പ്രകൃതിയുടെ തുടിപ്പറിഞ്ഞ്​ 'ബീറ്റ്സ് ഓഫ് നേച്ചർ' ചിത്രപ്രദർശനം

തിരുവനന്തപുരം: കാടിന്‍റെ വന്യതയും പ്രകൃതിയുടെ മനോഹാരിതയും കാണാൻ കാടുകയറേണ്ട കാര്യമില്ല, മ്യൂസിയം ഓഡിറ്റോറിയത്തിൽ എത്തിയാൽ നിങ്ങൾക്ക്​ അത്​ ആസ്വദിക്കാനാകും. ഒരു കൂട്ടം പ്രകൃതിസ്നേഹികൾ നടത്തിയ വിവിധ വനയാത്രകളിൽ ഒപ്പിയെടുത്ത മനോഹരദൃശ്യങ്ങളുടെ ഈ പ്രദർശനം വനത്തിലൂടെയുള്ള സഞ്ചാരത്തിന്‍റെ അനുഭവമാണ്​ കാഴ്ചക്കാർക്ക്​ ​നൽകുന്നത്​. ജീവിതത്തിന്‍റെ വിവിധ മേഖലകളിലുള്ള ആറ് സുഹൃത്തുക്കൾ വിഭാവനം ചെയ്തതാണ് 'ബീറ്റ്സ് ഓഫ് നേച്ചർ' എന്ന ചിത്രപ്രദർശനം. ഹെർപറ്റോളജിസ്റ്റും സൊസൈറ്റി ഓഫ് ഓഡോനറ്റ് സ്റ്റഡീസിന്‍റെ എക്സിക്യൂട്ടിവ് അംഗവുമായ സുജിത്​.വി ഗോപാലൻ, കെ.എസ്.ഇ.ബി ഉദ്യോഗസ്ഥനായ ബിജുലാൽ എം.ഡി, അമൃത ടിവി ക്യാമറാമാനായ പ്രദീപ്‌ വാളത്തുങ്കൽ, പ്രഫഷനൽ ഫോട്ടോഗ്രാഫറായ തോംസൺ സോബുരോജ്, കൺസ്ട്രഷൻ കമ്പനി പാർട്ണറായ സുരേഷ് കുറുപ്പ്, ഇ.എസ്.ഐ.സി അസിസ്റ്റന്റ് ഡയറക്ടർ പി.ബി. ബിജു എന്നിവർ തങ്ങളുടെ യാത്രകളിൽ കാമറകളിൽ പകർത്തിയ ചിത്രങ്ങളുടെ പ്രദർശനമാണ്​ കഴിഞ്ഞ മൂന്ന്​ ദിവസങ്ങളിലായി ഇവിടെ പ്രദർശിപ്പിക്കുന്നത്​. മേയ്‌ നാലിന്​ ഐ.എഫ്​.എസ്​ ഉദ്യോഗസ്ഥനായ സഞ്ചയൻ കുമാർ ഉദ്​ഘാടനം ചെയ്ത പ്രദർശനം ഇന്ന്​ സമാപിക്കും. രാവിലെ ഒമ്പത്​ മുതൽ രാത്രി എട്ട്​ വരെയാണ്​ ​പ്രദർശനം. തിരക്കിനിടയിലും സമയം കണ്ടെത്തി പല കാലങ്ങളിലായി നടത്തിയ സഞ്ചാരങ്ങളിൽനിന്ന്​ അവരെടുത്ത ആയിരത്തിലധികം ചിത്രങ്ങളിൽനിന്ന്​ തെരഞ്ഞെടുക്കപ്പെട്ട 50ഓളം ചിത്രങ്ങളാണ്​ പ്രദർശനത്തിൽ ഒരുക്കിയിട്ടുള്ളത്​. ഫോട്ടോഗ്രാഫിയും യാത്രയും ഏറെ ഇഷ്ടപ്പെടുന്നവർ കേരളത്തിന്‌ പുറമെ അസം, സിക്കിം, തമിഴ്നാട്, ബിഹാർ തുടങ്ങി നിരവധി സംസ്ഥാനങ്ങളിലെ വനങ്ങളിൽനിന്നുള്ള വൈവിധ്യമായ ദൃശ്യങ്ങളാണ്​ ക്യാമറക്കണ്ണുകളിൽ പകർത്തിയിട്ടുള്ളത്. കാഴ്ചക്ക് കൗതുകം പകരുന്നതിന്​ പുറമെ വരുംതലമുറക്ക്​ വിജ്ഞാനപ്രദവും പ്രകൃതിസംരക്ഷണത്തിന്‍റെ പ്രാധാന്യം പകർന്ന്​ നൽകുന്നതുമായ ലക്ഷ്യത്തോടെയാണ് പ്രദർശനം ഒരുക്കിയതെന്ന്​ സുഹൃത്​സംഘം പറയുന്നു.