50 വർഷം മുമ്പ്​ വാപ്പ ഈണമിട്ട ഭക്തിഗാനത്തിന്​ പുതുജീവൻ നൽകി നജീം അർഷാദ്​; 'യാ റബ്ബ്​' നെഞ്ചിലേറ്റി സംഗീത​പ്രേമികൾ

50 വർഷം മുമ്പ്​ പിതാവ്​ സംഗീതം നൽകിയ മറ്റൊരു ഗാനം​ കൂടി പുനരാവിഷ്​കരിച്ച്​ യുവഗായകൻ നജീം അർഷാദ്​. വാപ്പ ഷാഹുൽ ഹമീദ്​ ഈണമിട്ട 'യാ റബ്ബിൽ ആലമീനേ' എന്ന്​ തുടങ്ങുന്ന ഇസ്​ലാമിക ഭക്​തിഗാനമാണ്​ സംഗീതാസ്വാദകർക്കുള്ള ബലിപ്പെരുന്നാൾ സമ്മാനമായി നജീം പുറത്തിറക്കിയത്​. ഷാഹുൽ ഹമീദിന്‍റെ സുഹൃത്ത്​ വടശ്ശേരി ഖാദർ ആണ്​ ഈ ഗാനത്തിന്‍റെ വരികൾ എഴുതിയത്​. അദ്ദേഹം ഇന്ന്​ ജീവിച്ചിരിപ്പില്ല. പഴയ ഗാനത്തിൽ ചില കൂട്ടിച്ചേർക്കലുകൾ നടത്തി പുതിയ രീതിയിലാക്കിയാണ്​ ഇപ്പോൾ അവതരിപ്പിച്ചിരിക്കുന്നത്​. ഗാനരചനയിൽ നജീമിന്‍റെ മൂത്ത സഹോദരൻ ഡോ. അജിംഷാദും അണിനിരന്നു.

ഈ പാട്ടി​ന്‍റെ കുടുംബ വിശേഷം ഇനിയുമുണ്ട്​. ഇതി​ന്‍റെ മിക്​സിങ്​ നിർവഹിച്ചിരിക്കുന്നത്​ നജീമിന്‍റെ രണ്ടാമത്തെ സഹോദരൻ സജീം നൗഷാദ്​ ആണ്​. നജീമിന്‍റെ ഔദ്യോഗിക യുട്യൂബ്​ ചാനലിൽ റിലീസ്​ ചെയ്​ത ഗാനം ഇതോടകം സംഗീതപ്രേമികൾ നെഞ്ചിലേറ്റി കഴിഞ്ഞു. സൂഫി ശൈലിയിലുള്ള ഈ ഗാനത്തിന്‍റെ ദൃശ്യാവിഷ്​കാരവും ഏറെ ആകർഷണീയമാണ്​. കണ്ണൂർ അറക്കൽ പള്ളിയും പരിസരവും തലശ്ശേരി ബീച്ചും പശ്ചാത്തലമാക്കി സച്ചു സുരേന്ദ്രൻ ആണ്​ ഇതിന്‍റെ സംവിധാനവും എഡിറ്റിങും നിർവഹിച്ചിരിക്കുന്നത്​. സാദിഖ് സാക്കിയുടെ നേതൃത്വത്തിലുള്ള മാഡ് മാക്സ് ടീമിന്‍റെ സൂഫി നൃത്തച്ചുവടുകളും ഗാനത്തിന്​ മിഴിവേകുന്നു.

ക്യാമറ- ദാസ്​ കെ. മോഹനൻ, ഹെലിക്യാം- ഷമിൻ ഷണ്മുഖൻ, മാസ്റ്ററിങ്​- ജോനാഥൻ ജോസഫ്, സോങ്​ പ്രോഗ്രാമർ- സിബി മാത്യു അലക്​സ്​, അഡീഷണൽ പ്രോഗ്രാമിങ്​- ശ്രീരാഗ്​ സുരേഷ്​, റിഥം- സുരേഷ്​ കൃഷ്​ണൻ, ട്രാവൽ- അനീഷ്​ വിജയ്​, ഡിസൈൻസ്​- സുനീർ മുഹമ്മദ്​ എന്നിവരാണ്​ അണിയറ പ്രവർത്തകർ.

അടുത്തിടെ പിതാവ്​ ഷാഹുൽ ഹമീദ്​ അരനൂറ്റാണ്ട്​ മുമ്പ്​ ഈണം പകർന്ന 'ഹിമബിന്ദു പൊഴിയും നിലാവിൽ, അതിലോലമൊഴുകുന്ന പുഴയിൽ...' എന്നുതുടങ്ങുന്ന പ്രണയഗാനവും നജീം പുനരാവിഷ്​കവരിച്ചിരുന്നു. കാലോചിതമായ മാറ്റം വരുത്തി പുറത്തിറക്കിയ ആ ഗാനത്തിന്​ വരികളെ​​​ഴുതിയതുംഡോ. അജിംഷാദ്​ ആണ്​. സജീം നൗഷാദ്​ ഇതിന്‍റെ റെക്കോർഡിങും മിക്​സിങും നിർവഹിച്ചു.