത്യക്ക് ശ്രമിച്ചത്. പൊള്ളലേറ്റ മുരുകേശനെ സർക്കാർ ആശുപത്രിയിൽ പ്രവേശിപ്പിച്ചിട്ടുണ്ട്​.