പെരുങ്ങള്ളൂരിൽ വീണ്ടും വാഹനാപകടം

അഞ്ചൽ: നിർമാണം ഇഴഞ്ഞുനീങ്ങുന്ന അഞ്ചൽ-ആയൂർ പാതയിൽ വീണ്ടും വാഹനാപകടം. ബുധനാഴ്ച രാവിലെ പത്തോടെ പെരുങ്ങള്ളൂരിലാണ് അപകടമുണ്ടായത്. ആയൂർ ഭാഗത്തുനിന്ന് അഞ്ചലിലേക്ക് പോയ കെ.എസ്.ആർ.ടി.സി ഓർഡിനറി ബസിനെ മറികടക്കുന്നതിനിടെ സ്വകാര്യ ബസ് മുന്നിൽ പോയ കാറിൽ ഇടിച്ചു. ഇടിയുടെ ആഘാതത്തിൽ നിയന്ത്രണംവിട്ട കാറിൽ തട്ടാതിരിക്കാൻ പാതയോരത്തേക്ക്​ തിരിക്കുന്നതിനിടെ കെ.എസ്.ആർ.ടി.സി ബസ് ഓട നിർമിക്കാൻ മണ്ണെടുത്ത കുഴിയിലേക്ക് വീണു. സ്വകാര്യ ബസ് അമിത വേഗത്തിലായിരുന്നെന്ന് ദൃക്സാക്ഷികൾ പറഞ്ഞു. ഒരാഴ്ച മുമ്പ് ഈ സ്ഥലത്തിന് സമീപം സ്വകാര്യ ബസിടിച്ച് ആയൂർ സ്വദേശിയായ യുവാവ് മരിച്ചു. ഒപ്പമുണ്ടായിരുന്ന സുഹൃത്തിന് ഗുരുതര പരിക്കേറ്റു. പുനർനിർമാണം നടക്കുന്ന പാതയിലുടനീളം കുണ്ടും കുഴികളുമാണെങ്കിലും ബസുകൾ അമിത വേഗത്തിലാണ് കടന്നുപോകുന്നതെന്ന്​ നാട്ടുകാർ പറയുന്നു. അപകടസ്ഥലത്തെത്തിയ ചടയമംഗലം പൊലീസ് മേൽനടപടി സ്വീകരിച്ചു. കാപ്​ഷൻ: അഞ്ചൽ-ആയൂർ പാതയിൽ പെരുങ്ങള്ളൂരിൽ അപകടത്തിൽപെട്ട കെ.എസ്.ആർ.ടി.സി ബസ്