പിണറായിക്ക്​ മുനീറി​ന്‍റെ സർട്ടിഫിക്കറ്റ് വേണ്ട -മന്ത്രി ശിവൻകുട്ടി

തിരുവനന്തപുരം: പിണറായി വിജയൻ കമ്യൂണിസ്​റ്റ്​ ആണോ എന്ന് ചോദിച്ച എം.കെ. മുനീർ സ്വന്തം കാൽച്ചുവട്ടിലെ മണ്ണ് ഇളകിപ്പോകുന്നത് കണ്ട് ഭയന്ന് നിൽക്കുകയാണെന്ന് പൊതുവിദ്യാഭ്യാസ മന്ത്രി വി. ശിവൻകുട്ടി. പിണറായി വിജയന് മുനീറി​െൻറ സർട്ടിഫിക്കറ്റ് വേണ്ടെന്നും അദ്ദേഹം പറഞ്ഞു.

വർഗീയ രാഷ്​ട്രീയം കളിക്കുന്നതിലൂടെ മുസ്​ലിം ലീഗ് ബി.ജെ.പിയുടെ ബി ടീം ആകുകയാണ്. ലീഗി​െൻറ നിലപാടുകൾ ബി.ജെ.പിക്ക്​ പരവതാനി വിരിക്കലാണ്.

സി.പി.എമ്മിനും ഇടതുമുന്നണിക്കും സമൂഹത്തിൽ നിന്ന് ലഭിക്കുന്ന പിന്തുണ കണ്ട് ലീഗിന് ഹാലിളകിയിരിക്കുകയാണ്. ലീഗി​െൻറ സംസ്കാരം കോഴിക്കോട്ടെ റാലിയിൽ ജനം കണ്ടതാണ്. വർഗീയ കാർഡ് ഇറക്കിയാലൊന്നും ലീഗിന് അണികളുടെ ചോർച്ച തടയാനാവില്ലെന്നും ശിവൻകുട്ടി പറഞ്ഞു.