ഗ്രാമത്തിലെ എല്ലാവരും ജനിച്ചത്​ ജനുവരി ഒന്നിന്​

ഹരിദ്വാർ: ഉത്തരാഖണ്ഡിലെ ഹരിദ്വാറിൽ ഒരു​ഗ്രാമത്തി​ൽ കഴിയുന്നവരെല്ലാം ജനിച്ചത്​ ജനുവരി ഒന്നിനെന്ന്​ ആധാർ രേഖ. ഗയിൻദി ഖട്ട ഗ്രാമത്തിലെ 800 ലധികം പേരുടെ ആധാർ കാർഡിലാണ്​ ജനുവരി ഒന്ന്​ ജനന തീയതിയായി രേഖപ്പെടുത്തിയിരിക്കുന്നത്​. അപേക്ഷകർക്ക്​ തങ്ങളുടെ യഥാർഥ ജനനതീയതി അറിയാത്തതോ, വിവരങ്ങൾ കയറ്റുന്നതിൽ അധികൃതരുടെ ഭാഗത്തുനിന്നുള്ള പിശകോ ആണ്​ ഇത്തരത്തിലുള്ള തെറ്റിന്​ കാരണമായതെന്നാണ്​ സൂചന.

ജനന തീയതി രേഖപ്പെടുത്തിയ ഒൗദ്യോഗിക രേഖകൾ നോക്കി വേണം ആധാറിൽ അത്​ ​ഉൾപ്പെടുത്താൻ. എന്നാൽ പ്രായം തെളിയിക്കുന്നതിനുള്ള ഒൗദ്യോഗിക ​രേഖകൾ ഇല്ലാത്തവരുടെ ആധാറിലാണ്​ ജനുവരി ഒന്ന്​ ജനന തീയതിയായി​ അച്ചടിച്ചുവന്നിരിക്കുന്നത്​.

ആധാര്‍ എൻറോൾമ​െൻറ്​ സേവനം നല്‍കിയ സ്വകാര്യ ഏജന്‍സിക്ക്​ സംഭവിച്ച പിഴവാണെന്നും സംഭവത്തിൽ അന്വേഷണം നടത്തുമെന്നും ഹരിദ്വാർ സബ്​​ ഡിവിഷൻ മജിസ്​ട്രേറ്റ്​ മനീഷ്​ കുമാർ അറിയിച്ചു. 

ആധാർ കാർഡിൽ ഇതേ തെറ്റുവരുന്നത്​ ആദ്യമല്ല. മേയിൽ രാജസ്ഥാനിലെ ജെയ്​സാൽമീറിൽ 250 പേരുടെ ജനന തീയതി ജനുവരി ഒന്നായി രേഖപ്പെടുത്തിയിരുന്നു.