സിംഘു അതിർത്തിയിൽ​ കോൺഗ്രസ്​ എം.പിക്കെതിരെ ആക്രമണം; തലപ്പാവ്​ വലിച്ചൂരി

ന്യൂഡൽഹി: ഡൽഹിയിലെ സിംഘു അതിർത്തിയിൽ ജൻ സൻസദ്​ പരിപാടിക്കിടെ കോൺഗ്രസ് എം.പിയെ ആക്രമിക്കാൻ ശ്രമിച്ചതായി ആരോപണം. ​പരിപാടിക്കിടെ തന്നെ തള്ളിയിട്ടുവെന്നും തലപ്പാവ്​ വലിച്ചൂരിയെന്നും രവനീത്​ സിങ്​ ബിട്ടു എം.പി പറഞ്ഞു.

ലുധിയാന എം.പിയായ ഇദ്ദേഹത്തിന്‍റെ വാഹനം ഗുരു തേജ്​ ബഹദൂർ ജി മെമോറിയലിൽ വെച്ച്​ ആ​ക്രമിക്കുകയും ചെയ്​തു. കോൺഗ്രസിന്‍റെ അമൃത്​സർ എം.പി ഗുർജീത്​ സിങ്​ ഓജിലക്കും എം.എൽ.എ കുൽബീർ സിങ്​ സിരക്കുമൊപ്പം ഞായറാഴ്​ച പരിപാടിയിൽ പ​െങ്കടുക്കാനെത്തിയതായിരുന്നു ഇദ്ദേഹം.

'ചിലർ പതിയിരുന്നത്​ വടിയും ആയുധങ്ങളും ഉപയോഗിച്ച്​ തങ്ങളെ ആക്രമിക്കാൻ ശ്രമിക്കുകയായിരുന്നു. കൃത്യമായി ആസൂത്രണം ചെയ്​തായിരുന്നു അവർ എത്തിയത്​. കർഷക പ്രക്ഷോഭം തങ്ങൾ കാരണം തടസപ്പെടരുതെന്ന്​ കരുതിയതിനാൽ ഉടൻ തന്നെ അവിടെനിന്ന്​ മടങ്ങി' -രവനീത്​​ സിങ് പറഞ്ഞു.

മെമോറിയലിന്​ അടുത്തെത്തിയപ്പോൾ ചിലർ എന്നെ തള്ളിയിടുകയും തലപ്പാവ്​ വലിച്ചൂരുകയുംചെയ്​തു. കുൽബീർ സിങ്ങിന്‍റെ തലപ്പാവ്​ വലിച്ചൂരി. അനിഷ്​ട സംഭവം ശ്രദ്ധയിൽപ്പെട്ടതോടെ ചിലർ തങ്ങളെ വളഞ്ഞ്​ വാഹനത്തിന്​ സമീപം എത്താൻ സഹായിക്കുകയായിരുന്നു. വാഹനത്തിനകത്ത്​ കയറിയപ്പോൾ വടിയും മറ്റും ഉപയോഗിച്ച്​ വാഹനം തകർത്തതായും അദ്ദേഹം കൂട്ടിച്ചേർത്തു. ആക്രമണത്തിന്‍റെ കാരണം വ്യക്തമല്ല. അതേസമയം, സംഭവത്തെക്കുറിച്ച്​ ഇതുവരെ ഔദ്യോഗിക പരാതി ലഭിച്ചിട്ടില്ലെന്ന്​ പൊലീസ്​ പറഞ്ഞു. ​