നാം മരണത്തെരുവിൽ...

കോട്ടയം: സംസ്ഥാനത്ത്​ ഈ വർഷം പേവിഷ ബാധയേറ്റ്​ മരിച്ചത്​ 25 ഓളം പേർ! ഇതിൽ പലരും പ്രതിരോധ വാക്സിൻ എടുത്തവരും. സംസ്ഥാന ബാലാവകാശ കമീഷൻ മുമ്പാകെ ആരാഗ്യ വകുപ്പ്​ ഡയറക്ടറേറ്റ്​ സമർപ്പിച്ച റിപ്പോർട്ടിലാണ്​ ഇത്​ വ്യക്​തമാക്കുന്നത്​.

നായ്​ക്കളുടെ കടിയേൽക്കുന്നവരുടെ എണ്ണം ദിനം തോറും വർധിക്കുന്നതായാണ്​ കണക്കുകൾ സൂചിപ്പിക്കുന്നത്​. നാല് മാസത്തിനിടെ 1,31,244 പേർക്ക് നായയുടെ കടിയേറ്റു.

വാക്സിൻ എടുത്തിട്ടും മരണം

ഈ വർഷം നായുടെ കടിയേറ്റ്​ മരിച്ചവരിൽ ഒമ്പത്​ പേർ വാക്സിൻ എടുത്തവരാണ്​. 2021 മുതൽ 2024 വരെ നായ്ക്കളുടെ കടിയേറ്റ്​ മരിച്ച 89 പേരിൽ 18 പേർ പ്രധിരോധ വാക്സിൻ എടുത്തിരുന്നതായി റിപ്പോർട്ടിലുണ്ട്.

‘വൈറസ്​ വ്യാപനം അതിവേഗം’

പ്രതിരോധ വാക്സിനുകൾ കൃത്യമായ ഡോസുകൾ എടുത്തിട്ടും മരണം സംഭവിച്ചതായി​ ആരോഗ്യവകുപ്പ്​ സമ്മതിക്കുന്നു. വൈറസ് അതിവേഗം ശരീരത്തിൽ വ്യാപിച്ചതിനാൽ നൽകിയ മരുന്നുകൾ ഫലപ്രദമായില്ലെന്നാണ്​ അധികൃതർ വിശദീകരിക്കുന്നത്. കഴുത്ത്, തല, കൈ എന്നീ ഭാഗങ്ങളിൽ കടിയേൽക്കുന്നതാണ്​ കൂടുതൽ അപകടകരമെന്നും റിപ്പോർട്ടിൽ പറയുന്നു.

അതേസമയം, പേവിഷ പ്രതിരോധ വാക്സിന്റെ ഗുണനിലവാരം അതാത് ഏജൻസികൾ ഉറപ്പാക്കിയിട്ടുണ്ടെന്നും അതിൽ ഗുണനിലവാര കുറവില്ലെന്നും ആരോഗ്യവകുപ്പ് അവകാശപ്പെടുന്നു.

കോഴഞ്ചേരി, പത്തനാപുരം, തേഞ്ഞിപ്പലം എന്നിവിടങ്ങളിൽ കുട്ടികൾ പേവിഷബാധയേറ്റ്​ മരിച്ച സംഭവത്തിൽ ഹൈകോടതി അഭിഭാഷകനും പൊതുപ്രവർത്തകനുമായ അഡ്വ. കുളത്തൂർ ജയ്‌സിങ് ബാലാവകാശ കമീഷനിൽ സമർപ്പിച്ച പരാതിയുടെ അടിസ്ഥാനത്തിലാണ്​ ആരോഗ്യവകുപ്പ്​ ബാലാവകാശ കമീഷനിൽ റിപ്പോർട്ട്​ സമർപ്പിച്ചത്​.