ആർ.ഡി.ഒ കോടതിയിലെ തൊണ്ടിമുതൽ മോഷണം: പ്രതി തെളിവ്​ നശിപ്പിക്കാനും ശ്രമിച്ചെന്ന്​ പൊലീസ്​

തിരുവനന്തപുരം: കലക്ടറേറ്റിലെ ആർ.ഡി.ഒ കോടതിയിലെ തൊണ്ടിമുതൽ മോഷ്ടിച്ച കേസിലെ പ്രതി ശ്രീകണ്ഠൻ നായർ തെളിവ്‌ നശിപ്പിക്കാൻ ശ്രമിച്ചതായി പൊലീസിന്‍റെ റിമാൻഡ്​ റിപ്പോർട്ട്‌. ഔദ്യോഗിക പദവി ദുരുപയോഗപ്പെടുത്തിയാണ്‌ പ്രതി മോഷണവും തെളിവ്‌ നശിപ്പിക്കൽ ശ്രമവും നടത്തിയതെന്ന്​​ റിപ്പോർട്ടിൽ പറയുന്നു. മോഷ്ടിച്ച തൊണ്ടിമുതലുകൾ വിവിധ ധനകാര്യ​ സ്ഥാപനങ്ങളിൽ പണയം വെച്ചെന്നും ഇതിൽ 12 പവൻ ക​ണ്ടെത്തിയെന്നും റിപ്പോർട്ടിലുണ്ട്​. റവന്യൂ ഡിവിഷനൽ ഓഫിസിൽ 2020 മാർച്ച്‌ മുതൽ 2021 ഫെബ്രുവരി വരെയാണ്‌ ശ്രീകണ്ഠൻനായർ സീനിയർ സൂപ്രണ്ടായിരുന്നത്‌. ഇക്കാലയളവിൽ ഔദ്യോഗിക പദവി ദുരുപയോഗപ്പെടുത്തിയാണ്‌ തൊണ്ടിമുതലുകൾ മോഷ്ടിച്ചത്‌. ഇതു​ പുറത്തറിയാതിരിക്കാൻ തൊണ്ടിമുതൽ വിവരങ്ങൾ രേഖപ്പെടുത്തുന്ന രജിസ്റ്ററിന്‍റെ 121, 122 നമ്പർ പേജുകൾ കീറിമാറ്റി. അപ്രൈസർ സർട്ടിഫിക്കറ്റുകൾ എടുത്തുമാറ്റിയതായും വ്യക്തമായി. എടുത്തുമാറ്റിയ സ്വർണാഭരണങ്ങളുടെ അതേ മാതൃകയിലുള്ള 31 പവൻ മുക്കുപണ്ടം പകരം വെച്ചതും തെളിവ്‌ നശിപ്പിക്കാനാണ്​​. എസ്‌ ചെയിൻ മാല, രണ്ടു സ്വർണമാല, നാലു സ്വർണ ചെയിൻ, രണ്ടു സ്വർണ മോതിരം, രണ്ടു കൊലുസ്​, മൂന്നു വളകൾ എന്നിവ കുടപ്പനക്കുന്നിലെ ധനകാര്യ സ്ഥാപനത്തിന്‍റെ ശാഖയിൽ പണയപ്പെടുത്തിയിരുന്നു. ഇത്‌ 2021 ആഗസ്റ്റ്​ എട്ട്‌, ഡിസംബർ 20 തീയതികളിലായി ലേലത്തിൽ പോയി. നിരവധി സ്ഥാപനങ്ങളിൽ പണയം വെച്ച സ്വർണം, വെള്ളി ആഭരണങ്ങൾ കണ്ടെത്താനുണ്ട്‌. ഇതിനു​ പ്രതിയുടെ സാന്നിധ്യം ആവശ്യമായതിനാൽ പൊലീസ്‌ കസ്റ്റഡിയിൽ വിട്ടുനൽകണമെന്നും പേരൂർക്കട സി.ഐ ആസാദ്‌ അബ്ദുൽകലാം തിരുവനന്തപുരം ജെ.എഫ്‌.സി.എം കോടതിയിൽ നൽകിയ റിപ്പോർട്ടിൽ പറയുന്നു. സ്വർണം മറ്റു​ പലരുടെയും പേരിൽ ഇയാൾ പണയം വെച്ചിട്ടുണ്ട്​. തുക തിരിച്ചടക്കാത്തതിനാൽ ഇവർക്ക്​ റിക്കവറി നോട്ടീസ്​ ലഭിച്ചിട്ടുണ്ട്​. ശ്രീകണ്ഠൻനായർ ഒറ്റക്കാണ്​ മോഷണം നടത്തിയതെന്ന വിലയിരുത്തലിലാണ്​ പൊലീസ്​. എന്നാൽ, താൻ മാത്രമല്ല മോഷണം നടത്തിയതെന്നാണ്​ പ്രതി പറയുന്നത്​. എന്നാൽ, ഇത്​ അന്വേഷണം വഴിതിരിച്ചുവിടാനാ​ണെന്ന സംശയം പൊലീസിനുണ്ട്​. സ്വന്തം ലേഖകൻ