വിജയവഴിയിലേക്കുള്ള ഊർജം പകർന്ന്​ ജി.എസ്​. പ്രദീപ്​

മലപ്പുറം: അറിവിനെക്കുറിച്ചുള്ള മുൻവിധികളൊന്നുമില്ലാതെ തുറന്ന മനസ്സോടെ അറിവിനെ സമീപിക്കുന്നതാണ്​ വിജയകലയുടെ മന്ത്രമെന്ന സന്ദേശത്തിലൂടെ വിജയവഴികളിലേക്കുള്ള ഊർജം പകർന്ന്​ ജി.എസ്​. പ്രദീപ്​. 'എജുകഫെ'യുടെ ആദ്യദിനത്തിലെ മികച്ച ​സെഷനുകളിലൊന്നായിരുന്നു ജി.എസ്​. പ്രദീപിന്‍റെ 'ദ ആർട്ട്​ ഓഫ്​ സക്സസ്'​. ആഹ്ലാദത്തിന്‍റെയും ആതിഥേയത്വത്തിന്‍റെയും അനുകരിക്കാൻ കഴിയാത്ത മാതൃകയാണ്​ മലപ്പുറമെന്ന ആമുഖത്തോടെയായിരുന്നു പ്രസംഗത്തിന്‍റെ തുടക്കം. സ്വാതന്ത്ര്യസമര പോരാട്ടത്തിലെ മലപ്പുറത്തിന്‍റെ പങ്കിനെ ആർക്കും തള്ളിപ്പറയാൻ സാധിക്കി​ല്ലെന്ന വരികളെ നിറഞ്ഞ കൈയടിയോടെയായിരുന്നു സദസ്സ്​ വരവേറ്റത്​. ജയിച്ചുപോയവരെക്കാൾ തോറ്റുപോയവരാണ്​ ലോകം കൂടുതൽ മനോഹരമാക്കിയതെന്ന സന്ദേശവും അദ്ദേഹം വിദ്യാർഥികൾക്കായി പങ്കുവെച്ചു. ആകാശവാണിയിൽനിന്ന് ആദ്യ ശ്രമത്തിൽ തിരസ്കൃതനായ കെ.ജെ. യേശുദാസിനെയും മ്യൂണിക്​ സർവകലാശാലയിൽ പ്രവേശനം നിഷേധിക്കപ്പെട്ട ഐൻസ്റ്റീന്‍റെയും ജീവിതാനുഭവങ്ങൾ അദ്ദേഹം വിവരിച്ചു. 'എനിക്കറിയില്ല' എന്നതാണ്​ അറിവ്​ നേടാനുള്ള ആദ്യമന്ത്രമെന്നും ഒരു കാര്യം അറിയില്ലെന്ന്​ പറയുന്നതിലൂടെ അക്കാര്യം അറിയാൻ നമ്മൾ പരിശ്രമം ആരംഭിക്കുമെന്നും അദ്ദേഹം പറഞ്ഞു. അറിവിനെക്കുറിച്ചുള്ള എല്ലാവിധ മുൻധാരണകളെയും ഞങ്ങൾ ഒഴിവാക്കുമെന്ന്​ ​മേളക്കെത്തിയവരെ കൊണ്ട്​ പ്രദീപ്​ പ്രതിജ്ഞ എടുപ്പിച്ചപ്പോൾ വലിയ പിന്തുണയായിരുന്നു വിദ്യാർഥികളിൽനിന്ന് ലഭിച്ചത്​. mpgab6 ,mpgab7,mpgab8 മാധ്യമം എജുകഫെ വേദിയിൽ ജി.എസ്​. പ്രദീപിന്‍റെ ദ ആർട്ട്​ ഓഫ്​ സക്സസ്​ സെഷനിൽനിന്ന്