‘രാഹുൽ ഗാന്ധി അടുത്ത മഹാത്മാഗാന്ധി’യെന്ന് കോൺഗ്രസ് നേതാവ്; ജ​നം സ​ഹി​ക്കി​ല്ലെ​ന്ന് ബി.ജെ.പി

രാ​ജ്കോ​ട്ട്: രാഹുൽ ഗാന്ധി അടുത്ത മഹാത്മാഗാന്ധിയാണെന്ന കോ​ൺ​ഗ്ര​സ് നേതാവിന്റെ പരാമർശം വിവാദമാക്കി ബി.ജെ.പി. ഗു​ജ​റാ​ത്തി​ലെ മു​ൻ കോ​ൺ​ഗ്ര​സ് എം.​എ​ൽ.​എ ഇ​ന്ദ്രാ​നി​ൽ രാ​ജ്ഗു​രുവിന്റെ പ്രസംഗത്തിനെതിരെയാണ് ബി.ജെ.പി രംഗത്തുവന്നത്.

‘നിങ്ങൾ വേണമെങ്കിൽ എന്റെ വാക്കുകൾ എഴുതിവെച്ചോളൂ... വരുംനാളുകളിൽ അടുത്ത മഹാത്മാഗാന്ധിയായി രാഹുൽ ഗാന്ധി ഉയർന്നുവരും. ഗാന്ധിജി അൽപ്പം കൗശലക്കാരനായിരുന്നു, രാഹുൽ ഗാന്ധിയാകട്ടെ തികച്ചും സത്യസന്ധനും ശുദ്ധഹൃദയനുമാണ്. രാഹുൽ ഗാന്ധിയെ നേതാവായി രാജ്യം അംഗീകരിച്ചിരിക്കുന്നു’ -എന്നായിരുന്നു രാജ്ഗുരു പറഞ്ഞത്.

ഇത് ഗാ​ന്ധി​ജി​യെ അ​ധി​ക്ഷേ​പി​ക്കു​ന്നതാണെന്ന് ബി.​ജെ.​പി ആരോപിച്ചു. മ​ഹാ​ത്മാ ഗാ​ന്ധി​ക്കെ​തി​രാ​യ ഇ​ത്ത​രം പ​രാ​മ​ർ​ശ​ങ്ങ​ൾ ജ​നം സ​ഹി​ക്കി​ല്ലെ​ന്ന് ഗു​ജ​റാ​ത്ത് ബി.​ജെ.​പി ഉ​പാ​ധ്യ​ക്ഷ​ൻ ഭ​ര​ത് ബോ​ഘ​റ പ​റ​ഞ്ഞു. ദൂ​ധ്സാ​ഗ​റി​ൽ ​മേ​യ് ഒ​ന്നി​ന് ന​ട​ന്ന പ​രി​പാ​ടി​യി​ൽ സം​സാ​രി​ക്ക​വെ​യാ​യിരുന്നു രാ​ജ്ഗു​രുവിന്റെ പ്ര​സ്താ​വ​ന.

വി​വാ​ദ​ത്തി​ന് വി​ശ​ദീ​ക​ര​ണ​വു​മാ​യി രാ​ജ്ഗു​രു എ​ത്തി. ‘ഇ​പ്പോ​ൾ ബി.​ജെ.​പി ബ്രി​ട്ടീ​ഷു​കാ​രെ​പ്പോ​ലെ​യാ​ണ് പ്ര​വ​ർ​ത്തി​ക്കു​ന്ന​ത്. അ​വ​ർ ജ​നാ​ധി​പ​ത്യം ത​ക​ർ​ക്കാ​ൻ ശ്ര​മി​ക്കു​ന്നു. ബി.​ജെ.​പി​ക്കെ​തി​രെ പോ​രാ​ടു​ന്ന​ത് രാ​ഹു​ൽ മാ​ത്ര​മാ​ണ് -മ​ഹാ​ത്മാ ഗാ​ന്ധി ബ്രി​ട്ടീ​ഷു​കാ​ർ​ക്കെ​തി​രെ പോ​രാ​ടി​യ​പോ​ലെ’ എന്നാണ് താൻ ഉദ്ദേശിച്ചതെന്ന് അ​ദ്ദേ​ഹം പ​റ​ഞ്ഞു.