കാറപകടത്തിൽ മാതാവും കുഞ്ഞും മരിച്ചു

ബംഗളൂരു: ജൽസൂർ-കാസർകോട് പാതയിൽ കാറപകടത്തിൽ മാതാവും കുഞ്ഞും മരിച്ചു. പരപ്പ സ്വദേശി ഷാനിന്റെ ഭാര്യ ഷാഹിന (28), മകൾ ഷജ (മൂന്ന്) എന്നിവരാണ് മരിച്ചത്. വിവാഹച്ചടങ്ങിൽ പങ്കെടുക്കാനുള്ള യാത്രക്കിടെ ആറംഗസംഘം സഞ്ചരിച്ച ഇന്നോവ കാർ നിയന്ത്രണംവിട്ട് അപകടത്തിൽപെടുകയായിരുന്നു.

കാർ റോഡരികിലെ മരത്തിലിടിച്ചതോടെ ഷാഹിനയും മകളും സംഭവസ്ഥലത്തുതന്നെ മരിച്ചു. മറ്റുനാലുപേർക്ക് ഗുരുതര പരിക്കേറ്റു. അപകടത്തിൽപെട്ടവരെ ആദ്യം കാസർകോട്ടെ ആശുപത്രിയിലും പിന്നീട് മംഗളൂരുവിലെ ആശുപത്രിയിലും പ്രവേശിപ്പിച്ചു. മാതാവിന്റെയും കുഞ്ഞിന്റെയും മൃതദേഹങ്ങൾ സുള്ള്യയിലെ ആശുപത്രിയിലേക്ക് മാറ്റി.