You are here

16 വർഷങ്ങളുടെ വേർപാടിനിപ്പുറം  സഹോദരങ്ങളുടെ സമാഗമം

  • സുഡാനി യുവാവ്​ മലയാളി സഹോദരിയെ കാണാൻ ദുബൈയിൽ

ദുബൈ: ഷാർജ വിമാനത്താവളത്തിൽ കാത്തിരിന്ന ഒാരോ മിനിറ്റും മണിക്കൂറുകൾ പോലെ തോന്നിച്ചു സമീറക്ക്​. പതിനാറു വർഷങ്ങൾക്ക്​ മുൻപ്​ കൈവിട്ടുപോയ കുഞ്ഞനുജൻ ഹനി വന്നിറങ്ങുന്നതും കാത്തിരിക്കുകയായിരുന്നു അവർ.  വിമാനത്താവളത്തിൽ നിന്നിറങ്ങി ഒരു പാട്​ നേരം അവർ പരസ്​പരം നോക്കി നിന്നു. തങ്ങൾ ഒരുമിച്ചുവെന്ന്​ ഹനിക്കും സമീറക്കും വിശ്വസിക്കാനായില്ല. കുഞ്ഞായിരുന്നപ്പോഴുള്ള അവ​​െൻറ സംസാര ശൈലിയും ചിരിയുമെല്ലാം സമീറയുടെ മനസിൽ തെളിഞ്ഞു.  കുഞ്ഞാങ്ങള അറബ്​ ശൈലിയിൽ പേരു ചൊല്ലി വിളിച്ചപ്പോൾ  പറഞ്ഞു കൊടുത്തു, ഞാൻ ഇത്താത്തയാണ്​ എന്നെ അങ്ങിനെ വിളിക്കണം നീ.

സമാഗമത്തി​െൻ ആഹ്ലാദം കണ്ടു നിന്നവരുടെയൂം കണ്ണുകൾ നിറഞ്ഞു. സുഡാനിൽ നിന്ന്​ കോഴിക്കോട്​ പെരുമണ്ണയിലെത്തി വിവാഹം കഴിച്ച പിതാവ്​ ഉമ്മ നൂർജഹാനെയും  സഹോദരങ്ങളെയും ഉപേക്ഷിച്ച്​   കൊണ്ടു പോകു​േമ്പാൾ ഹനി നടക്കാവിലെ നഴ്​സറിയിൽ  പഠിക്കുകയായിരുന്നു. ​ പിന്നീട്​ നാടുമായി ഒരുതരത്തിലൂം ബന്ധപ്പെടാൻ കഴിഞ്ഞിരുന്നില്ല. അനിയനെ ഇനി ഒരിക്കലും കാണാനാവില്ല എന്ന്​ ഉറപ്പിച്ചിരുന്നു സമീറയും സഹോദരിമാരും. 
എന്നാൽ  ഉമ്മയുടെ പണ്ടത്തെ ഫോ​േട്ടായും  വിവാഹ സർട്ടിഫിക്കറ്റും മറ്റു വിവരങ്ങളുമെല്ലാം പിതാവി​​െൻറ ശേഖരത്തിൽ നിന്ന്​ കണ്ടെടുത്ത ഹനി സുഡാൻ സന്ദർ​ശിച്ച മണ്ണാർക്കാട്​ സ്വദേശി ഫാറൂഖിന്​ നൽകിയതാണ്​ വഴിത്തിരിവായത്​. മറ്റൊരു വിവാഹം ചെയ്​ത പിതാവ്​ തന്നെ വല്ലാതെ അവഗണിക്കുകയാണെന്നും ഉമ്മയുടെ അരികിൽ എത്താൻ ആ​ഗ്രഹമുണ്ടെന്നും ഇയാൾ പറഞ്ഞിരുന്നു. 

 ഫാറൂഖ്​ നൽകിയ വിവരങ്ങൾ അബൂദബിയിലുള്ള സുഹൃത്ത്​ റഹീം പൊയിൽ  സാമൂഹിക മാധ്യമങ്ങളിലൂടെ പങ്കുവെച്ചു. സുഡാനി യുവാവ്​ കേരളത്തിലുള്ള ഉമ്മയെ തേടുന്നു എന്ന വിവരമറിഞ്ഞ്​ ഇൗ കുടുംബത്തി​​െൻറ ബന്ധുക്കളിലൊരാളായ  ഷിഹാബ്​ കാര്യങ്ങൾ തിരക്കി സ്​ഥിരീകരിക്കുകയായിരുന്നു. വർഷങ്ങളായി കരഞ്ഞു കാത്തിരിക്കുന്ന മകനെ കണ്ടെത്തി​െയന്ന നിറ സന്തോഷ വർത്തമാനം കോഴിക്കോടുള്ള വീട്ടിലിരുന്ന്​ ഉമ്മ നൂർജഹാൻ കേട്ടു. 
ജീവിത കഷ്​ടപ്പാടിന്​ അൽപമെങ്കിലും ആശ്വാസമാവാൻ ദുബൈയിൽ ഒരു കടയിൽ ജോലി ചെയ്​തു വരുന്ന സഹോദരിയും മറ്റു ചില ബന്ധുക്കളും മുൻകൈയെടുത്താണ്​ പിതാവ്​ അറിയാതെ ഹനിയെ മൂന്നു മാസത്തെ സന്ദർ​ശക വിസയിൽ യു.എ.ഇയിൽ എത്തിച്ചത്​. കൈയിൽ അവശേഷിച്ചിരുന്ന പൊന്നെല്ലാം അമൂല്യമായ സഹോദരബന്ധം തിരിച്ചുപിടിക്കാനായി അവർ ചെലവിട്ടു. 

ഉമ്മയുമായി വീഡിയോ ​കാൾ ചെയ്​ത ഹനിക്ക്​ ഉടനെ കേരളത്തിലെത്തി  നേരിൽ കാണണമെന്ന്​ മോഹമുണ്ട്​.  പക്ഷെ  വാടകവീട്ടിലെ അവസ്​ഥ അതിന്​ തടസമാണ്​. സന്ദർശക വിസ കാലാവധി തീരുന്നതിനകം യു.എ.ഇയിൽ ഒരു ജോലി സംഘടിപ്പിച്ച ശേഷം ഉമ്മയെ സന്ദർ​ശിക്കാനാണ്​ സുഹൃത്തുക്കളുടെ ഉപദേശം. ഒരിക്കലും കാണാനാവില്ലെന്ന്​ കരുതിയ അനുജനെ കൺമുന്നിലെത്തിച്ചു തന്ന ദൈവകാരുണ്യം തുടർന്നുമുണ്ടാകും എന്ന ഉറച്ച വിശ്വാസത്തിലാണ്​ സമീറ.

COMMENTS