ദോഹ: ആർട്ടൺ കാപ്പിറ്റൽ പുറത്തിറക്കിയ ഗ്ലോബൽ പാസ്പോർട്ട് പവർ റാങ്കിങ്ങിൽ 120 മൊബിലിറ്റി സ്കോറുമായി ഖത്തർ പാസ്പോർട്ടിന് 44ാം സ്ഥാനം. ഖത്തർ പാസ്പോർട്ട് ഉപയോഗിച്ച് പൗരന്മാർക്ക് 69 രാജ്യങ്ങളിൽ വിസയില്ലാതെ പ്രവേശനം നേടാം. കൂടാതെ, 42 രാജ്യങ്ങളിൽ ‘വിസ ഓൺ അറൈവൽ’ പ്രവേശനവും അനുവദിക്കുന്നു. അതേസമയം ഖത്തർ പാസ്പോർട്ടുള്ളവർക്ക് 78 രാജ്യങ്ങളിലേക്ക് പ്രവേശിക്കാൻ വിസ ആവശ്യമാണ്.
പട്ടികയിൽ യു.എ.ഇ പാസ്പോർട്ട് ആണ് ഒന്നാം സ്ഥാനത്തുള്ളത്. 179 രാജ്യങ്ങളിലേക്ക് വിസയില്ലാതെ യു.എ.ഇ പാസ്പോർട്ട് ഉപയോഗിച്ച് പ്രവേശിക്കാം. സിംഗപ്പൂർ, സ്പെയിൻ എന്നീ രാജ്യങ്ങളാണ് രണ്ടാമത്. ഈ രാജ്യങ്ങളിലെ പൗരന്മാർക്ക് 175 രാജ്യങ്ങളിലേക്ക് വിസയില്ലാതെ യാത്രാനുമതി നൽകുന്നു. നേരത്തേ, മുപ്പതാം സ്ഥാനത്തായിരുന്ന സിംഗപ്പൂർ രണ്ടാം സ്ഥാനത്തേക്ക് കുതിച്ചുചാട്ടം നടത്തിയത് ശ്രദ്ധേയമാണ്.
അതേസമയം, ജി.സി.സി രാജ്യങ്ങളിൽ, ഖത്തറിന് പിന്നിലായി 45ാം സ്ഥാനത്താണ് കുവൈത്ത് പാസ്പോർട്ടിന്റെ സ്ഥാനം. സൗദി അറേബ്യ, ബഹ്റൈൻ പാസ്പോർട്ടുകൾ 48ാം സ്ഥാനത്തും ഒമാൻ 51ാം സ്ഥാനത്തുമാണ്.
ഇന്ത്യയുടെ പാസ്പോർട്ട് 67ാം സ്ഥാനത്താണുള്ളത്.
പാസ്പോർട്ട് ഇൻഡക്സിൽ മൊത്തം 199 രാജ്യങ്ങളെയാണ് പരിഗണിച്ചത്. ഇതിൽ 193 യുനൈറ്റഡ് നാഷൻസ് അംഗരാജ്യങ്ങളും ആറ് ടെറിട്ടറീസുകളും ഉൾപ്പെടുന്നു. ഓരോ രാജ്യത്തിന്റെയും മൊബിലിറ്റി സ്കോർ, വിസ ഫ്രീ -വിസ ഓൺ അറൈവൽ പ്രവേശനത്തിന്റെ അനുപാതം എന്നിവയുടെ അടിസ്ഥാനത്തിലാണ് റാങ്ക് നിർണയിച്ചത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.