കനത്തമഴയില്‍ സംരക്ഷണഭിത്തി ഇടിഞ്ഞുവീണ്​ ദേവാലയം തകര്‍ന്നു

മുണ്ടക്കയം: കനത്ത മഴയെ തുടർന്ന്​ സംരക്ഷണഭിത്തി ഇടിഞ്ഞുവീണ് ദേവാലയം തകർന്നു. ഇതോടെ സമീപത്തെ വീടുകളും ഭീഷണിയിലാണ്. മുണ്ടക്കയം-കോരുത്തോട് റൂട്ടില്‍ പാറമടയില്‍ ന്യൂഇന്ത്യ ബൈബിള്‍ ചര്‍ച്ചാണ്​ നശിച്ചത്​. റോഡിന് താഴെ നിന്നുള്ള വലിയ കല്‍ക്കെട്ടിന്​ മുകളില്‍ ഒരുമാസം മുമ്പ്​ റോഡ് നിര്‍മാണത്തിന്‍റെ ഭാഗമായി കോണ്‍ക്രീറ്റ് ഉപയോഗിച്ച് സംരക്ഷണഭിത്തി നിര്‍മിച്ചിരുന്നു. ഈ ഭാഗമാണ് ഇടിഞ്ഞ് താഴേക്ക് പതിച്ചത്. മടുക്ക മുതല്‍ പനക്കച്ചിറ വരെയുള്ള ഭാഗത്ത് റോഡിന്‍റെ ഒരുഭാഗം കൊക്കയാണ്. കോരുത്തോട് റോഡ് നിര്‍മാണത്തിന്‍റെ ഭാഗമായി ഈഭാഗത്ത് പല സ്ഥലങ്ങളിലും പുതിയ സംരക്ഷണഭിത്തികളും നിര്‍മിച്ചു. പഴയ കരിങ്കല്‍കെട്ടിന്​ മുകളില്‍ വലിയ കനത്തില്‍ കോണ്‍ക്രീറ്റ് സ്ഥാപിച്ചായിരുന്നു നിര്‍മാണം. കരിങ്കൽക്കെട്ട് കോണ്‍ക്രീറ്റിന്‍റെ കനം താങ്ങാനാകാതെ വന്നതാണ് പള്ളിയുടെ സമീപത്ത് അപകടം ഉണ്ടാകാന്‍ കാരണം എന്ന് നാട്ടുകാര്‍ ആരോപിക്കുന്നു. നിർമാണത്തിലെ അപാകത ചൂണ്ടിക്കാട്ടിയിട്ടും നടപടിയുണ്ടായില്ലെന്ന്​ ആക്ഷേപമുണ്ട്. അപ്രതീക്ഷിതമായുണ്ടായ ദുരിതങ്ങളുടെ കാരണം കണ്ടെത്തി നടപടി സ്വീകരിക്കാന്‍ ബന്ധപ്പെട്ട വകുപ്പുകള്‍ക്ക് നിര്‍ദേശം നല്‍കിയെന്നും നാശനഷ്ടം സംഭവിച്ച പ്രദേശങ്ങളില്‍ അതിവേഗം നിര്‍മാണം നടത്തി സുരക്ഷ ഉറപ്പാക്കുമെന്ന് സെബാസ്റ്റ്യന്‍ കുളത്തുങ്കല്‍ എം.എല്‍.എ പറഞ്ഞു. KTL WBL MAZHAKE്DUTHI റോഡ് സംരക്ഷണഭിത്തി തകര്‍ന്ന്​ നശിച്ച ദേവാലയം