പാമ്പാടി: അണ്ണാടിവയൽ നൊങ്ങൽ മേഖലയിൽ മോഷ്ടാക്കളുടെ വിളയാട്ടം. കഴിഞ്ഞദിവസം പ്രദേശത്തുനിന്ന് ബൈക്ക് മോഷണം പോകുകയും ബൈക്ക് മോഷണശ്രമവും നടന്നിരുന്നു. തുടർച്ചയായ ദിവസങ്ങളിൽ രാത്രിയിൽ അപരിചിതരെ പ്രദേശത്ത് കണ്ടതായും നാട്ടുകാർ പറയുന്നു. അണ്ണാടിവയൽ പുല്ലിക്കോട്ടയിൽ ഷാജിയുടെ ബൈക്ക് കഴിഞ്ഞദിവസം പുലർച്ച വീട്ടുമുറ്റത്തുനിന്ന് മോഷണം പോയിരുന്നു. രണ്ടു യുവാക്കൾ ബൈക്കുമായി പോകുന്നത് സമീപത്തെ സി.സി ടി.വി ദൃശ്യങ്ങളിൽ പതിഞ്ഞിരുന്നു. പിറ്റേദിവസം പുലർച്ച നൊങ്ങൽ താന്നിവേലിൽ ജോർജ് വർഗീസിന്റെ വീട്ടിലെ ബൈക്ക് മോഷ്ടിക്കാൻ ശ്രമം നടന്നിരുന്നു. ബൈക്കിലെത്തിയ ഒരാളാണ് ശ്രമം നടത്തിയത്. വീട്ടുകാർ കണ്ടെന്ന് മനസ്സിലായതോടെ ഇയാൾ കടന്നുകളഞ്ഞു. തിങ്കളാഴ്ച പുലർച്ച അപരിചിതരായ നാലുപേർ നൊങ്ങൽ പ്രദേശത്ത് ചുറ്റിക്കറങ്ങുന്നതായി പ്രദേശത്തെ സി.സി ടി.വി ദൃശ്യങ്ങളിൽ കണ്ടിരുന്നതായി നാട്ടുകാർ പറയുന്നു. ഇക്കാര്യങ്ങൾ ചൂണ്ടിക്കാട്ടി നൊങ്ങൽ നിവാസികൾ പാമ്പാടി പൊലീസിൽ പരാതി നൽകിയിട്ടുണ്ട്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.