നാലര പതിറ്റാണ്ട്​ ഒരേ ഒരു സ്ഥാപനത്തിൽ ജോലി​; ഷാഹുൽ ഹമീദ് മടങ്ങുന്നു

ജിദ്ദ: സൗദിയിൽ 45 വർഷവും ഒരേ സ്ഥാപനത്തിൽ ജോലി ചെയ്​ത മംഗലാപുരം സ്വദേശി സയ്യിദ് ഷാഹുൽ ഹമീദ് പ്രവാസം അവസാനിപ്പിച്ച് മടങ്ങുന്നു. ഇത്രയും ദീര്‍ഘകാലം ഒരേ കമ്പനിയിൽ ജോലി ചെയ്യാന്‍ സാധിച്ചത് ഒരു അപൂർവതയായി മാറിയിരിക്കുകയാണ്​. സൗദിയിലെ ജുബൈൽ, ജിദ്ദ, അൽ ഖോബാർ, റിയാദ് എന്നിവിടങ്ങളില്‍ ഇതേ കമ്പനിയുടെ ബ്രാഞ്ചുകളിൽ അദ്ദേഹം സേവനമനുഷ്ഠിച്ചു. അവസാനം സ്വന്തം ഇഷ്​ടപ്രകാരം വിരമിച്ചാണ്​ മടക്കം.

സാമൂഹികപ്രവർത്തകൻ കൂടിയായ അദ്ദേഹം ഐ.എം.സി.സി ജി.സി.സി കമ്മിറ്റിയുടെ മുഖ്യരക്ഷാധികാരിയും മുൻ ട്രഷററും സൗദി നാഷനൽ കമ്മിറ്റി മുൻ പ്രസിഡൻറും ആയിരുന്നു. ഐ.എൻ.എൽ രൂപവത്​കരണകാലം മുതൽ അദ്ദേഹം ഐ.എം.സി.സിയുടെ നേതൃത്വത്തില്‍ പ്രവർത്തിച്ച്​ തുടങ്ങിയിരുന്നു. മംഗലാപുരം കേന്ദ്രീകരിച്ച് പ്രവര്‍ത്തിക്കുന്ന ജംഇയ്യത്തുൽ ഫലാഹ് ഉൾപ്പടെയുള്ള മറ്റ് സാംസ്കാരിക കൂട്ടായ്മകളുടേയും സ്ഥാപകരിലൊരാളും സൗദിയിലെ കർണാടക പ്രവാസികൾക്കിടയിലെ സജീവ സംഘാടകനുമായിരുന്നു അദ്ദേഹം.

ഐ.എം.സി.സി ജി.സി.സി കമ്മിറ്റി അദ്ദേഹത്തിന്​ യാത്രയയപ്പ് നൽകി. പ്രഫ. എ.പി. അബ്​ദുൽ വഹാബ് യോഗം ഉദ്ഘാടനം ചെയ്തു. ഒരേ കമ്പനിയിലെ നീണ്ട നാലര പതിറ്റാണ്ട് കാലത്തെ സേവനം അദ്ദേഹത്തി​െൻറ സത്യസന്ധ്യതയും അർപ്പണ മനോഭാവവുമാണ്​ തെളിയിക്കുന്നതെന്നും ഇത് പ്രവാസികളുൾപ്പടെ എല്ലാവർക്കും മാതൃകയാക്കേണ്ട കാര്യമാണെന്നും എ.പി. അബ്​ദുൽ വഹാബ് പറഞ്ഞു. ഐ.എം.സി.സി ജി.സി.സി കമ്മിറ്റി ചെയർമാൻ എ.എം. അബ്​ദുല്ല കുട്ടി അധ്യക്ഷത വഹിച്ചു.

ഐ.എൻ.എൽ സംസ്ഥാന ആക്റ്റിങ് പ്രസിഡൻറ്​ കെ.പി. ഇസ്മാഈൽ, സി.പി. നാസർ കോയ തങ്ങൾ, ഓർഗനൈസിങ് സെക്രട്ടറി എൻ.കെ. അബ്​ദുൽ അസീസ്, ഐ.എന്‍എ.ൽ സംസ്ഥാന സെക്രട്ടറി സത്താര്‍ കുന്നിൽ, സൗദി ഐ.എം.സി.സി മുൻ പ്രസിഡൻറ്​ കെ.പി. അബൂബക്കർ, ഷരീഫ് താമരശ്ശേരി, ഹമീദ് മധൂർ (കുവൈത്ത്), കാസിം മലമ്മൽ (ബഹ്​റൈൻ), റഷീദ് താനൂർ (യു.എ.ഇ), മൻസൂർ കൊടുവള്ളി, മജീദ് ചിത്താരി, നംശീർ ബഡേരി, ബഷീർ വളാഞ്ചേരി, നിസാർ എലത്തൂർ, ഗഫൂർ (ഖത്തർ), എ.പി.എ. ഗഫൂർ, മൻസൂർ വണ്ടൂർ, ഇബ്രാഹിം വേങ്ങര (ജിദ്ദ), മുഫീദ് കൂരിയാടൻ, ഒ.സി. നവാഫ് (ദമ്മാം), ഷരീഫ്​ കൊളവയൽ, നിസാം തൃക്കരിപ്പൂര്‍, ആഷിക് മലപ്പുറം, നിസാം തിരുവനന്തപുരം (യു.എ.ഇ) എന്നിവർ സംസാരിച്ചു. സയ്യിദ് ഷാഹുൽ ഹമീദ് മറുപടി പ്രസംഗം നടത്തി. ഐ.എം.സി.സി ജി.സി.സി കമ്മിറ്റി ജനറൽ കൺവീനർ പി.പി. സുബൈർ സ്വാഗതവും ട്രഷറർ പുളിക്കൽ മൊയിതീൻ കുട്ടി നന്ദിയും പറഞ്ഞു.