വിജയദശമിയിൽ കാവിയണിഞ്ഞ്​ ​കർണാടക പൊലീസ്​; കൈയിൽ ത്രി​ശൂലം കൂടി പിടിക്കാമെന്ന്​ കോൺഗ്രസ്​

ബംഗളൂരു: കർണാടകയിൽ രാഷ്​ട്രീയ കൊടുങ്കാറ്റിന്​ തുടക്കമിട്ട്​ വിജയദശമി ദിനത്തിൽ പൊലീസുകാരുടെ കാവി വസ്​ത്രധാരണം. വിജയപുര, ഉഡുപ്പി പൊലീസ്​ ഉദ്യോഗസ്​ഥർ കാവി വസ്​ത്രം അണിഞ്ഞ്​ നിൽക്കുന്ന ചിത്രം സമൂഹമാധ്യമങ്ങളിൽ വൈറലായി.

കർണാടകയെ ബി.ജെ.പി 'ഉത്തർപ്രദേശിനെപ്പോലെ കാട്ടുഭരണത്തിലേക്ക്​' നയിക്കുകയെന്നായിരുന്നു കോൺഗ്രസിന്‍റെ പ്രതികരണം. ഒക്​ടോബർ 14ലെയാണ്​ ചിത്രങ്ങൾ. വിജയപുര പൊലീസിൽ എസ്​.പി ഉൾപ്പെടെ വെള്ള വസ്​ത്രങ്ങളും കുങ്കുമ ഷാളുകളും അണിഞ്ഞ്​ നിൽക്കുന്നത്​ കാണാം.

ഉഡുപ്പിയിലെ കൗപ്പ്​ ​െപാലീസ്​ സ്​റ്റേഷനിൽ ഉദ്യോഗസ്​ഥർ കുങ്കുമ ഷർട്ടും വെള്ള ദോത്തിയും ഷാളും അണിഞ്ഞുനിൽക്കുന്നതാണ്​ ചിത്രങ്ങൾ. വനിത പൊലീസുകാർ കുങ്കുമനിറത്തിലെ സാരിയും അണിഞ്ഞിട്ടുണ്ട്​.

ചിത്രങ്ങൾ വൈറലായതോടെ പ്രതികരണവുമായി നിരവധി നേതാക്കൾ രംഗത്തെത്തി. കർണാടക ബി.ജെ.പി സർക്കാർ പൊലീസിനെയും ഭരണസംവിധാനത്തെയും കാവിവൽക്കരിക്കാൻ ശ്രമിക്കു​ന്നുവെന്നായിരുന്നു നേതാക്കളുടെ ആരോപണം.

ബി.ജെ.പി സർക്കാർ കർണാടകയെ ഉത്തർപ്രദേശ്​ മോഡൽ കാട്ടുഭരണത്തിലേക്ക്​ നയിക്കുകയാണെന്ന്​ കോൺഗ്രസ്​ നതോവ്​ സിദ്ധരാമയ്യ ആരോപിച്ചു. കൂടാതെ മുഖ്യമന്ത്രി ബസവരാജ്​ ബൊമ്മൈയുടെ രാജിയും ആവശ്യപ്പെട്ടു.

'മിസ്റ്റർ ബൊമ്മൈ, നിങ്ങ​ൾ എന്തിനാണ്​ പൊലീസിന്‍റെ യൂണിഫോം മാത്രം മാറ്റിയത്​. അവർക്ക്​ ഒരു ത്രിശൂലവും അക്രമം നടത്താനുള്ള അനുമതിയും കൂടി നൽകുക. അതിലൂടെ ജംഗിൾ രാജ്​ സ്​ഥാപിക്കാനുള്ള നിങ്ങളുടെ സ്വപ്​നം പൂർത്തീകരിക്കും' -സിദ്ധരാമയ്യ ട്വീറ്റ്​ ചെയ്​തു.

വിമർശനവുമായി കർണാടക കോൺഗ്രസ്​ പ്രസിഡന്‍റ്​ ഡി.കെ. ശിവകുമാറും രംഗത്തെത്തി. ഭരണഘടനക്ക്​ അനുസൃതമായി ക്രമസമാധാനം ഉറപ്പുവരുത്തുന്നതിന്​ നമ്മുടെ പൊലീസുകാർ ബാധ്യസ്​ഥരാണ്​. ഒരു രാഷ്​ട്രീയ പാർട്ടിയുടെ നിറത്തിലേക്ക്​മാറുന്നതിലൂടെ കർണാടക പൊലീസ്​ എന്തുതരം മാതൃകയാണ്​ ഉയർത്തിക്കാട്ടുന്നത്​. കർണാടക മുഖ്യമന്ത്രിയും ഡി.ജി.പിയും ഈ ഗുര​ുതരമായ കാര്യത്തിലേക്ക്​ ശ്രദ്ധ തിരിക്കണം' -ഡി.കെ. ശിവകുമാർ ട്വീറ്റ്​ ചെയ്​തു.