ഖാർഗെ: കർണാടകയിൽ നിന്നുള്ള ബുദ്ധവിശ്വാസി, സംഘ്പരിവാർ​ വിമർശകൻ

ബംഗളൂരു: കോൺഗ്രസിന്‍റെ പുതിയ പ്രസിഡന്‍റായി മപണ്ണ മല്ലികാർജുൻ ഖാർഗെ തിരഞ്ഞെടുക്കപ്പെടുമ്പോൾ അത്​ കർണാടകക്കും അഭിമാനനേട്ടം. എസ്​. നിജലിംഗപ്പക്ക്​ ശേഷം സംസ്ഥാനത്ത്​ നിന്ന്‌ ഈ സ്ഥാനത്തെത്തുന്ന രണ്ടാമത്തെയാളാണ്​ ദലിത് നേതാവായ അദ്ദേഹം. കർണാടകയിലെ ബിദർ ജില്ലയിലെ ഭൽകി താലൂക്കിൽ വരവട്ടിയിൽ 1942 ജൂലൈ 21ന്​ പാവപ്പെട്ട കുടുംബത്തിൽ ജനനം. പിതാവ്​ മപണ്ണ ഖാർഗെ. മാതാവ്​ സാബവ്വ. ബുദ്ധമതത്തിന്‍റെ ആശയങ്ങളാണ്​ പിന്തുടരുന്നത്​. ശാന്തശീലൻ, സൗമ്യമായ പെരുമാറ്റം. അഴിമതിയിൽ മുങ്ങിക്കുളിക്കുന്ന രാഷ്ട്രീയത്തിൽ ഇതുവരെ ആരോപണങ്ങളൊന്നും കേൾക്കേണ്ടി വന്നിട്ടില്ല. പാർട്ടിയിലെ വിഭാഗീയതയിലൊന്നും ഖാർഗെ എന്ന പേര്​ കേൾക്കാറുമില്ല. ബി.എ പഠനത്തിന്​ ശേഷം നിയമവും പഠിച്ച അ​ദ്ദേഹം രാഷ്ട്രീയത്തിൽ വരുന്നതിന്​ മുമ്പേ അഭിഭാഷകനായും പ്രാക്ടീസ്​ ചെയ്തു.

1969ൽ ഗുൽബർഗ സിറ്റി കോൺഗ്രസ്​ കമ്മിറ്റി പ്രസിഡന്‍റായാണ്​ രാഷ്ട്രീയപ്രവേശനം. 72ൽ നിയമസഭതെര​ഞ്ഞെടുപ്പിൽ മൽസരിച്ച്​ വിജയിച്ചു. ഡി. ദേവരാജ്​ മന്ത്രിസഭയിൽ ആദ്യമായി മ​ന്ത്രിയുമായി. പിന്നീട്​ എട്ട്​ തവണ തുടർച്ചയായി കർണാടക നിയമസഭാംഗമായി. 1978, 90, 99 വർഷങ്ങളിൽ സംസ്ഥാന​ത്തെ കോൺഗ്രസ്​ സർക്കാറുകളിൽ മന്ത്രിയായി. 96, 2008 വർഷങ്ങളിൽ നിയമസഭ പ്രതിപക്ഷനേതാവുമായി. 2005 മുതൽ മൂന്നുവർഷം കോൺഗ്രസ്​ സംസ്ഥാനപ്രസിഡന്‍റുമായി. 99ലും 2004ലും അദ്ദേഹത്തിന്‍റെ പേര് മുഖ്യമന്ത്രിസ്ഥാനത്തേക്ക് നിർദേശിക്കപ്പെട്ടിരുന്നു. 2009ൽ ലോക്സഭ എം.പി ആകുന്നതോടെയാണ്​​ ദേശീയരാഷ്ട്രീയത്തിൽ സജീവമായത്​. മൻമോഹൻ സിങിന്‍റെ നേതൃത്വത്തിലുള്ള കേന്ദ്രസർക്കാറിൽ മന്ത്രിയുമായി.

വിട്ടുവീഴ്ചയില്ലാത്ത സംഘ്​പരിവാർ വിമർശകനാണ്​. 2014ൽ കോൺഗ്രസ്​ തകർന്നടിഞ്ഞ്​ ലോക്സഭയിൽ 44 അംഗങ്ങൾ മാത്രമായി പാർട്ടി ചുരുങ്ങിയ കാലം. ഗുൽബർഗയിൽ നിന്ന്​ എം.പിയായി തെരഞ്ഞെടുക്കപ്പെട്ട ഖാർഗെ കോൺഗ്രസിന്‍റെ ലോക്സഭ നേതാവായിരുന്നു. അന്ന്​ ഭരണകക്ഷിയായ ബി.ജെ.പിയുടെ മുഖത്ത്​ നോക്കി ഖാർഗെ നടത്തിയ പ്രസ്താവന ഏറെ പ്രസിദ്ധമായിരുന്നു. 'ഞങ്ങൾ 44 പേരെ ഉള്ളൂ. എന്നാൽ നൂറുകണക്കിന്​ കൗരവർക്ക്​ മുന്നിൽ പാണ്ഡവർ ഭയപ്പെടുന്ന പ്രശ്നമേ ഇല്ല'-മഹാഭാരതത്തെ അടിസ്ഥാനമാക്കി അദ്ദേഹം വെട്ടിത്തുറന്നുപറഞ്ഞു. പിന്നീടുള്ള അഞ്ചുവർഷം ഭരണകക്ഷിക്കെതിരെ മയമില്ലാത്ത പോരാട്ടമാണ്​ ഖാർഗെ ലോക്സഭയിൽ നടത്തിയത്​. രണ്ടുതവണ കലബുറഗി മണ്ഡലത്തെ ലോക്‌സഭയിൽ പ്രതിനിധാനംചെയ്തു. പക്ഷേ, കഴിഞ്ഞതവണ തോൽവിയറിഞ്ഞു.

ഭാര്യ: രാധാഭായ്​. രണ്ട്​ പെൺകുട്ടികളും മൂന്ന്​ ആൺകുട്ടികളുമുണ്ട്​. അധികാരം നഷ്ടപ്പെട്ടെങ്കിലും കോൺഗ്രസിന്​ ഇപ്പോഴും വൻശക്​​തിയുള്ള കർണാടകയിലെ പാർട്ടിക്കും അദ്ദേഹത്തിന്‍റെ സ്ഥാനലബ്​ധി കരുത്തുകൂട്ടും. അടുത്ത ഏപ്രിൽ-മേയ് മാസങ്ങളിൽ നിയമസഭാ തെരഞ്ഞെടുപ്പ്​ നടക്കുന്ന സാഹചര്യത്തിൽ പ്രത്യേകിച്ചും.