തകരാർ കാരണം തീപിടിക്കാൻ സാധ്യത; എന്നാൽ തിരിച്ചുവിളിക്കാനുമാവില്ല, വാഹന നിർമാതാവ്​ പ്രതിസന്ധിയിൽ

നിർമാണം കഴിഞ്ഞ വാഹനങ്ങളിൽ തകരാർ കണ്ടെത്തിയാൽ അത്​ പരിഹരിക്കാനുള്ള മാർഗമാണ്​ തിരിച്ചുവിളിക്കൽ. നിലവിലുള്ള വലുതും ചെറുതുമായ എല്ലാ വാഹന നിർമാതാക്കളും കാലാകാലങ്ങളിൽ ഇത്തരം തിരിച്ചുവിളിക്കലുകൾ നടത്താറുണ്ട്​. ജർമൻ വാഹന ഭീമനായ ബെൻസ്​ ഇപ്പോൾ മറ്റൊരു പ്രതിസന്ധിയിലാണ്​. തകരാർ കണ്ടെത്തിയിട്ടും വാഹനം തിരിച്ചുവിളിച്ച്​ പരിഹാരം കണ്ടെത്താനാവുന്നില്ല എന്നതാണാ പ്രതിസന്ധി.

തീരെ നിസാരമല്ല തകരാർ എന്നതും ബെൻസിനെ വിഷമിപ്പിക്കുന്നുണ്ട്​. ചിലപ്പോൾ ഒാടുന്ന വാഹനത്തിന്​ തീപിടിക്കാൻവരെ സാധ്യതയുണ്ടെന്നാണ്​ ബെൻസ്​ എഞ്ചിനീയർമാർ പറയുന്നത്​. ഒന്നും രണ്ടുമല്ല ഏകദേശം 800,000 ബെൻസ് വാഹനങ്ങളെ തകരാർ ബാധിച്ചതായാണ്​ റിപ്പോർട്ട്. വാഹനങ്ങളിലെ സാങ്കേതിക തകരാർ മൂലം തീപിടുത്തമുണ്ടാകാൻ സാധ്യതയുള്ളതായി കാർ ഉടമകളെ ബെൻസ്​ തന്നെ അറിയിച്ചിട്ടുണ്ട്. എന്നാൽ പ്രശ്നം തൽക്കാലം പരിഹരിക്കാനാവില്ലെന്നാണ്​ കമ്പനി പറയുന്നത്​. തകരാർ പരിഹരിക്കാൻ ആവശ്യമായ ഭാഗങ്ങൾ ലഭ്യമല്ലാത്തതാണ്​ പ്രശ്നം. കോവിഡ് മൂലം ഉയർന്നുവന്ന ആഗോള വിതരണ ശൃംഖല പ്രതിസന്ധിയാണ് വാഹനങ്ങൾ തിരിച്ചുവിളിക്കുന്നതിലെ കാലതാമസത്തിന് കാരണം.

പ്രശ്നം കൂളന്‍റ്​ പമ്പിൽ

കൂളന്റ് പമ്പിലെ ചോർച്ചയാണ്​ ബെൻസ്​ വാഹനങ്ങളിലെ പ്രശ്നകാരണം. കൂളന്‍റ്​ ചോരുന്നതോടെ വിവിധ ഘടകങ്ങൾ ചൂടാവുകയും തീപിടുത്തത്തിന്​ കാരണമാവുകയും ചെയ്യും. ബെൻസിന്‍റെ ജി.എൽ.ഇ, ജി.എൽ.എസ്​, സി ക്ലാസ്​, ഇ ക്ലാസ്, എസ്​ ക്ലാസ്, ഇ ക്ലാസ് കൂപ്പെ, ഇ ക്ലാസ് കൺവെർട്ടിബിൾ തുടങ്ങിയ മിക്കവാറും എല്ലാ മോഡലുകളിലും പ്രശ്നം റിപ്പോർട്ട്​ ചെയ്തിട്ടുണ്ട്​. 2017 ജനുവരിക്കും 2021 ഒക്‌ടോബറിനും ഇടയിലാണ് ഈ വാഹനങ്ങൾ നിർമ്മിച്ചത്.

ആവശ്യമായ ഘടകങ്ങൾ ലഭ്യമാകുന്നമുറയ്ക്ക് കാറുകൾ തിരിച്ചുവിളിക്കുമെന്നാണ്​ നിലവിൽ വാഹന ഉടമകളെ ബെൻസ്​ അറിയിച്ചിരിക്കുന്നത്​. ജനുവരി പകുതിയോടെ തിരിച്ചുവിളിക്കൽ പ്രക്രിയ ആരംഭിക്കും. അപകടസാധ്യതയുള്ള വാഹന ഉടമകൾക്ക്​ അയച്ച കത്തിൽ ചില നിർദേശങ്ങൾ കമ്പനി നൽകിയിട്ടുണ്ട്​. കാറുകളുടെ ഉപയോഗം പരമാവധി കുറയ്ക്കണമെന്നും വേഗതയിലും ഡ്രൈവിങ്​ രീതിയിലും മാറ്റംവരുത്തണമെന്നും ബെൻസ്​ പറയുന്നു.