പ്രാർത്ഥനകൾ വിഫലം; ദമ്മാമിലെ കലാകാരൻ ജോബി.ടി ജോർജ്ജ്​ നിര്യാതനായി

ദമ്മാം: അർബുദ ബാധയെത്തുടർന്ന്​ ദമ്മാമിൽ ചികിൽസയിലായിരുന്ന അഭിനേതാവും, കലാകാരനുമായ കൊല്ലം തിരുത്തിക്കര ജോബി ടി. ജോർജ്ജ് (43) ​നിര്യാതനായി. മാസങ്ങൾക്ക്​ മുമ്പാണ്​ അർബുദ ബാധ സ്​ഥിരീകരിച്ചത്​. വെല്ലൂരിലെ ചികിൽസക്ക്​ ശേഷം തിരികെയെത്തിയ ജോബി ജീവിതത്തിലേക്ക്​ തിരിച്ചു വരുമെന്ന പ്രതീക്ഷ നൽകിയിരുന്നു. എന്നാൽ ഒരാഴ്ച മുമ്പുണ്ടായ അസ്വസ്​ഥയെത്തുടർന്ന്​ ദമ്മാമി​ലെ സ്വകാര്യ ​ആുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിക്കുകയായിരുന്നു. രണ്ട്​ ദിവസം മുമ്പ്​ രോഗം മൂർഛിച്ചതിനെ ത്തുടർന്ന്​ വെൻറിലേറ്ററിലേക്ക്​ മാറ്റിയിരുന്നു.ചെവ്വാഴ്​ച രാവിലെ 11 മണിയോടെയാണ്​ മരിച്ചത്.

ദമ്മാം മാർത്തോമാ ഇടവക അംഗമായിരുന്നു. ഇടവക ട്രസ്​റ്റി, അക്കൗണ്ടൻറ്,​ ആത്​മായ ശുഷ്രുഷകൻ, യീവ ജനസഖ്യം സെക്രട്ടറി എന്നീ പദവികൾ വഹിച്ചിരുന്നു. രണ്ട്​ പതിറ്റാണ്ടിലധികമായി സ്വകാര്യ കമ്പനിയിൽ ഫൈനാൻസ്​ വിഭാഗത്തിൽ ജോലിചെയ്​തു വരികയായിരുന്നു. അൽ ഖോബാർ കേന്ദ്രമായി പ്രവർത്തിക്കുന്ന കനിവ്​ സാംസ്കാരിക വേദിയുടെ പ്രവർത്തകനായ ജോബി നിലവിൽ ആർ്​ടസ്​ ക്ലബ്ബ്​ സെക്രട്ടറിയാണ്​. കനിവ്​ അവതരിപ്പിച്ച നിരവധി നാടകങ്ങളിൽ ജോബി വേഷമിട്ടുണ്ട്​.

ദമ്മാം നാടകവേദി കഴിഞ്ഞ വർഷം വിശ്വവിഖ്യാത എഴുത്തുകാരൻ ഷേക്​സ്​പിയറിന്റെ ജീവിതത്തെ അടിസ്​ഥാനമാക്കി അവതരിപ്പിച്ച 'ഇതിഹാസം' എന്ന നാടകത്തിൽ ഷേക്​സ്​പിയറായി അഭിനയിച്ചതോടെയാണ്​ ജോബി സൗദി കിഴക്കൻ പ്രവിശ്യയിലെ മലയാളികൾക്കിടയിൽ കൂടുതൽ ശ്രദ്ധ നേടുന്നത്​. ആൻറമാൻ സ്വദേശിനിയും നഴ്​സുമായിരുന്ന ജിഷയാണ്​ ഭാര്യ. 'ഇതിഹാസം' നടകത്തിൽ ഷേക്​സ്​പിയറിന്റെ അമ്മയായി അഭിനയിച്ചത്​ ജിഷയായിരുന്നു.

മൃതദേഹം നാട്ടിലെത്തിക്കുന്നതിനുള്ള നടപടിക്രമങ്ങൾ പുരോഗമിക്കുന്നു. ദമ്മാം സ്​കുൾ വിദ്യാർത്ഥികളായ ലെവിൻ (13) ലിയാന (ഒമ്പത്) എന്നിവർ മക്കളാണ്​.